މެއި މަހުގެ ހަވަނަ ދުވަހު ރައީސް ނަޝީދަށް އަމާޒުކޮށް، ދިން ހަމަލާގެ ތުހުމަތު ކުރެވޭ 4 މީހުންގެ ތަހުގީގު ނިންމައި، ދައުވާ ކުރަން ފޮނުވައިފިއެވެ.

ޕްރޮސެކިއުޓަރ ޖެނެރަލް ޙުސައިން ޝަމީމް ވިދާޅުވީ، ތަހުގީގު ރިޕޯޓުތައް ލިބިފައިވާ ކަމަށާއި، އިތުރު ހެކިތައް ހޯދުމުގެ މަސައްކަތް އަދިވެސް ކުރިއަށްދާނެ ކަމަށެވެ. އެމީހުންގެ މައްޗަށް ދައުވާ ކުރުމާމެދު ގޮތެއް ނިންމުމަށް 15 ދުވަހުގެ މުއްދަތެއް ލިބޭނެ ކަމަށްވެސް ޝަމީމް ވިދާޅުވިއެވެ.

އިތުރު ތަފްސީލްތަކާއެކު މިމަހުގެ 24ވަނަ ދުވަހު ފުލުހުން ބާއްވާ ނޫސްވެރިންގެ ބައްދަލުވުމުގައި ބައިވެރިވެވަޑައިގަންނަވާނެ ކަމަށްވެސް ޝަމީމު ވިދާޅުވިއެވެ.

ދައުވާކުރަން ފޮނުވާފައިވަނީ ހަމަލާގައި އަމަލީ ގޮތުން ބައިވެރިވި ކަމުގެ ތުހުމަތުގައި ހައްޔަރުކޮށްފައިވާ އަޙުމަދު އަދުހަމް 25އ އާއި، މުޖާޒް އަޙުމަދު 21އ އާއި، ތަހުމީން އަޙުމަދު 32އ އާއި، އަދި އަޙުމަދު ފާތިޙު 23އ ގެ މައްޗަށެވެ.

ޓެރަރިޒަމް ގާނޫނުގައިވާ ގޮތުން ހަމަލާއާ ގުޅިގެން ހައްޔަރުކުރި މީހުންގެ މައްޗަށް ދައުވާ އުފުލަން 75 ދުވަހުގެ މުއްދަތެއް ލިބޭނެއެވެ. މި މުއްދަތު ހަމަވާނީ އޮގަސްޓްމަހުގެ 5ވަނަ ދުވަހަށެވެ. އެންމެ ފަހުން ބޭއްވި މީޑިއާ ބްރީފިންގގައި ޕީޖީ ޝަމީމް ވިދާޅުވެފައިވަނީ ތަހުގީގު ކުރިއަށްގެންދާ ގޮތް ކޮންމެ ދުވަހަކުވެސް އަދާހަމަ ކުރައްވާ ކަމަށާއި، ކަނޑައެޅިފައިވާ މުއްދަތުގެ ތެރޭގައި ދައުވާ އުފުލޭނެ ކަމުގެ ޔަގީންކަން އެބައޮތް ކަމަށެވެ.

މި ހަމަލާއާ ގުޅިގެން ރައްޔިތުންގެ މަޖިލީހުންވަނީ ޚާއްސަ އިންކުއަރީއެއްވެސް ހަދާފައެވެ. އެ އިންކުއަރީގައިވެސް ގިނަ ކަންބޮޑުވުންތަކެއްވަނީ ފާހަގަކޮށްފައެވެ.

ރައީސް ނަޝީދަށް ދިން ހަމަލާއާ ސީދާ ގުޅުންހުރި 4 މީހުންނަކީ ވެސް ހަރުކަށި ފިކުރުގެ މީހުންކަން ޔަގީންކުރެވޭ ކަމަށް ފުލުހުންވަނީ ބުނެފައެވެ.