އުންމީދަކީ، މަހެއްހާ ދުވަހުގެ ތެރޭގައި އުމުރުން 5 އަހަރުން މަތީގެ އާބާދީއަށް ވެކްސިން ޖެހޭނެ ގޮތް ހަމަޖެހިގެން ދިޔުން ކަމަށް ހެލްތް މިނިސްޓަރ އަހުމަދު ނަސީމު ވިދާޅުވެއްޖެއެވެ.
ސްކޫލް ދަރިވަރުންނަށް ވެކްސިން ޖަހަން ފެށުމުގެ އިންތިޒާމުތައް ބައްލަވައިލެއްވުމަށް އިސްލާމީ މަރުކަޒަށް ވަޑައިގެން ދެއްވި އިންޓަރވިއުއެއްގައި މިނިސްޓަރު ވިދާޅުވީ، އެމެރިކާގައި މިހާރު ހަދަމުންދާ ދިރާސާގެ ނަތީޖާ، މި މަސް ނިމޭއިރު ލިބޭނެ ކަމަށް އުންމީދު ކުރެވޭކަމަށެވެ. އެ ނަތީޖާއަށް ބަލައި، ރާއްޖޭގައި ވެސް އުމުރުން 5 އަހަރުން މަތީގެ ކުދިންނަށް ފައިޒަރ ވެކްސިން ޖަހަން ފަށާނެ ކަމަށެވެ.
އެމެރިކާގައި މިހާރު އެދަނީ 5 އަހަރުން މަތީގެ ކުދިންނަށް ވެކްސިން ދިނުމުގެ ދިރާސާތައް ހަދަމުން. މި މަހު ފަހުކޮޅު ނަތީޖާތައް ލިބޭނެ ކަމަަށް މިބެލެވެނީ. އުންމީދަކީ އެ ނަތީޖާއަށް ބަލައި، ރާއްޖޭގެ ވެސް އެ އާބާދީއަށް ވެކްސިން ދޭން ފެށުންއަހުމަދު ނަސީމް - ހެލްތް މިނިސްޓަރ
މިނިސްޓަރ ވިދާޅުވީ، ރާއްޖޭގައި ކޮވިޑްގެ ކޭސްތައް މިހާރު ކޮންމެވެސް ވަރަކަށް ކޮންޓްރޯލް ވެފައިވާކަމަށެވެ. މިހާރުވެސް އާބާދީގެ ބޮޑުބަޔަކަށް ވެކްސިން ޖެހުމުން ޕޮޒިޓިވް ރޭޓް އިތުރަށް ދަށަށްދާނެ ކަމަށާއި، ބަލި ޖެހުނަށް ބޮޑުވަރުނުވެ އެކަމުން ސަލާމަތް ވެވޭނެ ކަމަށެވެ.
ފައިޒަރ ވެކްސިން ޖަހަން ފަށާފައިވަނީ އާދީއްތަ ދުވަހުގެ ހެނދުނު އިސްލާމީ މަރުކަޒުގައެވެ. ސްކޫލް ދަރިވަރުންގެ އިތުރުން އާންމުންނަށް މި ވެކްސިން ދިނުމަށް ވަނީ ހުޅުވާލާފައެވެ. އެޕޮއިންޓްމެންޓް ހެއްދުމުން ވެކްސިން ޖެހުމުގެ އިންތިޒާމުތައް ހަމަޖެހިގެންދާނެ ކަމަށް އެޗްޕީއޭއިން ބުނެއެވެ.
