ބެލްޖިއަމުގެ ފޯވާޑް ރޮމެލޫ ލުކާކޫ ގަންނަން ޗެލްސީން ހުށަހެޅި ދެވަނަ ބިޑުވެސް ބަލައިނުގަންނަން އިންޓަ މިލާނުން ނިންމާފައިވާ ކަމަށް ރިޕޯޓުތައް ބުނެފިއެވެ.
މެންޗެސްޓާ ޔުނައިޓެޑް ދޫކޮށް އުމުރުން 28 އަހަރުގެ ލުކާކޫ އިންޓައާ ގުޅުނީ 2019 ވަނަ އަހަރުގެ އޯގަސްޓް މަހުގެ ތެރޭގައި 74 މިލިޔަން ޕައުންޑަށެވެ. އެ ފަހަރު ލުކާކޫ ވަނީ އިންޓަ އާއެކު ފަސް އަހަރުގެ އެއްބަސްވުމެއް ހަދާފައެވެ. އެހެންކަމުން ލުކާކޫ މި ވަގުތު އިންޓަ އާއެކު ހަދާފައިވާ އެއްބަސްވުން ހަމަވާނީ 2024 ވަނަ އަހަރުގެ ތެރޭގައެވެ.
ރިޕޯޓުތައް ބުނާ ގޮތުން ޗެލްސީން މީގެ ކުރިންވެސް ވަނީ ލުކާކޫއަށް ބިޑް ކޮށްފައެވެ. އެކަމަކު އެ ބިޑް އިންޓައިން ބަލައިގެންފައެއް ނުވެއެވެ. އެއާއެކު ދާދި ފަހުން ޗެލްސީން ވަނީ ލުކާކޫ ގަންނަން 85 މިލިޔަން ޕައުންޑުގެ ބިޑެއް ކޮށްފައެވެ. ނަމަވެސް އެ ބިޑުވެސް ބަލައިނުގަންނަން އިންޓައިން މިހާރު ނިންމާފައިވާ ކަމަށް އިނގިރޭސި މީޑިއާތަކުން ވަނީ ރިޕޯޓުކޮށްފައެވެ.
ޗެލްސީގެ އިތުރުން ލުކާކޫ ހޯދުމަށް މަސައްކަތްކުރާ ކުލަބުތަކުގެ ތެރޭގައި މެންޗެސްޓާ ސިޓީ އާއި ބަޔާން މިއުނިކުވެސް ހިމެނެއެވެ. އެކަމަކު ދާދި ފަހުން ދިން އިންޓަވިއުއެއްގައި ލުކާކޫ ވަނީ ކުރިއަށް އޮތް ސީޒަނުގައިވެސް ފެންނާނީ އިންޓައިން ކަމަށް ބުނެފައެވެ.
ޔޫރޯ ފުޓްބޯޅަ މުބާރާތަށްފަހު އިންޓަގެ ފަރިތަކުރުންތަކުގައި ލުކާކޫ މިހާރު ބައިވެރިވަމުން އަންނައިރު، އިންޓަގެ ސީއީއޯ ބެޕޭ މަރޯޓާ ވިދާޅުވީ އެ ކުލަބުގެ އައު ކޯޗު ސިމޯން އިންޒާގީގެ ޕްލޭނުގެ ލުކާކޫ އަކީ މުހިންމު ކުޅުންތެރިއެއް ކަމަށާއި، އެހެންކަމުން ލުކާކޫ ވިއްކުމުގެ ވިސްނުމެއް އެ ކުލަބުން ނުގެންގުޅޭ ކަމަށެވެ.
މިދިޔަ ސީޒަނުގައި އިންޓައިން އިޓާލިއަން ލީގުގެ ޗެމްޕިއަންކަން ހޯދިއިރު، ލީގުގައި ލުކާކޫ ވަނީ ތަފާތު މޮޅު ކުޅުމެއް ދައްކާފައެވެ. އަދި އިންޓަގައި ހޭދަކުރި ދެ ސީޒަނުގައި ލުކާކޫ މޮޅު ކުޅުމެއް ދެއްކިއިރު، އޭނާ ވަނީ އެ ޓީމަށް މިހާތަނަށް ކުޅެދިން 95 މެޗުގައި 64 ލަނޑު ޖަހާފައެވެ.
