ލީޑްސް ޔުނައިޓެޑުގެ އެއްބަސްވުން އެ ޓީމުގެ އާޖެންޓީނާގެ ކޯޗު މާސެލޯ ބިއެލްސާ އާކޮށްފިއެވެ.

އުމުރުން 66 އަހަރުގެ ބިއެލްސާ އެންމެ ފުރަތަމަ ލީޑްސްއާ ހަވާލުވީ 2018 ވަނަ އަހަރު، އެ ޓީމު އިނގިރޭސި ދެވަނަ ޑިވިޝަން (އީއެފްއެލް ޗެމްޕިއަންޝިޕް) ގައި އޮއްވައެވެ. އެކަމަކު 2019-2020 ވަނަ އަހަރުގެ ސީޒަނުގައި ބިއެލްސާގެ އިރުޝާދުގެ ދަށުން ލީޑްސްއިން ވަނީ 16 އަހަރަށްފަހު އިނގިރޭސި ޕްރިމިއާ ލީގުގެ ޖާގައެއް ހޯދާފައެވެ. އެއާއެކު މިދިޔަ އަހަރުގެ ސެޕްޓެމްބަރު މަހު ލީޑްސްއިން ވަނީ މިދިޔަ ސީޒަނުގެ ނިޔަލަށް ބިއެލްސާ އެ ޓީމުގައި ބެހެއްޓުމަށް ނިންމާ އެއްބަސްވުން އާކޮށްފައެވެ.

އެ އެއްބަސްވުން މިދިޔަ ސީޒަން ނިމުމާއެކު ހަމަވެފައިވާއިރު، ލީޑްސްއިން ވަނީ ބުރާސްފަތި ދުވަހުގެރޭ ބިއެލްސާގެ އެއްބަސްވުން އަނެއްކާވެސް އާކުރިކަން އިއުލާން ކޮށްފައެވެ. ލީޑްސްއާއެކު ބިއެލްސާ މި ފަހަރުވެސް ހަދާފައިވަނީ އެއް އަހަރުގެ އެއްބަސްވުމެކެވެ. އެހެންކަމުން އެ އެއްބަސްވުމުގެ މުއްދަތު ހަމަވާނީ ކުރިއަށް އޮތް ސީޒަން ނިމުމުންނެވެ.

ހައި ޕްރެސް އެޓޭކިން ފުޓްބޯޅަ ކުޅުވުމުގައި މަޝްހޫރު ބިއެލްސާ ލީޑްސްގައި ރަނގަޅު މަސައްކަތްތަކެއް ކުރަމުން އަންނައިރު، މިދިޔަ ސީޒަނުގެ ޕްރިމިއާ ލީގުގައިވެސް އެ ޓީމުން ރަނގަޅު ނަތީޖާތަކެއް ނެރުނެވެ. އަދި މީގެ ކުރިން އާޖެންޓީނާ އާއި ޗިލީއަށްވެސް އިރުޝާދުދިން ބިއެލްސާގެ އިރުޝާދުގެ ދަށުން ލީޑްސްއިން މިހާތަނަށް ކުޅުނު 140 މެޗުގެ ތެރެއިން 74 މެޗުން އެ ޓީމު ވަނީ މޮޅުވެފައެވެ.