ޔޫރޯ 2020 ގެ ފެވަރިޓުންގެ ތެރޭގައި ހިމެނޭ ބެލްޖިއަމުން އެ ޓީމުގެ ދެވަނަ މެޗަށް ނުކުންނަން ތައްޔާރުވަމުން އަންނައިރު، މި މެޗުގައި އެ ޓީމު ބައްދަލުކުރަން ޖެހޭނީ ޑެންމާކާއެވެ. މި މެޗު ކުޅުމަށް ހަމަޖެހިފައިވަނީ ކޯޕަންހޭގަންގެ ޕާކެން ސްޓޭޑިއަމްގައެވެ.

މި މެޗަށް ނުކުންނައިރު ގްރޫޕް ބީ ގެ ފުރަތަމަ މެޗުން ރަޝިއާ އަތުން ފަސޭހަކަމާއެކު 3-0 ގެ ނަތީޖާއަކުން ބެލްޖިއަމް ވަނީ މޮޅުވެފައެވެ. އެކަމަކު ފުރަތަމަ މެޗުގައި ފިންލެންޑް އަތުން 1-0 ގެ ނަތީޖާއަކުން ޑެންމާކް ވަނީ ބަލިވެފައެވެ.

ބެލްޖިއަމާ ދެކޮޅަށް ނުކުންނައިރު ޑެންމާކަށް އޮތް އެންމެ ބޮޑު ކަންބޮޑުވުމަކީ މި މެޗުގައި އެ ޓީމުގެ ތަޖުރިބާކާރު މިޑްފީލްޑަރު ކްރިސްޓަން އެރިކްސަންއަށް ނުކުޅެވުމެވެ. ފިންލެންޑާ ދެކޮޅަށް ކުޅުނު މެޗުގެ 43 ވަނަ މިނެޓުގައި ހޭނެތިގެން ދަނޑު މައްޗަށް ވެއްޓުނު އެރިކްސަންއަށް އަދިވެސް އަންނަނީ ހޮސްޕިޓަލުގައި ފަރުވާ ދެމުންނެވެ.

ޔޫރީގައި ކުޅުނު ފުރަތަމަ މެޗުގައި ރަޝިއާ އަތުން ބެލްޖިއަމް މޮޅުވި ނަމަވެސް، އެ މެޗުގައި އަނިޔާގެ ސަބަބުން ތަޖުރިބާކާރު މިޑްފީލްޑަރު ކެވިން ޑި ބްރޭނާ ކުޅެފައެއް ނުވެއެވެ. މެޗުގެ ކުރިން ވާހަކަ ދައްކަމުން ބެލްޖިއަމުގެ ކޯޗު ރޮބާޓޯ މާޓިނޭޒް ވަނީނީ މި މެޗަށް ޑި ބްރޭނާ ފިޓް ކަމަށް ބުނެފައެވެ. އަދި އޭނާއަކީ ކޮންމެ ވަގުތަކުވެސް މެޗު ބަދަލުކޮށްލެވޭނެ ފެންވަރު ހުރި ކުޅުންތެރިއެއް ކަމަށްވެސް ވަނީ ބުނެފައެވެ.

މާޓިނޭޒް އިތުރަށް ބުނީ ޑެންމާކު މެޗު ފަސޭހަނުވާނެ ކަމަށާއި، އެގޮތުން ޑެންމާކަކީ އެޓޭކިން މޮޅު ގޭމެއް ކުޅޭ ޓީމެއް ކަމަށެވެ. އެހެންކަމުން މި މެޗުގައި ބެލްޖިއަމުން ސަމާލުވާންޖެހޭ ވަރަށް ގިނަ ކަންކަން އެބަހުރި ކަމަށްވެސް ވަނީ ބުނެފައެވެ.

ޑެންމާކުގެ ކޯޗު ކެސްޕަ ހިލްމަންޑް ބުނީ އެ ޓީމު މިވަގުތު އޮތީ ނުބައި ފައްތަރެއްގައި ކަމަށާއި، އެގޮތުން އެ ޓީމުގެ އެންމެ ތަޖުރިބާކާރު އެއް ކުޅުންތެރިޔާ ކަމަށްވާ އެރިކްސަންއަށް މި މުބާރާތުގައި ދެން ކުޅުމުގެ ފުރުސަތު ކުޑަ ކަމަށެވެ. އަދި އެރިކްސަން ނެތްތަން ފޫބައްދަން އުނދަގޫވާނެ ކަމަށްވެސް ހިލްމަންޑް ބުންޏެވެ.

ހިލްމަންޑް ބުނީ މި ވަގުތު ހުރިހާ ވިސްނުމެއްވެސް ހުރީ ބެލްޖިއަމް މެޗަށް ކަމަށާއި، މި މުބާރާތުގައި ކުރިއަށްދާން ބޭނުންނަމަ މި މެޗުން މޮޅުވުން ނޫން ގޮތެއް ޑެންމާކަށް ނެތް ކަމަށެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ހެޑް އޮފް ސްޕޯޓްސް ހުސެއިން ފަރިޔާޒެވެ. ފަރިޔާޒާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް ބީ ގެ އެނަލިސްޓް މުޙައްމަދު ނިޒާމް (ނިޒާމްބެ) އެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއްގެ ގޮތުން މުޙައްމަދު ޒަރީރު (ޒައްރަ) ބައިވެރިވެވަޑައިގަންނަވާނެއެވެ.

ޑެންމާކާއި ބެލްޖިއަމް ބައްދަލުކުރާ މެޗު ފަށާނީ ބުރާސްފަތި ދުވަހުގެރޭ ރާއްޖެ ގަޑިން 21:00 ގައެވެ.