ޔޫރޯ 2020 ގެ ގްރޫޕް ޑީ ގެ މެޗުތައް އާދީއްތަ ދުވަހު ފެށިއިރު، މި ގްރޫޕުގައި ހިމެނޭ ސްކޮޓްލެންޑާއި ޗެކް ރިޕަބްލިކުގެ ކުރިމަތިލުން އޮންނާނީ ހޯމަ ދުވަހުގެ ހަވީރުއެވެ. މި މެޗު ކުޅޭނީ ގްލާސްގޯގެ ހެމްޕްޑެން ޕާކުގައެވެ.

ޔޫރޯގައި ސްކޮޓްލެންޑާއި ޗެކް ރިޕަބްލިކް ބައްދަލުކުރާއިރު، މީގެ ކުރިން މި ދެ ގައުމު ވަނީ ހަތް ފަހަރު ބައްދަލުކޮށްފައެވެ. އޭގެ ތެރެއިން ހަތަރު މެޗުން ސްކޮޓްލެންޑް މޮޅުވިއިރު، ޗެކް ރިޕަބްލިކް މޮޅުވެފައިވަނީ ދެ މެޗުންނެވެ. އަދި އަނެއް މެޗު ނިމުނީ އެއްވަރުވެގެންނެވެ.

ސްކޮޓްލެންޑުގެ ކޯޗު ގްރެގޯ ޓައުންޒެންޑް ބުނީ މި ފަހަރުގެ ޔޫރޯއަށް ސްކޮޑްލެންޑުން ނުކުންނަނީ ވަކި އަމާޒެއް އޮވެގެން ކަމަށާއި، އެހެންކަމުން އެ އަމާޒަށް ވާސިލުވުމަށް ފުރަތަމަ މެޗުން މޮޅުވުން މުހިންމު ކަމަށެވެ. އަދި މިހާރު ސްކޮޓްލެންޑުގައި މިއޮތް ސްކޮޑާއެކު ގްރޫޕް ސްޓޭޖް ފަހަނައަޅާ ދިޔުމުގެ ފުރުސަތު އެބައޮތް ކަމަށްވެސް ބުންޏެވެ. މީގެ އިތުރުން އެ ގްރޫޕުގައި ހިމެނޭ ގައުމުތަކަކީ ހަމަހަމަ ގައުމުތަކަކަށް ވުމުން، އޭގެ ފައިދާ ނެގޭނެ ކަމަށް ގަބޫލުކުރާ ކަމަށްވެސް ޓައުންޒެންޑް ބުންޏެވެ.

ޗެކް ރިޕަބްލިކުގެ ކޯޗު ޔާރޯސާވް ސްވަސްކީ ބުނީ މި މެޗަށް ނުކުންނައިރު މިއީ ޕްރެޝަރު މެޗެއްކަން ދަންނަން ޖެހޭ ކަމަށާއި، ހާއްސަކޮށް މިއީ ޔޫރޯގައި އޭނާގެ ޓީމުން ކުޅޭ ފުރަތަމަ މެޗުކަމަށް ވުމާއެކު ޕްރެޝަރު ބޮޑު ކަމަށެވެ. އެކަމަކު ޔޫރޯއަށް ޓީމުން ވާންޖެހޭ ތައްޔާރީތައް ވަރަށް ރަނގަޅަށް ވެފައިވާ ކަމަށް ސްވަސްކީ ބުންޏެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑް ކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ވަގުތުން ރާއްޖެޓީވީން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ހެޑް އޮފް ސްޕޯޓްސް ހުސައިން ފަރިޔާޒެވެ. ފަރިޔާޒާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް ޑީ ގެ އެނަލިސްޓް މުޙައްމަދު ޝިޔާޒް (މޯހަން) އެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއް ބައިވެރިވާނެއެވެ.

ސްކޮޓްލެންޑާއި ޗެކް ރިޕަބްލިކް ބައްދަލުކުރާ މެޗު ފަށާނީ ހޯމަ ދުވަހުގެ ހަވީރު ރާއްޖެ ގަޑިން 18:00 ގައެވެ.