ވިދިވިދިގެން ހަތަރުވަނަ ފަހަރަށް ޕޯޗުގީޒް ލީގުގެ ތަށި ބެންފީކާއިން އުފުލާލައިފިއެވެ.

ބެންފީކާއިން ލީގު ކާމިޔާބުކުރީ ވިޓޯރިއާ ގޫމަރޭސް އާއި ބައްދަލުކުރި މެޗު 0-5 ގެ ތަފާތު ބޮޑު ނަތީޖާއަކުން ކާމިޔާބުކޮށްގެންނެވެ.

ބެންފީކާގެ އަމިއްލަ ދަނޑުގައި ކުޅުނު މި މެޗުގެ ފުރަތަމަ ހާފްގައި އެޓީމުން ހަތަރު ގޯލު ކާމިޔާބުކޮށްފައެވެ. އެގޮތުން ފުރަތަމަ ހާފުގެ 11 ވަނަ މިނެޓުގައި ފްރާންކޯ ސޭވީ ލަނޑެއް ކާމިޔާބުކުރި އިރު، އޭގެ ފަސް މިނެޓު ފަހުން ރައުލް ހިމެނޭޒް ވަނީ އެޓީމުގެ ދެވަނަ ލަނޑު ކާމިޔާބުކޮށްފައެވެ.

ބެންފީކާއިން ކާމިޔާބުކުރި ތިންވަނަ ލަނޑު 37 ވަނަ މިނެޓުގައި ޕިޒީ ކާމިޔާބުކޮށްދިން އިރު، އެޓީމުގެ ހަތަރުވަނަ ލަނޑު 44 ވަނަ މިނެޓުގައި އެޓީމަށް ކާމިޔާބުކޮށްދިނީ ޖޮނަސް އޮލިވެއިރާއެވެ.

މި ނަތީޖާގައި އޮވެ ފުރަތަމަ ހާފު ނިމުނު އިރު ދެވަނަ ހާފު ފެށިގެން 67 ވަނަ މިނެޓްގައި ބެންފީކާއަށް ލިބުނު ޕެނަލްޓީއަކުން އެޓީމުގެ ފަހު ލަނޑު ކާމިޔާބުކޮށްދިނީ އޮލިވެއިރާއެވެ.

ބެންފީކާއިން ޕޯޗުގީޒް ލީގު ކާމިޔާބުކުރިއިރު އެޓީމަށް ވަނީ މިހާތަނަށް 81 ޕޮއިންޓް ލިބިފައެވެ. ދެވަނައިގައި އޮތް ޕޯޓޯއަށް 73 ޕޮއިންޓް ލިބިފައިވާ އިރު، ތިންވަނައިގައި 68 ޕޮއިންޓާއެކީ އޮތީ ސްޕޯޓިން ލިސްބަންއެވެ.

ލީގުގައި ބާކީ އަދި އެއް މެޗު ބެންފީކާއަށް އޮތްއިރު، ލީގުގައި އެޓީމު މިހާތަނަށް ބަލިވެފައިވަނީ އެންމެ ދެ މެޗުންނެވެ.