އިންޓަ މިލާނަށް ކުޅެމުން އައި ބެލްޖިއަމުގެ ފޯވާޑް ރޮމެލޫ ލުކާކޫ އަލުން އަނބުރާ ޗެލްސީއަށް ބަދަލުވެއްޖެއެވެ.

އުމުރުން 28 އަހަރުގެ ލުކާކޫ އަލުން ޗެލްސީއާ ގުޅުނީ 97.5 މިލިޔަން ޕައުންޑުގެ ފީއަކަށް، ފަސް އަހަރުގެ އެއްބަސްވުމެއްގެ ދަށުންނެވެ. އެއާއެކު ލުކާކޫ ވެފައިވަނީ ޗެލްސީގެ ތާރީޚުގައި އެންމެ އަގުބޮޑުކޮށް ގެނައި ކުޅުންތެރިޔާއަށެވެ. އަދި ލުކާކޫ އަކީ ޕްރިމިއާ ލީގުގެ ކުލަބަކުން ދެވަނައަށް އެންމެ އަގުބޮޑުކޮށް ހޯދި ކުޅުންތެރިޔާއެވެ. ޕްރިމިއާ ލީގުން މިހާތަނަށް އެންމެ ބޮޑު ޚަރަދެއް ކޮށްފައިވަނީ ދާދި ފަހުން އެސްޓަން ވިލާ ދޫކޮށް 100 މިލިޔަން ޕައުންޑަށް މެންޗެސްޓާ ސިޓީއަށް ބަދަލުވި އިންގްލެންޑުގެ މިޑްފީލްޑަރު ޖެކް ގްރީލިޝްއަށެވެ.

މީގެ އިތުރުން މި ޑީލާއެކު ލުކާކޫ ވެފައިވަނީ ޖުމްލަ ޓްރާންސްފާ ފީތަކަށް ބަލާއިރު ދުނިޔޭގެ އެންމެ އަގުބޮޑު ކުޅުންތެރިޔާއަށެވެ. އެގޮތުން ލުކާކޫގެ ހުރިހާ ޓްރާންސްފާ ފީތަކަށް ބަލާއިރު އޭނާގެ ޖުމްލަ އަގަކީ 291 މިލިޔަން ޕައުންޑެވެ. މީގެ ކުރިން ޖުމްލަ ޓްރާންސްފާ ފީތަކަށް ބަލާއިރު އެންމެ އަގުބޮޑު ކުޅުންތެރިއަކީ ބްރެޒިލުގެ ތަރި ނޭމާއެވެ. ނޭމާގެ ޓްރާންސްފާ ފީތަކުގެ ޖުމްލަ އަދަދަކީ 279 މިލިޔަން ޕައުންޑެވެ.

ލުކާކޫ ޗެލްސީއަށް ބަދަލުވިއިރު، މީގެ ކުރިން ދިން އިންޓަވިއުއެއްގައި އިންޓަގެ ސީއީއޯ ބެޕޭ މަރޯޓާ ވަނީ ލުކާކޫ ވިއްކުމުގެ ވިސްނުމެއް އެ ކުލަބުން ނުގެންގުޅޭ ކަމަށް ވިދާޅުވެފައެވެ. ނަމަވެސް ބޮޑު އަގުގައި އިންޓައިން ލުކާކޫ ވިއްކާލިއިރު، އޭނާއަކީ އިޓާލިއަން ލީގުގެ ކުލަބަކުން މިހާތަނަށް ވިއްކި އެންމެ އަގުބޮޑު ކުޅުންތެރިޔާއެވެ.

އިންޓަ ދޫކޮށް ލުކާކޫ ޗެލްސީއާ ގުޅުނުއިރު، އޭނާ މީގެ ކުރިންވެސް ވަނީ ޗެލްސީއަށް ކުޅެފައެވެ. އެގޮތުން 2011 ވަނަ އަހަރު ލުކާކޫ ޗެލްސީއާ ގުޅުނު ނަމަވެސް، އޭނާ އެ ފަހަރު އެ ޓީމަށް ކުޅެދީފައިވަނީ އެންމެ 15 މެޗެވެ. އަދި ޗެލްސީގެ އެއްބަސްވުމުގައި ހުރެ، ލުކާކޫ ވަނީ ދެ ސީޒަނެއްގައި ލޯން އެއްބަސްވުމެއްގެ ދަށުން ވެސްޓް ބްރޮމްވިޗް އަލްބިއަން އާއި އެވަޓަންއަށް ކުޅެފައެވެ.

މި ފަހަކަށް އައިސް ތަފާތު މޮޅު ކުޅުމެއް ދައްކަމުން އަންނަ ލުކާކޫ ވަނީ އިންޓައާއެކު މިދިޔަ ސީޒަނުގެ އިޓާލިއަން ލީގު ކާމިޔާބުކޮށްފައެވެ. އަދި އިންޓަގައި ހޭދަކުރި ދެ ސީޒަނުގައިވެސް ލުކާކޫ މޮޅު ކުޅުމެއް ދެއްކިއިރު، އޭނާ ވަނީ އެ ޓީމަށް ކުޅެދިން 95 މެޗުގައި 64 ލަނޑު ޖަހާފައެވެ.