ރައީސުލްޖުމްހޫރިއްޔާ ތިލަދުންމަތީ ދެކުނުބުރީގެ ބައެއް ރަށްރަށަށް ވަޑައިގަތުމަށް ދަތުރުފުޅެއް ހަމަޖައްސަވައިފިއެވެ.

ރައީސް އޮފީހުން ބުނީ އެމަނިކުފާނު ވަޑައިގަންނަވަނީ ހދ. ކުމުންދޫއާއި ހދ. ހަނިމާދޫއަށް ކަމަށެވެ. އެ ރަށްރަށަށް ވަޑައިގަންނަވަނީ މިމަހުގެ 16ން 18ށް ކަމަށް ރައީސް އޮފީހުން ބުނެއެވެ. ރައީސް އޮފީހުން ބުނީ ރައީސް ސާލިހުގެ ސިޔާސަތަކީ ރައްޔިތުންނާ ގާތުން މަސައްކަތްކޮށް، ކައުންސިލްތަކުގެ ބައިވެރިވުމާއެކު ތަރައްގީގެ މަޝްރޫއުތަކާއި ޚިދުމަތްތައް ފޯރުކޮށްދިނުން ކަމަށެވެ. އެގޮތުން މި ދަތުރަކީވެސް ރައީސްގެ މި ސިޔާސަތުގެ ތެރެއިން ކުރައްވާ ދަތުރުފުޅެއް ކަމަށް ބުނެފައިވެއެވެ.

ކޮވިޑް-19 ގެ ބަލިމަޑުކަން ކުރިމަތިވުމާ ހަމައަށް، ރައީސުލްޖުމްހޫރިއްޔާ ގިނަ ކައުންސިލްތަކަކާ ބައްދަލުކުރައްވާފައިވާކަން ރައީސް އޮފީހުން ފާހަގަކުރިއެވެ. މިގޮތުން، މިހާތަނަށް ޖުމްލަ 127 ބައްދަލުވުމެއް ލޯކަލް ކައުންސިލްތަކާއެކު ބާއްވަވައި، 69 ރަށަކަށް އެމަނިކުފާނު ޒިޔާރަތްކުރައްވާފައިވާ ކަމަށް ވެސް ބުނެފައިވެއެވެ.

ކޮވިޑް ފެތުރުން ކޮންޓްރޯލް ކުރެވި، ހާލަތަށް އައިސްފައިވާ ބަދަލާ އެކު، އިތުރު ރަށްރަށަށް ޒިޔާރަތްކުރައްވާ، ތަރައްގީގެ މަޝްރޫއުތަކާ އަދި ރައްޔިތުންގެ ކަންބޮޑުވުންތައް އެ މަނިކުފާނު ގާތުން ބައްލަވަމުން ގެންދަވާނެ ކަމަށް ވެސް ރައީސް އޮފީހުން ބުނެފައިވެއެވެ.