އެމްއެމްޕީއާރްސީ ޚިޔާނާތުގެ ތަހުގީގާ ގުޅިގެން ޔޫތު މިނިސްޓަރު އަހުމަދު މަހުލޫފުގެ މައްޗަށް ތުހުމަތު ކުރެވޭ މައްސަލައިގައި ތަފާތު ގޮތަކަށް އަމަލުނުކުރާ ކަމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނެފިއެވެ.
ޕަބްލިކް ޕްރޮސިކިއުޓަރ އަހުމަދު ޝަފީއު ވިދާޅުވީ މައްސަލަތަކުގައި ދައުވާ ކުރުމާމެދު އެ އޮފީހުން ނިންމާ ނިންމުންތަކަކީ ހެއްކާއި ގަރީނާގެ މައްޗަށް ބިނާވާ ނިންމުންތަކެއް ކަމަށެވެ. މައްސަލަތަކުގައި ތަހުގީގީ އިދާރާތަކުން ހޯދާ ހެއްކާއި ގަރީނާއަކީ ގާނޫނާ އެއްގޮތަށް ހޯދާފައިވާ ހެއްކާއި ގަރީނާކަން ކަށަވަރު ކުރާ ކަމަށް ޝަފީއު ވިދާޅުވިއެވެ.
މަހުލޫފުގެ މައްސަލައަށް އިޝާރާތްކުރައްވައި ޝަފީއު ވިދާޅުވީ މި މައްސަލައިގައި ވެސް އެކަން ކަށަވަރު ކުރާނެ ކަމަށާއި، މި އޮފީހުން އެއްވެސް މީހަކާމެދު ނުޙައްގުން އަމަލު ނުކުރާ ކަމަށެވެ. މިކަމުގައި އެއްވެސް އިސްތިސްނާއެއް ނެތް ކަމަށް އޭނާ ވިދާޅުވިއެވެ. ޝަފީއު ވިދާޅުވީ ބައެއް ބޮޑެތި މައްސަލަތަކުގައި ދައުވާ ކުރުމާމެދު ގޮތެއް ނިންމާ މަރުހަލާގައި އިތުރު ކަންކަން ސާފުކުރުމަށް ނުވަތަ ތަހުގީގީ އިދާރާތަކާއެކު ކުރަންޖެހޭ އިތުރު މަސައްކަތްތައް ހުންނާތީ އިތުރު މުއްދަތުތަކެއް ހޭދަވާ ކަމަށެވެ. މިއީ މަހުލޫފުގެ މައްޗަށް ތުހުމަތުކުރެވޭ މައްސަލައިގައި ވެސް ދިމާވި ގޮތް ކަމަށާއި، މަހުލޫފުއާ މެދު ތަފާތު ގޮތަކަށް އަމަލުނުކުރާ ކަމަށެވެ.
މީގެ އިތުރުން ސިޔާސީ ބޭނުމަކަށް ބަޔަކު އަޑީގައި ތިބެގެން ކުރާ މަސައްކަތެއްކަން ޕީޖީ ހުސެއިން ޝަމީމަށް ވެސް އެނގިވަޑައިގަންނަވާނެ ކަމަށް މަހުލޫފު ވިދާޅުވެފައިވާ ވިދާޅުވުން ޝަފީއު ވަނީ ދޮގުކުރައްވާފައެވެ. އޭނާ ވިދާޅުވީ އެއީ ރަނގަޅު ވާހަކަތަކެއް ނޫން ކަމަށެވެ.
ތުހުމަތުކުރެވޭ ފަރާތުން މި އޮފީހަށް ނިސްބަތްކޮށް ކުރައްވާ ތުހުމަތުތަކަކީ މައްސަލައިގެ ތުހުމަތުކުރެވޭ މީހެއްގެ ހައިސިއްޔަތުން އެބޭފުޅާ ދެކެވަޑައިގަންނަވާގޮތް ކަމަށް ވެދާނެ. އެއީ ރަނގަޅު ވާހަކަތަކެއް ނޫން.ޕަބްލިކް ޕްރޮސިކިއުޓަރ އަހުމަދު ޝަފީއު
ޕީޖީން ގާނޫނާ ޚިލާފަށް އެއްވެސް މީހަކާމެދު އަމަލު ނުކުރާނެކަމުގެ ޔަގީންކަން ވެސް ދީފައިވެއެވެ.
އެމްއެމްޕީއާރްސީ މެދުވެރިކޮށް ހިންގި ޚިޔާނާތުގެ މައްސަލައިގައި ދައުވާކުރަން ޝަރީއަތާ ހަމައަށް ގެންގޮސްފިނަމަ "ދައުލަތް އޮރިޔާން" ވާނެ ކަމަށް މަހުލޫފު ވަނީ ވިދާޅުވެފައެވެ.
މިމަހުގެ 13 ވީ ހުކުރު ދުވަހުގެ ރޭ ކްލަބް ހައުސްގައި މިނިސްޓަރު މަހުލޫފު ވިދާޅުވީ އެންޓި ކޮރަޕްޝަން ކޮމިޝަން (އޭސީސީ) ގެ ރައީސް މަރިޔަމް ޝިއުނާއާއި، އެސެޓް ރިކަވަރީ ކޮމިޝަންގެ ރައީސް އަހުމަދު އަސްއަދު އުޅުއްވަނީ ބޭރުފުށުން ނަޒާހަތްތެރި ބޭފުޅުން ކަމަށް ހެދިގެން ކަމަށާއި ނަޒާހަތްތެރިކަމާ މެދު ސުވާލު އުފެދޭނެ ބައިވަރު ހެކި އެބަހުރި ކަަމަށެވެ. އަދި އެބޭފުޅުންގެ އިންޓެގްރިޓީ ގެއްލޭނެފަދަ ޗެޓް ލޮގްތަކެއް ވެސް އެބަހުރި ކަމަށް މަހުލޫފު ވިދާޅުވި އެވެ. ނަމަވެސް މި ޗެޓް ލޮގާ ގުޅޭ އިތުރު ތަފްސީލެއް މަހުލޫފު ހާމަކުރައްވާފައެއް ނުވެއެވެ.
މި މައްސަލައިގައި ފެށުނީއްސުރެ އެކި ދިމަދިމާލުން ސިޔާސީ ނުފޫޒު ވަދެފައިވާކަމަށް މަހުލޫފު ތުހުމަތުކުރައްވައެވެ. މަހުލޫފު ވިދާޅުވީ، ކުރިން ނިންމަވައިގެން ހުންނެވީ ޕީޖީ އޮފީހުން ގޮތެއް ނިންމުމުން އިސްތިއުފާ ދެއްވުމަށް ކަމަށެވެ. ނަމަވެސް ކަންކަން މިހާ ގޯސްކޮށް ދާތީ ދައުވާ ކުރިޔަސް ދެން އިސްތިއުފާ ދެއްވުމާމެދު ވިސްނަވާނެކަމަށް މަހުލޫފު ވިދާޅުވިއެވެ. އަދި އެކަން ރައީސަށް ވެސް ރަސްމީކޮށް ދަންނަވާނެކަން ފާހަގަކުރައްވައި މަހުލޫފު ވިދާޅުވީ، މަގާމުން ވަކިކުރުމަކީ ރައީސުލްޖުހޫރިއްޔާއަށް ގާނޫނު އަސާސީން މަތިކޮށްފައިވާ ބާރެއް ކަމުން، ގޮތެއް ނިންމަވާނީ ރައީސް ކަމަށެވެ.
މިމައްސަލައާ ގުޅިގެން ރައީސް އިބްރާހިމް މުހައްމަދު ޞާލިހު ވިދާޅުވީ އެމްއެމްޕީއާރްސީ ޚިޔާނާތުގެ ތަހުގީގާ ގުޅިގެން މަހުލޫފުގެ މައްޗަށް ތުހުމަތު ކުރެވޭ މައްސަލައިގައި ޕީޖީ އޮފީހުން އަވަހަށް ގޮތެއް ނިންމަވަން ޖެހޭކަމަށެވެ.
