ޕާކިސްތާނުގައި މަތީ ތައުލީމު ހާސިލްކުރާ ދަރިވަރުން ހޯލަށް ގޮސް ޓެސްޓު ހެދުމާއި ދެކޮޅަށް ކުރި އިހުތިޖާޖު އެގައުމުގެ ފުލުހުން ރޫޅާލައިފިއެވެ.
ރިޕޯޓްތައް ބުނާ ގޮތުން ކޮވިޑް-19 ގެ މިދަނޑިވަޅު ހޯލަށް ގޮސް ޓެސްޓު ހެދުމާއި ދެކޮޅަށް އެގައުމުގެ އެތަށް ސަތޭކަ ދަރިވަރުންތަކެއް ވަނީ ނުކުމެ އިހުތިޖާޖު ކޮށްފައެވެ. އެގޮތުން އެގައުމުގެ ހަޔަރ އެޑިއުކޭޝަން ކޮމިޝަނުގެ ކުރިމަތީގައި އިހުތިޖާޖު ކުރަން ފެށުމާއިއެކު ފުލުހުން ވަނީ އެއްވުން ރޫޅާލާފައެވެ.
އިހުތިޖާޖުގައި ބައިވެރިވި ދަރިވަރުން ވަނީ އެގައުމުގެ ހަޔަރ އެޑިއުކޭޝަން މިނިސްޓަރު ޝަފާގަތް މަހްމޫދުގެ އިސްތިއުފާއަށްވެސް ގޮވާލާފައެވެ.
އިހުތިޖާޖުގައި ބައިވެރިވި ދަރިވަރަކު ބުނީ ކޮވިޑްގެ މިހާލަތުގައި ކިޔެވުން ކުރިޔަށް ގެންގޮސްފައިވަނީ އޮންލައިންކޮށް ކަމަށާއި، ހޯލަށް ގޮސް ޓެސްޓު ހަދަން އެންގީ ދަރިވަރުންތަކެއް ނުރައްކަލަށް ލުމުގެ ބޭނުމުގައި ކަމަށެވެ.
ފުލުހުން ބުނީ މި އިހުތިޖާޖު ރޫޅާލީ މަގުމަތީގެ ޓްރެފިކަށް އިހުތިޖާޖުގެ ސަބަބުން ބާރުބޮޑުވުމާއިއެކުގައި ކަމަށެވެ. އަދި ކޮވިޑްގެ މިހާލަތުގައި ދަރިވަރުންތަކެއް ނުކުމެ އިހުތިޖާޖު ކުރުމަކީ ބަލައިގަނެވޭނެ ކަމެއް ނޫން ކަމަށް އެގައުމުގެ ފުލުހުން ވަނީ ބުނެފައެވެ.
