އިޓަލީގެ އުދިނޭޒީއަށް ކުޅެމުންދިޔަ އާޖެންޓީނާގެ މިޑްފިލްޑަރު ރޮޑްރީގޯ ޑެ ޕޯލް ސްޕެއިނުގެ ޗެމްޕިއަން އެތުލެޓިކޯ މެޑްރިޑަށް ސޮއިކޮށްފިއެވެ.
އުމުރުން 27 އަހަރުގެ މިޑްފިލްޑަރު އެތުލެޓިކޯއާ ގުޅުނީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އޭނާ ގަތުމަށް އެތުލެޓިކޯއިން 40 މިލިއަން ޑޮލަރު ވަނީ ހަރަދުކޮށްފައެވެ.
އެތުލެޓިކޯއަށް ބަދަލުވުމަށްފަހު ޑެ ޕޯލް ބުނީ އޭނާ ހުރީ ވަރަށް އުފަލުން ކަމަށާއި، އެތުލެޓިކޯއަކީ ސްޕެއިންގެ ގަދަ ބާރެއް ކަމަށެވެ. އަދި މިއީ ކެރިޔަރުގައި ލިބުނު ބޮޑު ކުރިއެރުމެއް ކަމަށް ޑެ ޕޯލް ބުންޏެވެ.
އާޖެންޓީނާގެ ރޭސިން ކްލަބުން ކެރިޔަރުފެށި ޑެ ޕޯލް އެންމެ ފުރަތަމަ ގުޅުނު ޔޫރަޕްގެ ކްލަބަކީ ސްޕެއިނުގެ ވެލެންސިއާ އެވެ. އެ ޓީމުގައި ދެ އަހަރު ހޭދަކުރިއިރު، އެއް ސީޒަނުގައި ލޯނަކަށް ކުރީގެ ޓީމު ރޭސިން އަށް ކުޅުނެވެ. އޭގެ ފަހުން 2016 ވަނަ އަހަރު އުދިނޭޒީ އަށް ކުޅެން ފަށައި މިދިޔަ ސީޒަނުގެ ނިޔަލަށް އެ ޓީމަށް ގިނަ މެޗުތަކެއް ކުޅުނެވެ.
މި ފަހަރުގެ ކޮޕަ އެމެރިކާ ކާމިޔާބުކޮށް 28 އަހަރަށް ފަހު ބޮޑު މުބާރާތެއްގެ ތަށި ހޯދި އާޖެންޓީނާ ޓީމުގައި މުހިއްމު ދައުރެއް އަދާކުރި ޑެ ޕޯލްގެ އިތުރުން ލަޓާރޯ މާޓީނޭޒް ގެންނަން ވެސް އެތުލެޓިކޯ އިން އަންނަނީ މަސައްކަތް ކުރަމުންނެވެ.
އެތުލެޓިކޯ އިން ދެން މަޝްވަރާ ކުރަމުން އަންނަ ޑީލަކީ އެ ޓީމަށް ކުރިން ކުޅުނު އެންޓޮއިން ގްރީޒްމަން އަލުން ގެންނަން ކުރާ މަސައްކަތެވެ. ބާސެލޯނާ އިން އެ ކްލަބްގެ މުސާރަ ކަންތައްތައް ހަމަޔަކަށް އަޅުވަން މަސައްކަތް ކުރުމުގެ ތެރެއިން ގްރީޒްމަން ދޫކޮށްލާނެ ކަމަށް ވަރަށް ބޮޑަށް ބެލެވެއެވެ.
