އަންގާރަ ދުވަހު 523 މީހުން ވެކްސިންގެ ދެ ޑޯޒު ފުރިހަމަކޮށްފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

އެޗްޕީއޭއިން ބުނީ އަންގާރަ ދުވަހު 94 މީހުން ވެކްސިންގެ ފުރަތަމަ ޑޯޒު ޖަހާފައިވާ ކަމަށެވެ. އެއީ މާލެ ސަރަހައްދުން ވެކްސިން ޖެހި 4 މީހުންނާއި، އަތޮޅުތެރެއިން ވެކްސިން ޖެހި 90 މީހުންނެވެ. އަދި 523 މީހުން ވެކްސިންގެ ދެވަނަ ޑޯޒު ޖަހާފައިވާއިރު، އެއީ މާލެ ސަރަހައްދުން ވެކްސިން ޖެހި 12 މީހުންނާއި، އަތޮޅުތެރެއިން ވެކްސިން ޖެހި 511 މީހުންނެވެ.

ތަފާސްހިސާބުތައް ދައްކާގޮތުން މިހާތަނަށް 321،523 މީހުން ވެކްސިންގެ ފުރަތަމަ ޑޯޒު ޖަހާފައިވެއެވެ. އަދި 262،128 މީހުން ވަނީ ދެވަނަ ޑޯޒު ފުރިހަމަކޮށްފައެވެ.

ރާއްޖޭގެ އާބާދީގެ ބޮޑު އިންސައްތަ އަކަށް ވެކްސިން ދިނުމަށް ޚާއްސަ މަސައްކަތްތަކެއް ކުރަމުންދާއިރު، އަދިވެސް އާބާދީގެ 27 އިންސައްތަ މީހުން ވެކްސިނުގެ އެއްވެސް ޑޯޒެއް ނުޖަހާ ކަމަށް ހެލްތް އިމަރޖެންސީ އޮޕަރޭޝަން ސެންޓަރު (އެޗްއީއޯސީ)ން ބުނެފައިވެއެވެ. ވެކްސިން ޖެހުމަކީ ގައުމީ ކަމެއް ކަމުގައި ދެކި ގައުމީ އެހެން ކަންކަމުގައި ވެސް އެންމެން ގުޅިގެން މަސައްކަތް ކުރާ ގޮތަށް މިކަމުގައި ވެސް ހުރިހާ ރައްޔިތުންގެ އެއްބާރުލުން ދިނުމަށް އެދޭ ކަމަށް އެޗްއީއޯސީން އިލްތިމާސްކޮށްފައިވެއެވެ.

ކޮވިޑް-19 ބަލިމަޑުކަމުން ރައްކާތެރިވެ އާންމު ހާލަތަށް ދިއުމަށް ލިބިފައިވާ އެންމެ މުހިއްމު ހަތިޔާރަކީ ވެކްސިިނެވެ. ރާއްޖެއަށް މިވަގުތު އެކަށީގެންވާ މިންވަރަށް ވެކްސިން ލިބިފައިވާކަމަށާއި އެއްވެސް ދަތިކަމެއްނެތި ވެކްސިން ޖެހުމުގެ ކަންކަން ކުރިޔަށް ދާނެކަމަށް ސަރުކާރުން ބުނެފައިވެއެވެ. ސަރުކާރުގެ އެންމެ ފުރަތަމަ އަމާޒަކީ، ރާއްޖޭގައި އުޅޭ އެންމެންގެ ތެރެއިން، ވެކްސިން ޖަހާ އުމުރުގެ 90 އިންސައްތަ މީހުންނަށް، މިފެށޭ އޮގަސްޓް މަހުގެ ނިޔަލަށް، ވެކްސިން ޖަހައި ނިންމުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވެސް ވަނީ ވިދާޅުވެފައެވެ.

އަންނަ ބުދަ ދުވަހުން ފެށިގެން، ޗައިނާގެ ސިނޮފަރމް ވެކްސިންގެ ދެވަނަ ޑޯޒު ޖަހަން ފަށާނެކަމަށް އެޗްޕީއޭއިން ބުނެފައިވެއެވެ. ބޮޑު އީދު ބަންދާ ގުޅިގެން ވެކްސިން ޖެހުން މެދުކަނޑާލުމަށްފަހު، އަލުން ވެކްސިން ޖެހުމަށް ނިންމާފައިވާއިރު، މިކަމާ ގުޅިގެން އެޗްޕީއޭއިން ބުނީ ސިނޮފަރމް ވެކްސިންގެ ދެވަނަ ޑޯޒް ޖެހުމުގެ ފުރުސަތު ހުޅުވައިލާނީ ވެކްސިންގެ ފުރަތަމަ ޑޯޒު ޖެހިތާ ތިން ހަފުތާ ވެފައިވާ މީހުންނަށް ކަމަށެވެ.

ބުދަ ދުވަހުގެ ހެނދުނު 9:00ން 11:00ށް ވެކްސިން ޖެހުމުގެ ކަންތައްތައް ކުރިއަށް ގެންދާނީ ސެނެހިޔާ ހޮސްޕިޓަލުގައެވެ. އެޗްޕީއޭގެ ޑެޕިއުޓީ ޑިރެކްޓަރ ޖެނެރަލް ތަސްލީމާ ޢުޘްމާން ރާއްޖެއެމްވީއަށް ވިދާޅުވީ، އީދު ބަންދާއެކު ސަރުކާރުން ދީފައިވާ ބޮޑު ޗުއްޓީއަށް ވެކްސިން މެދުކަނޑާލުމަށް ފަހު، ދެން ވެކްސިން ޖެހުން ރަސްމީކޮށް ހުޅުވާލާނީ ޖުލައި 26ގެ ބަންދަށް ފަހު މި މަހުގެ 30 ވަނަ ދުވަހު ކަމަށެވެ.