ބްރޫޝިއާ ޑޯޓުމުންޑަށް ކުޅެމުން އަންނަ ނޯވޭގެ ޒުވާން ފޯވާޑް އާލިން ބްރައުޓް ހާލަންޑް ގަތުމަށް ޗެލްސީން 150 މިލިޔަން ޕައުންޑް ޚަރަދުކުރަން ތައްޔާރަށް އޮތް ކަމަށް ރިޕޯޓުތައް ބުނެފިއެވެ.

މިދިޔަ އަހަރުގެ ޖެނުއަރީ މަހު އާރްބީ ސާލްޒްބާގް ދޫކޮށް، އުމުރުން 20 އަހަރުގެ ހާލަންޑް ޑޯޓްމުންޑަށް ބަދަލުވީ ހަތަރު އަހަރާ ބައިގެ އެއްބަސްވުމެއްގެ ދަށުން، 20 މިލިޔަން ޔޫރޯއަށެވެ. އެހެންކަމުން ހާލަންޑުގެ އެއްބަސްވުން ހަމަވާނީ 2024 ވަނަ އަހަރުގެ ޖޫން މަހުއެވެ.

މީގެ ކުރިން ދިން އިންޓަވިއުއެއްގައި ހާލަންޑުގެ އޭޖެންޓް މިނޯ ރައިއޯލާ ވަނީ މި ދަނޑިވަޅުގައި ހާލަންޑް ގަތުމުގެ ފެންވަރު ހުރީ 10 ކުލަބެއްގައި ކަމަށާއި، އޭގެ ތެރެއިން ހަތަރު ކުލަބަކީ ޕްރިމިއާ ލީގުގެ ކުލަބުތައް ކަމަށް ބުނެފައެވެ.

ރިޕޯޓުތައް ބުނާ ގޮތުން ޗެލްސީން އޮތީ ހާލަންޑް ހޯދުމަށް 150 މިލިޔަން ޕައުންޓް ޚަރަދުކުރުމަށް ތައްޔާރަށެވެ. އެގޮތުން ހާލަންޑް ގަތުމަށް ޗެލްސީން އޭނާގެ އެޖެންޓާ ވާހަކަ ދައްކާފައިވާ ކަމަށާއި، މިހާރު ޗެލްސީން ކުރަމުން އަންނަ މަސައްކަތްތަކަކީ ޑޯޓުމުންޑުގެ ވެރިންނާ ވާހަކަ ދެއްކުން ކަމަށްވެސް ރިޕޯޓުތައް ބުނެއެވެ.

މި ހޫނު މޫސުމުގެ ޓްރާންސްފާގައި ހާލަންޑް ގަތުމަށް ޔޫރަޕުގެ ބޮޑެތި ކުލަބުތަކުން މަސައްކަތްކުރަމުން އަންނައިރު، އޭގެ ތެރޭގައި ޗެލްސީގެ އިތުރުން އިނގިރޭސި ޕްރިމިއާ ލީގުގެ ޗެމްޕިއަން މެންޗެސްޓާ ސިޓީ އާއި، މެންޗެސްޓާ ޔުނައިޓެޑް އަދި ލިވަޕޫލުވެސް ހިމެނެއެވެ. އަދި އޭނާއަށް ސްޕެއިނުގެ ގަދަ ދެ ބާރު ކަމަށްވާ ބާސެލޯނާ އާއި ރެއާލް މެޑްރިޑުންވެސް އަންނަނީ ފާރަލަމުންނެވެ. ހާލަންޑް ގަތުމަށް ޔޫރަޕުގެ ބޮޑެތި ކުލަބުތަކުން މަސައްކަތްކުރި ނަމަވެސް، މި ހޫނު މޫސުމުގައި ހާލަންޑް ވިއްކާނަމަ، އޭނާ ވިއްކަން ޑޯޓްމުންޑުން ކަނޑައަޅާފައިވާ އަގަކީ 180 މިލިޔަން ޔޫރޯ ކަމަށް ރިޕޯޓުތައް ބުނެއެވެ.

ޑޯޓްމުންޑާއެކު ހާލަންޑް ތަފާތު މޮޅު ކުޅުމެއް ދައްކަމުން އަންނައިރު، އޭނާ ވަނީ މިހާތަނަށް ޑޯޓްމުންޑަށް ކުޅެދިން 59 މެޗުގައި 57 ލަނޑު ޖަހާފައެވެ. އަދި އޭނާ ވަނީ ޑޯޓްމުންޑާއެކު މިދިޔަ ސީޒަނުގެ ޖަރުމަން ކަޕް ކާމިޔާބުކޮށްފައެވެ.