އިންޑިއާގެ ބޮޑުވަޒީރު ނަރެންދުރަ މޯދީ، ކަޝްމީރުގެ ލީޑަރުންނާ ބައްދަލު ކުރައްވައިފިއެވެ.

މިއީ ކަޝްމީރު ސަރަހައްދަށް އިންޑިއާއިން ދީފައި އޮންނަ ސަރަހައްދީ މިނިވަންކަން މޯދީގެ ސަރުކާރުން ނިގުޅައިގަތް ފަހުން، މޯދީ ކަޝްމީރުގެ އިސްވެރިންނާ ބައްދަލުކުރާ ފުރަތަމަ ފަހަރެވެ. ބައްދަލުވުން ކުރިއަށް ގެންގޮސްފައިވަނީ އިންޑިއާގެ ވެރިރަށް ނިއުދިއްލީގައެވެ.

ފާއިތުވެދިޔަ އަހަރުތަކުގައި، މުސްލިމް މެޖޯރިޓީއެއް އޮންނަ މި ސަރަހައްދާއި އިންޑިއާ ސަރުކާރާ ދެމެދު އޮތް ގުޅުން ވަނީ ވަރަށް ބޮޑަށް ހީނަރު ވެފައެވެ.

މޯދީ، އިންޑިއާގެ ބާރުގެ ދަށުގައި އޮންނަށް ކަޝްމީރުގެ ލީޑަރުންނާ ބައްދަލު ކުރައްވާފައި މިވަނީ، އެސަރައްހަދުގައި ބޭއްވޭ އިންތިޚާބާއެކު، މި ސަރަހައްދުގައި ފާއިތުވެދިޔަ 3 އަހަރު ވަންދެން ދަމަހައްޓަމުން އަންނަ ސަރުކާރުގެ ސީދާ ނުފޫޒަށް ނިމުމެއް އަންނާނެ ކަމަށް ގިނަބަޔަކުން ބުނަމުންދާ ދަނޑިވަޅެއްގައެވެ.

2019ވަނަ އަހަރު މި ސަރަހައްދު މަރުކަޒީ ސަރުކާރުގެ ދަށަށް ގެންދިއުމުގެ ކުރިން، ކަޝްމީރު ސަރަހައްދަށް އޮތީ ސްޓޭޓެއްގެ ދަރަޖަ ދީފައެވެ. ކަޝްމީރުގެ ސަރަހައްދުގެ ލީޑަރުން ވަނީ، މި ސަރަހައްދުގައި ސަރަހައްދީ އިންތިޚާބު ބޭއްވުމަށްފަހު، އަލުން ސިޓީއެއްގެ ދަރަޖަ ދިނުމަށް މޯދީގެ ކިބައިން އެދިފައެވެ. އަދި މަރުކަޒީ ސަރުކާރުގެ ބާރުގެ ދަށުގައި އޮންނަން ބޭނުން ނުވާ ކަމަށް ބައްދަލުވުމުގައި ކަޝްމީރުގެ ލީޑަރުންވަނީ ބުނެފައެވެ.

މޯދީގެ ސަރުކާރުން އޭރު ބުނެފައިވަނީ، މަރުކަޒީ ސަރުކާރުގެ ދަށަށް ކަޝްމީރު ގެންދިޔުމަކީ އެ ސަރަހައްދުގެ ތަރައްގީއަށް އެޅިގެންދިޔަ ފިޔަވަޅެއް ކަމަށެވެ.

އިންޑިއާގެ ގާނޫނު އަސާސީން، އެގައުމުގެ ބާރުގެ ދަށުގައި އޮންނަ ކަޝްމީރު ސަރަހައްދަށް ލިބިދީފައި އޮންނަ ސަރަހައްދީ މިނިވަންކަން މޯދީގެ ސަރުކާރުން އުވާލުމާގުޅިގެން، ކަޝްމީރު ސަރަހައްދުގައި ވަނީ މުޒާހިރާތައް ވެސް ކޮށްފައެެވެ.

މި ސަރަހައްދަށް ލިބިދީފައި އޮތް ސަރަހައްދީ މިނިވަންކަން 2019 ވަނަ އަހަރު އަނބުރާ ގެންދިއުމަށްފަހު މޯދީގެ ސަރުކާރުންވަނީ، ކަޝްމީރުގެ ޓެލެ ކޮމިއުމިކޭޝަންގެ ޚިދުމަތް ވެސް ހުއްޓުމަކަށް ގެނެސް، އިންޓަނެޓްގެ ޚިދުމަތް ވެސް ކަނޑާާލާފައެވެ. އަދި އަނބުރާ މި ޚިދުމަތްތައް މި ސަރަހައްދަށް ލިބިދީފައި ވަނީ 2020 ވަނަ އަހަރުއެވެ.