ބޮރޫޝިއާ ޑޯޓްމުންޑަށް ކުޅެމުން އަންނަ އިންގްލެންޑުގެ ޒުވާން ފޯވާޑް ޖޭޑަން ސަންޗޯ އެންމެ ފަހުން މެންޗެސްޓާ ޔުނައިޓެޑަށް ބަދަލުވެއްޖެއެވެ.

މިދިޔަ އަހަރުގެ ހޫނު މޫސުމުގެ ޓްރާންސްފާ ބާޒާރުގައި މީޑިއާތަކުން ވަނީ އުމުރުން 21 އަހަރުގެ ސަންޗޯ 110 މިލިޔަން ޕައުންޑަށް ޔުނައިޓެޑަށް ވިއްކާލަން ޑޯޓްމުންޑުން އެއްބަސްވި ކަމަށް ރިޕޯޓުކޮށްފައެވެ. އެގޮތުން ޔުނައިޓެޑާއެކު ފަސް އަހަރުގެ އެއްބަސްވުމެއް ސަންޗޯ ހަދާނެ ކަމަށްވެސް ރިޕޯޓުކުރިއެވެ. އެކަމަކު ކޮވިޑް-19 ގެ މި ދަނޑިވަޅުގައި 110 މިލިޔަން ޕައުންޑް ދެއްކުމަށް ޔުނައިޓެޑަށް ދަތިވާނެތީ، އެ ފަހަރު އެ ޑީލް ހުއްޓުނީއެވެ.

އެކަމަކު ބުރާސްފަތު ދުވަހު ޑޯޓްމުންޑުން ވަނީ ޔުނައިޓެޑަށް ސަންޗޯ ވިއްކާލަން ނިންމާފައިވާކަން ރަސްމީކޮށް އިއުލާންކޮށްފައެވެ. ރިޕޯޓުތައް ބުނާ ގޮތުން ޔުނައިޓެޑަށް ސަންޗޯ ވިއްކާލަން ޑޯޓްމުންޑުން ނިންމީ އެންމެ ފުރަތަމަ 72 މިލިޔަން ޕައުންޑް ދައްކާ ގޮތަށެވެ. އަދި ޔުނައިޓެޑާއެކު ސަންޗޯ 2026 ވަނަ އަހަރުގެ ނިޔަލަށް އެއްބަސްވުމުގައި ސޮއިކުރާނެ ކަމަށާއި، އެ ޓީމުގައި އޭނާ ދައްކާ ކުޅުމަށް ބަލާފައި ޔުނައިޓެޑުން އިތުރު 25 މިލިއަން ޑޮލަރު ދޭ ގޮތަށް އެއްބަސްވުމުގައި ހިމަނާނެ ކަމަށްވެސް ރިޕޯޓުތައް ބުނެއެވެ.

ޔުނައިޓެޑަށް ސަންޗޯ ބަދަލުވިއިރު، އޭނާ ހޯދަން ޔޫރަޕުގެ ބޮޑެތި ކުލަބުތަކުންވެސް ވަނީ މަސައްކަތްކޮށްފައެވެ. އެގޮތުން ޗެލްސީންވެސް ދާދި ފަހުން ވަނީ ސަންޗޯ ހޯދުމަށް މަސައްކަތްކޮށްފައެވެ.

މި ވަގުތު އިންގްލެންޑުގެ ގައުމީ ޓީމާއެކު ޔޫރޯގައި ވާދަކުރަމުން އަންނަ ސަންޗޯ އެންމެ ފުރަތަމަ ވިދާލީ 2017 ވަނަ އަހަރު އިންޑިއާގައި ބޭއްވި 17 އަހަރުން ދަށުގެ ފީފާ ވޯލްޑް ކަޕުގައެވެ. އެ މުބާރާތުގެ ޗެމްޕިއަންކަން އިންގްލެންޑުން ހޯދިއިރު، އޭނާ ވަނީ މުބާރާތުގައި މޮޅު ކުޅުމެއް ދައްކާފައެވެ.

ޑޯޓްމުންޑުގެ ސީނިއާ ޓީމުގައި ސަންޗޯ ހަތަރު ސީޒަން ހޭދަކުރިއިރު، އޭނާ ވަނީ އެ ކުލަބަށް 137 މެޗު ކުޅެދީ 50 ލަނޑު ކާމިޔާބުކޮށްފައެވެ. އަދި ވަނީ ޑޯޓްމުންޑާއެކު ޖަރުމަން ކަޕާއި ޖަރުމަން ސުޕަ ކަޕް ކާމިޔާބުކޮށްފައެވެ.