ޔޫރޯ ފުޓްބޯޅަ މުބާރާތުގެ ގްރޫޕް އެފްގައި ހަންގޭރީއާއި ޖާމަނީ ބައްދަލުކުރާ މެޗު ފެށުމުގެ ކުރިން ކުޑަ ވަގުތުކޮޅަކަށް ވިއްސާރަދުނީގެ ކުލަތަކުން ސްޓޭޑިއަމް ދިއްލުމަށް މިއުނިކްގެ މޭޔަރު އެދުނު އެދުމަށް ޔޫރަޕުގެ ފުޓްބޯޅައިގެ މައި އިދާރާ ޔުއޭފާއިން ނޫނެކޭ ބުނެފިއެވެ. މި މެޗު ކުޅުމަށް ހަމަޖެހިފައިވަނީ މިއުނިކްގެ އެލިއާންޒް އެރީނާގައެވެ. އެއީ ޖާމަނީގެ މަޝްހޫރު ކުލަބް ބަޔާން މިއުނިކްގެ އަމިއްލަ ސްޓޭޑިއަމްވެސްމެއެވެ. މިތަނަކީ ދުބާއީގައި ހުންނަ ދުނިޔޭގެ އެންމެ އުސް އިމާރާތް ކަމުގައިވާ ބުރްޖު ޚަލީފާ ގޮތަށް ބޭނުން ކުލަތަކަކުން ދިއްލައި އެކިކަހަލަ ތަސްވީރު ދައްކާއްލެވޭ ގޮތަށް ފަރުމާ ކުރެވިފައިވާ ތަނެކެވެ.
މިއުނިކްގެ މޭޔަރު ޑައިޓަރ ރެއިޓަރ މިކަމަށް އެދިވަޑައިގެންފައިވަނީ މި މެޗުގައި ޖާމަނީއާ ވާދަކުރާ ހަންގޭރީގައި އެއްޖިންސުން ކައިވެނި ކުރުމާއި ގުޅުންހިންގުމުގެ މިނިވަންކަން ހަނިވާގޮތަށް ތައާރަފުކުރެވިފައިވާ ގާނޫނަކާ ދެކޮޅަށް އިހުތިޖާޖު ކުރުމުގެ ގޮތުންނެވެ. ވިއްސާރަދުނީގެ ކުލަތަކުން އެލިއާންޒް އެރީނާ މިނިޓެއްހާއިރު ދިއްލުމުގެ ހުއްދަ ޔޫރޯގެ ތެރޭގައި ނުދެވޭނެ ސަބަބެއް ކަމަށް ޔުއޭފާއިން ބުނެފައިވަނީ އެއީ ސިޔާސީ މެސެޖެއް ދެވޭ ސިޔާސީ ހަރަކާތެއް ކަމަށް މާނަކުރުމުގެ ފުރުސަތު އޮތުމުން ކަމަށެވެ. ޔުއެފާއިން ނޫނެކޭ ބުނީމާ މިއުނިކުގެ މޭޔަރު ކޯފާވެގެން ވިދާޅުވީ ޔުއެފާގެ ނިންމުމަކީ ވަރަށްވެސް ދެރަ އަދި ލަދުވެތި ނިންމުމެއް ކަމުގައެވެ.
އެލިއާންޒް އެރީނާގައި މި ސަކަރާތެއް ޖަހަން ޔުއޭފާއިން ހުއްދަ ނުދިނަސް ޖާމަނީގެ ކެޕްޓަން އަދި ގޯލްކީޕަރު މެނުއަލް ނޯޔާރގެ އަތުގައި އަޅާ ކެޕްޓަން ބޭންޑުގައި ވިއްސާރަދުނީގެ ކުލަތައް ހުއްޓަސް މައްސަލައެއް ނެތް ކަމަށް ޔުއފާއިން ވަނީ ބުނެފައެވެ. ޔުއެފާއިން މި ހުއްދަ ދިނުމުގެ މާކުރިންވެސް ނޯޔާރ ވަނީ ގްރޫޕް ފިޔަވަހީގައި ޖާމަނީ ކުޅުނު ހުރިހާ މެޗެއްގައި މި ބޭންޑު ބޭނުންކޮށްފައެވެ. މިކަމަކީ ޖިންސީ މިނިވަންކަމާއި ލޯބީގެ އިޚުތިޔާރީ މިނިވަންކަން އޮތުން ޕްރޮމޯޓްކުރުމަށްޓަކައި ކުރާ ކަމެކޭ ނޯޔަރ ވަނީ ބުނެފައެވެ. ނޯޔާރގެ މައްސަލަ ކޮންމެވެސް ބަޔަކު ޖެއްސުމުން ޔުއޭފާއިން އެކަން ތަހުގީގު ކުރިއެވެ. އެ ތަހުގީގަށްފަހު ބުނެފައިވަނީ ނޯޔާރގެ މަގުސަދު ގޯސް ނޫންކަމަށާއި އޭނާއާ ދެކޮޅަށް ފިޔަވަޅެއްވެސް ނާޅާނޭ ކަމުގައެވެ. މައްސަލައިގެ ތަހުގީގުވެސް ދެން އިތުރަށް ކުރިއަށް ނުގެންދާނޭ ކަމަށް ބުނެފައިވެއެވެ.
ބުދަދުވަހުގެ ރޭ ދަންވަރު މާލޭގަޑިން ބާރަޖަހާއިރު ޖާމަނީ އާއި ހަންގޭރީ ކުޅޭ މެޗު ފެށުމުގެ ކުރިން ވިއްސާރަދުނީގެ ކުލަތަކުން އެލިއާންޒް އެރީނާ ދިއްލައި އެލްޖީބީޓީ ކޮމިއުނިޓީގެ އެންމެން އުފާކުރުމަށް ޖާމަނީގެ ކެޕްޓަން ނޯޔާރ އާއި މިއުނިކްގެ މޭޔަރު ޑައިޓަރ ރެއިޓަރ ކުރަމުން އައި މަސައްކަތަށް ޔުއެފާއިން ހުރަސް އެޅިޔަސް މޭޔަރު ހުންނެވީ މި މަސައްކަތް މުޅިން ހުއްޓައިލާ ގޮތަކަށް ނޫނެވެ. މޭޔަރު ވިދާޅުވީ ވިއްސާރަދުނީގެ ކުލަތަކުން ސްޓޭޑިއަމް ދިއްލައި ނުލެވުނަސް ސްޓޭޑިއަމްގެ ކައިރީގައި ހުންނަ ކަރަންޓު އުފައްދާ ބޮޑެތި ބުރަފަތިތައް އެ ކުލަތަކުން ދިއްލާނެ ކަމަށާއި އަދި މިއުނިކްގައި ހުންނަ އޮލިމްޕިކް ޓަވަރުވެސް ހަމައެބީދައިން ދިއްލާނޭ ކަމުގައެވެ. ހަންގޭރީގެ ސަރުކާރާއި ދެންވެސް އެއްޖިންސުގެ އިޚުތިޔާރީ ގުޅުންތަކަށް ނަފުރަތުކުރާ އެންމެނަށް މެސެޖުދީފައި ނޫނީ މިފަހަރު ހުއްޓައިލުމެއް ނެތް ކަމަށް މޭޔަރު ވިދާޅުވިއެވެ.
