އޭއެފްސީ ކަޕްގެ ގްރޫޕް ސްޓޭޖުގައި ބެންގަލޫރު އެފްސީއަތުން ޑާކާ އަބަހާނީ މޮޅުވި މެޗަށްފަހު އެޓީމު އޮތީ އިތުބާރާއެކު ކަމަށާއި، މާޒިޔާ ސްޕޯޓްސް އެންޑް ރެކްރިއޭޝަން ބަލިކުރެވޭނެކަމަށް އަބަހާނީގެ ކޯޗު ޑްރެގޯ މަމިކް ބުނެފި އެވެ.
މެޗުގެ ކުރިން ގަލޮޅު ދަނޑުގައި ބޭއްވި ނުސްވެރިންގެ ބައްދަލުވުމުގައި މަމިކް ބުނީ މިދިޔަ އަހަރު އޭއެފްސީ ކަޕްގެ ދެވަނަ ހޯދި ބެންގަލޫރް ޓީމު ބަލިކުރެވުމަކީ ވަރަށް ބޮޑު ކާމިޔާބީއެއް ކަމަށް ދެކޭ ކަމަށާއި، އެ މެޗަށްފަހު ޓީމު މިހާރު އޮތީ ވަރަށް އިތުބާރާ އެކުގައި ކަމަށެވެ.
މަމިކް ބުނީ މާޒިޔާ އާއި އަބާނީ ބަންގްލަދޭޝްގައި ކުޅުނު މެޗުގެ ކުރިން އޭނާ އަށް ޓީމު ތައްޔާރުކުރަން ލިބުނީ އެންމެ ހަތް ދުވަސް ކަމަށާއި، އެހެންނަމަވެސް މިހާރު ކުރީގެ ހާލަތާ އަޅާބަލާއިރު، ވަރަށް ގިނަ ކަންތައްތައް ރަނގަޅުކޮށްފައިވާ ކަމަށެވެ.
މީގެއިތުރުން އޭނާ ބުނީ ޓީމުގައި އަނިޔާގެ މައްސަލަތައް އެބަހުރި ކަމަށާއި، އެހެންނަމަވެސް މެޗުން ރަނގަޅު ނަތީޖާއެއް ހޯދަން މަސައްކަތްކުރާނެ ކަމަށެވެ.
މާޒިޔާ އިން ކައިރި ކައިރީގައި މެޗުތައް ކުޅެފައިވާކަން ފާހަގަކުރަމުން މަމިކް ބުނި އަބާނީ އަށް އެ ފުރުސަތު ލިބިފައިނުވާ ކަމަށާއި، މާޒިޔާ މެޗުގެ ކުރިން އެޓީމަށް ކުޅެން ލިބުނީ އެފްއޭ ކަޕްގެ މެޗެއް ކަމަށެވެ. އޭނާ ބުނި ރާއްޖޭ ލީގުގެ ފުރަތަމަ ބުރު ނިމިފައިވާއިރު، ބަންގްލަދޭޝްގައި އަދި ލީގުގެ ކުޅުން ފަށާފައިވެސް ނުވާ ކަމަށެވެ. އެގޮތުން މިއީ މާޒިޔާއަށް ލިބޭނެ ފައިދާއެއްކަމަށްވެސް އޭނާ ވަނީ ފާހަގަކޮށްފައެވެ.
ގައުމީ ޓީމުގައި ހުރިއިރު ބައެއް ކްލަބްތަކުގެ ކުޅުންތެރިން ދަސްކޮށްފައިވާކަން ފާހަގަކުރަމުން މަމިކް ބުނީ އޭނާއާ މާޒިޔާގެ ޓީމާ ބެހޭގޮތުން ހިޔާލު ހޯދުމުން އެދުނީ އިސްކޮޅުން ދިގު ގޯލު ކީޕަރަކާއި، ބިދޭސީ ޑިފެންޑަރުން ހޯދުން ކަމަށާއި، އެގޮތުން މިހާރު އެކަން ފުރިހަމަކޮށް އޭއެފްސީކަޕްގައި އެޓީމު މޮޅު ކުޅުމެއް ދައްކަމުން އަންނަކަމަށެވެ.
މަމިކް ބުނީ މާޒިޔާގެ ކުރިޔަށް ކުޅޭ އަސަދުﷲ އަބްދުﷲ އާއި މުހައްމަދު އުމެއިރު އަކީ އޭޝިއާގައިވެސް ފާހަގަކޮށްލެވޭ ދެ ކުޅުންތެރިން ކަމަށާއި، އެ ދެ ކުޅުންތެރިންގެ ސަބަބުން ކްލަބަށް އަދި ގައުމީ ޓީމަށްވެސް ފައިދާކުރާނެ ކަމަށް އޭނާ ވަނީ ބުނެފައެވެ.
އޭއެފްސީ ކަޕްގައި އަބާނީ ކުޅުނު ހަތަރު މެޗުގެ ތެރެއިން ތިން މެޗުން އެޓީމު ބަލިވެފައިވާއިރު، އެއް މެޗުން އެޓީމު ވަނީ މޮޅުވެފައެވެ. އެގޮތުން އެޓީމު އޮތީ ތިން ޕޮއިންޓާއެކު ލަނޑުގެ ތަފާތުން ގްރޫޕްގެ ފުލުގައެވެ.
