ޔުއެފާ ޔޫރޯ 2020 ގެ ގްރޫޕް ޑީ ގެ ދެވަނަ މެޗުގައި ސްކޮޓްލެންޑް އަތުން ޗެކް ރިޕަބްލިކް މޮޅުވެއްޖެއެވެ.
ހޯމަ ދުވަހު ސްކޮޓްލެންޑުގެ ގްލާސްގޯގައި ހުންނަ ހެމްޕްޑެން ސްޓޭޑިއަމުގައި ކުޅުނު މެޗުން ޗެކް ރިޕަބްލިކް މޮޅުވީ 2-0 ނަތީޖާއަކުންނެވެ.
މި މެޗު ފަށައިގެން ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މެޗުގެ 15 ވަނަ މިނެޓުގައި ޗެކް ރިޕަބްލިކުގެ ޕެޓްރިކް ޝިކްއަށް ވަނީ ލަނޑު ޖަހަން ރަނުގެ ފުރުސަތެއް ލިބި ބޭކާރުވެފައެވެ. އޭނާ ފޮނުވާލި ހަމަލާގެ ހުރަހަކަށްވީ ސްކޮޓްލެންޑްގެ ގޯލްކީޕަރު ޑޭވިޑް މާޝަލްއެވެ. އަދި އޭގެ ފަހުން މެޗުގެ 19 ވަނަ މިނެޓުގައި ސްކޮޓްލެންޑުގެ ލިންޑޮން ޑައިކްސްއަށް ވަނީ ލަނޑު ޖަހަން ރަނުގެ ފުރުސަތެއް ލިބި ބޭކާރުވެފައެވެ. ހުހަށްހުރެ އޭނާ ފޮނުވާލި ބޯޅަ ދިޔައީ ގޯލާ އަމާޒުނުވެއެވެ.
މި މެޗުގައި ޗެކް ރިޕަބްލިކުން ލީޑު ނަގާފައިވަނީ ފުރަތަމަ ހާފު ނިމެން ދެ މިނެޓަށް ވެފައި ވަނިކޮށެވެ. މި ލަނޑު އެޓީމަށް ކާމިޔާބު ކޮށްދިނީ ޝިކްއެވެ. އަދި ދެވަނަ ހާފު ފަށައިގެން ހަތްވަނަ މިނެޓުގައި ޝިކް ވަނީ ހިތްގައިމު ލަނޑެއް ކާމިޔާބުކޮށް ލީޑު ފުޅާކޮށްދީފައެވެ. އޭނާ މި ލަނޑު ކާމިޔާބުކުރީ ދަނޑުގެ މެދު ރޮނގާ ހަމައިން ފޮނުވާލި ހަމަލާއަކުންނެވެ.
މި ލަނޑަށްފަހުވެސް ޗެކް ރިޕަބްލިކުން ވަނީ ސްކޮޓްލެންޑުގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލާފައެވެ. އެކަމަކު މި ހަމަލާތަކުގެ ހުރަހަކަށްވީ ސްކޮޓްލެންޑް ގޯލްކީޕަރު ޑޭވިޑް މާޝަލްއެވެ.
ގްރޫޕް ޑީ ގައި ކުޅުނު ފުރަތަމަ މެޗުން ޗެކް ރިޕަބްލިކް މޮޅުވިއިރު، އެ ގައުމުން ދެން މެޗެއް ކުޅޭނީ އަންނަ ހުކުރު ދުވަހުއެވެ. އެ ދުވަހު ޗެކް ރިޕަބްލިކް ނުކުންނާނީ ކްރޮއޭޝިއާއާ ދެކޮޅަށެވެ.
