ކޮވިޑް-19 އިން ދިފާއުވުމަށް ހޯމަ ދުވަހު 1409 މީހުން ވެކްސިން ޖަހާފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

އެޗްޕީއޭއިން އާއްމުކޮށްފައިވާ ތަފާސްހިސާބުތައް ދައްކާގޮތުން ފުރަތަމަ ޑޯޒް ޖަހާފައިވަނީ 441 މީހުންނެވެ. އެއީ މާލެ ސަރަހައްދުން ވެކްސިން ޖެހި 80 މީހުންނާއި އަތޮޅުތެރެއިން ވެކްސިން ޖެހި 361 މީހުންނެވެ.

ދެވަނަ ޑޯޒް ޖަހާފައިވަނީ 968 މީހުންނެވެ. އެއީ މާލެ ސަރަހައްދުން 331 މީހުންނާއި އަތޮޅުތެރެއިން ވެކްސިން ޖެހި 637 މީހުންނެވެ.

މިއާއެކު ރާއްޖޭގައި ކޮވިޑް ވެކްސިންޖެހި މީހުންގެ އަދަދު ވަނީ 312،574ށް އަރާފައެވެ. އޭގެ ތެރެއިން ދެވަނަ ޑޯޒް ޖަހާފައިވަނީ 174،259 މީހުންނެވެ.

ރާއްޖޭގައި މިހާރު ޖަހަމުން އަންނަނީ ކޮވިޝީލްޑް ވެކްސިނާއި، ފައިޒަރ ވެކްސިން، އަދި ސިނޮފަރމް ވެކްސިނެވެ. މީގެތެރެއިން ކޮވިޝީލްޑް ވެކްސިންގެ ދެވަނަ ޑޯޒް ޖެހުން މާލެ ސަރަހައްދުގައި މެއި މަހުގެ 2 ވަނަ ދުވަހުން ފެށިގެން ވަނީ މެދުކަނޑާލާފައެވެ.

ރާއްޖެއިން ރަޝިޔާގެ ސްޕަޓްނިކްވީ ވެކްސިން ގެނައުމަށް މަސައްކަތް ކުރަމުން އަންނައިރު، އެސްޓްރަޒެނިކާ ވެކްސިން ގެނައުމަށް ވެފައިވާ އެއްބަސްވުމުގެ ދަށުން ދެ ލައްކަ ޑޯޒް މިމަހުގެ ފަހުކޮޅު ލިބޭނެކަމަށް ހެލްތު މިނިސްޓަރ އަހުމަދު ނަސީމް ވަނީ ވިދާޅުވެފައެވެ. ރާއްޖެއިން ވަނީ އެސްޓްރަޒެނިކާ ވެކްސިންގެ ހަތް ލައްކަ ޑޯޒް ގަތުމަށް ފައިސާ ދައްކާފައެވެ.

މީގެއިތުރުން އެމެރިކާ އާއި ކެނެޑާއިން ވަނީ ރާއްޖެއަށް ވެކްސިން ފޯރުކޮށްދޭނެކަމަށް ބުނެފައެވެ.