ޤަޟާޤަދަރަށް އީމާންވާ މީހަކު ހަޔާތް ހޭދަކުރަމުންދާނީ ހިތްހަމަޖެހުމާ އެކު ކަމަށާއި، ފިތުނައިން އެފަދަ މީހަކު ގުޑުގުޑުއަޅައިގެން ނުދާނެ ކަމަށް ހުކުރު ޚުތުބާގައި ބުނެފިއެވެ.
"މިންވަރަށް އީމާންވުން" މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ ޤަޟާޤަދަރަށް އީމާންވާ މީހަކު އޭނާގެ ހަޔާތް ހޭދަކުރަމުންދާނީ ހިތްހަމަޖެހުމާ އެކު ކަމަށެވެ. ދަތި އުނދަގޫކަމެއް ދިމާވުމުން އެފަދަ މީހަކު ބަލިކަށިވެގެން ނުދާނެ ކަމަށާއި، މިންވަރަށް އީމާންވުމުގެ ސަބަބުން އަޅާއަށް، ސުވަރުގެ ވަނުމަށް މަގު ފަހިވެގެންދާނެ ކަމަށް ޚުތުބާގައި ބުނެފައިވެއެވެ. އަދި އީމާންކަން ހަރުދަނާވެ ތާޒާވުމަކީ ހިތުގެ ސާބިތުކަން ވަރުގަދަވެ، ހަޔާތަށް އާރޯކަން ލިބި، އަމާންކަމާއި އުފާވެރިކަން ވެރިވެގެންދާ ކަމެއް ކަމަށެވެ.
ޚުތުބާގައި ބުނި ފެންނަ ތަކެއްޗާއި، ނުފެންނަ ތަކެތީގައި ވެސް މާތް ﷲގެ ކުޅަދުންވަންތަކަމާއި، ދެނެވޮޑިގަތުން ޝާމިލުވާ ކަމަށާއި، ވަންހަނާ ވެފައިވާ ކަންތައްތަކާއި، އަޅާގެ ހިތުގައި ހިނގާ ވަސްވާސްތައް ވެސް އެކަލާނގެ ދެނެވޮޑިގެންވާ ކަމަށެވެ. އަދި ވެގޮސްފައިވާ ކަންތައްތަކާއި، ވަމުންދާ ކަންތައްތަކާއި، ވާނޭކަންތައްތައް ވެސް އެކަލާނގެ ދެނެވޮޑިގެންވާއިރު، މާތް ﷲ ގެ އިލްމުފުޅާ ލައިގެން މެނުވީ އެއްވެސް ކަމެއް ނުހިނގާނެ ކަމަށް ޚުތުބާގައި ބުނެފައިވެއެވެ.
ހައްގު ގޮތުގައި މާތް ﷲ އަށް ތަގުވާވެރިވާވެރިވުމަށް ގޮވާލައި ހުކުރު ޚުތުބާގައި ބުނީ އަމާންކަމުގެ އަސާސަކީ އެއީ ކަމަށާއި، މަތިވެރިކަމާއި ދަރަޖަ އުފުލިގެން ދަނީ ތަޤްވާގެ ސަބަބުން ކަމަށެވެ. ތަޤްވާގެ އަސާސްގެ ތެރޭގައި އަމަލުތައް އެކަންކަމެއްގެ މައްޗަށް ބިނާވެގެންވާ ހަ އުސޫލަށް އީމާންވުން ހިމެނޭ ކަމަށް ޚުތުބާގައި ބުނެފައިވެއެވެ.
މާތް ﷲ ވަޙީކުރައްވާފައި ވެއެވެ. މާނައީ: "ރަސޫލާއަށް، އެކަލޭގެފާނުގެ ވެރި ރަސްކަލާނގެ ޙަޟްރަތުން ބާވައިލެއްވި އެއްޗަކަށް (އެބަހީ: ކީރިތި ޤުރްއާނަށް) ރަސޫލާ އާއި، މުއުމިނުން އީމާންވެއެވެ. އެ އެންމެން މެ ﷲ އާއި، އެކަލާނގެ މަލާއިކަތުންނާއި، އެކަލާނގެ ބާވައިލެއްވި) ފޮތްތަކާއި، އެކަލާނގެ ފޮނުއްވި ރަސޫލުންނަށް އީމާންވޫއެވެ. (އެއުރެން ބުނެއެވެ.) ތިމަންމެން، އެކަލާނގެ ރަސޫލުންގެ ތެރެއިން އެކަމާމެދު ވެސް ތަފާތެއް ނުކުރަމުއެވެ. އަދި، އެއުރެން ބުނޫއެވެ. ތިމަންމެން އަހައި ކިޔަމަންވެއްޖައީމެއެވެ. އަޅަމެންގެ ވެރި ރަސްކަލާކޯއެވެ! އަޅަމެންގެ ފާފަ ފުއްސަވައިފާނދޭވެ! އަދި، އެނބުރި ދިއުން ވަނީ، އިބަ ރަސްކަލާނގެ ޙަޟްރަތަށެވެ."ހުކުރު ޚުތުބާ
މާތް ﷲ އަމުރު ކުރައްވާފައިވާ ކަންތައްތައް ދޫކޮށްލައިގެން ނުވާނެކަން ފާހަގަކޮށް ޚުތުބާގައި ބުނީ ހެޔޮކަންތައްތަކަށް ގޮވާލުމާއި ނުބައި ނޭދެވޭ ކަންތައްތައް ހުއްޓުވުމަށް މަސައްކަތް ކުރަންޖެހޭ ކަމަށެވެ. ޚުތުބާގައި ބުނީ އިސްލާމީ ޝަރީއަތުގައި ވާގޮތަށް ހަރާމްކަންތައް ހަރާމްކަމުގައި ބަލައިގަންނަން ޖެހޭ ކަމަށާއި، ހަލާލުކަންތައް ހަލާލު ކަންތައް ކަމުގައި ބަލައިގަންނަން ޖެހޭ ކަމަށެވެ. އަދި މާތް ﷲ މިކައުނުގައި ލައްވާފައިވާ ހުރިހާ ކަމެއް ލައްވާފައި ވަނީ އަޅުތަކުންގެ މަސްލަހަތަށްޓަކައި ކަމަށް ޚުތުބާގައި ބުނެފައިވެއެވެ.
