ތުރުކިމިނިސްތާނުން އަފްޣާނިސްތާނާ ގުޅޭ ބޯޑަރުގެ ސެކިއުރިޓީ ވަރުގަދަކޮށްފިއެވެ.
ރިޕޯޓްތައް ބުނާ ގޮތުން ތުރުކިމިނިސްތާނުން އަފްޣާނިސްތާނާ ގުޅޭ ބޯޑަރުގެ ސަރަހައްދުގެ ސެކިއުރިޓީ ވަރުގަދަކުރުމުގެ ގޮތުން އެ ސަރަހައްދަށް އެ ގައުމުގެ ސިފައިންގެ ފައުޖެއް ވަނީ ފޮނުވާފައެވެ. ނަމަވެސް އެއީ ކިހާ އަދަދެއްގެ ސިފައިން ކަމެއް މިހާތަނަށް އެގައުމުން ހާމަކޮށްފައެއް ނުވެއެވެ.
ތުރުކިމިނިސްތާނުން އަފްޣާނިސްތާނާ ގުޅޭ ބޯޑަރުގެ ސެކިއުރިޓީ ވަރުގަދަކޮށްފައި މިވަނީ އަފްޣާނިސްތާނުގެ ސަރުކާރުން، އެގައުމުގައި ހިނގާ ހަމަނުޖެހުމުގެ އަސަރު އަވަށްޓެރި ގައުމުތަކަށް ނުކުރާނެ ކަމަށް ބުނެފައިވަނިކޮށެވެ. މީގެ އިތުރުން އަފްޣާނިސްތާނުގައި ހަރަކާތްތެރިވާ ޠާލިބާން ޖަމާއަތުން ވެސް ވަނީ އެ ގައުމުގައި ހިނގާ ހަމަނުޖެހުމުގެ އަސަރު އިތުރު ގައުމަކަށް ނުކުރާނެ ކަމަށް ބުނެފައެވެ.
ތުރުކިމިނިސްތާނުގެ އިތުރުން ތަޖަކިސްތާނުން ވެސް ވަނީ އަފްޣާނިސްތާނާ ގުޅޭ ބޯޑަރުގެ ސަރަހައްދުގެ ސެކިއުރިޓީ ވަރުގަދަ ކޮށްފައެވެ. އެގޮތުން ތަޖަކިސްތާނުން ވަނީ 5000ށްވުރެ ގިނަ ސިފައިން ބޯޑަރު ސަރަހައްދު ބެލެހެއްޓުމަށް ފޮނުވާފައެވެ.
އަފްޣާނިސްތާނާ އިންވެގެން އޮންނަ ގައުމުތަކުން އެގައުމާ ގުޅޭ ބޯޑަރުގެ ސަރަހައްދުގެ ސެކިއުރިޓީ ވަރުގަދަކޮށްފައި މިވަނީ އަފްޣާނުން އެމެރިކާ ސިފައިން ފައިބަމުންދާ ދަނޑިވަޅުގައެވެ.
