ސްޕެއިންގެ ގަދަ ބާރު، ރެއާލް މެޑްރިޑަށް ކުޅެމުން އަންނަ ވޭލްސްގެ ފޯވާޑް ގެރެތު ބޭލް ހޯދުމަށް މެންޗެސްޓާ ޔުނައިޓެޑުން މަސައްކަތް ފަށާފައި ވާކަމަށް މީޑިއާ ރިޕޯޓަތަށް ބުނެފިއެވެ.

ސްޕެއިންގެ މީޑިއާއެއް ކަމަށްވާ "ޑިއާރިއޯ ގޮލް" އާއި ހަވާލާދީ "ގޯލް ޑޮޓްކޮމް" ގައި ޝާއިރުކޮށްފައިވާ ލިއުމެއްގައި ވަނީ، އިނގިރޭސި ކްލަބް މެންޗެސްޓާ ޔުނައިޓެޑުން ބޭލްގެ އޭޖެންޓާއި މިހާރު މަޝްވަރާތަށް ފައްޓާފައި ވާކަމަށެވެ.

އެގޮތުން އެކުލަބުން ތައްޔާރުވަމުން އަންނަނީ އަންނަ ހޫނު މޫސުމުގެ ޓްރާންސްފާގައި ބޭލް ގެންދިއުމަށް ކަމަށްވެސް ގޯލް ޑޮޓްކޮމް އިން ވަނީ ބުނެފައެވެ.

މިސީޒަނުގެ ބޮޑު ބައެއް އަނިޔާގައި ހުންނަން ޖެހުނު ބޭލްއަށް މިހާތަނަށް ކުޅެވިފައިވަނީ 30 މެޗެވެ. އަދި މިސީޒަނުގައި އޭނާއަށް ކާމިޔާބުކުރެވިފައިވަނީ 12 ގޯލެވެ.  އަނިޔާގެ ސަބަބުން ގިނަ މެޗުތަކެއް ބޭލްއަށް ގެއްލިފައިވާއިރު، އޭނާގެ ބަދަލުގައި ކޯޗް ޒިދާން އަންނަނީ ޒުވާން ކުޅުންތެރިޔާ އިސްކޯއަށް ފުރުސަތު ދެމުންނެވެ.

2014 ވަނަ އަހަރު ޓޮޓެންމަހް ހޮޓްސްޕާއިން، ދުނިޔޭގެ ރެކޯޑް އަގަކަށް ރެއާލް މެޑްރިޑަށް ބަދަލުވެ، ބޭލް ވަނީ މިހާތަނަށް ރެއާލްއަށް 54 ގޯލު ކާމިޔާބު ކޮށްދީފައެވެ. އެޓީމާއިއެކު އޭނާ ވަނީ ކޮޕާ ޑެލްރޭ، ފީފާ ކްލަބް ވޯލްޑްކަޕް، ޔޫއެފާ ސުޕަރ ކަޕް، އަދި ޔޫއެފާ ޗެމްޕިއަންސް ލީގު ދެފަހަރު ކާމިޔާބުކޮށްފައެވެ.

ބޭރުގެ ގިނަ މީޑިއާތަކަކުން އަނަންނީ، މިއީ ބޭލް އެނބުރި ޕްރިމިއާ ލީގަށް ދާންވީ ދަނޑިވަޅު ކަމަށްވެސް ބުނަމުންނެވެ. ކުރިން ރެއާލްއަށް ކޯޗުކަން ކޮށްދީފައިވާ ހޯސޭ މޮރީނިއޯ ގެ އިރުޝާދުގެ ދަށުން މެންޗެސްޓާ ޔުނައިޓެޑް ކުޅެމުން އަންނައިރު، އެޓީމުން އަންނަނީ، ފްރާންސްގެ ފޯވާޑް ގްރީޒްމަން ހޯދުމަށްވެސް މަސައްކަތް ކުރަމުންނެވެ.