އދ. ގެ އާންމު މަޖިލީހުގެ 76 ވަނަ ދައުރުގެ ރިޔާސަތު ރާއްޖެއަށް ލިބުމުން ދޭހަވަނީ މުޅި ދުނިޔެއިން ރާއްޖެ ބަލައިގެންފައިވާކަން ކަމުގައި ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެވެެ.

އދ. ގެ އާންމު މަޖިލީހުގެ އިންތިޚާބީ ރައީސްގެ ހައިސިއްޔަތުން ދެއްކެވި ފުރަތަމަ ވާހަކަފުޅުގައި މިނިސްޓަރ ވިދާޅުވީ، މިއަދު ދުނިޔޭގެ ހުރިހައި ގައުމުތަކެއްގެ އިތުބާރާއި ޔަގީންކަން ދިވެހިރާއްޖެއަށް ލިބިގެން ދިއުމުން، ސާބިތުވެގެން މި ދިޔައީ، މުޅި ދުނިޔެ، މިއަދު ރާއްޖެ ބަލައިގެންފައިވާކަން ކަމަށާއި، އަދި މިއީ ރައީސް ޞާލިހުގެ ޚާރިޖީ ސިޔާސަތު ދުނިޔެ ޤަބޫލުކޮށްފައިވުން ކަމުގައެވެ.

ހަމަހަމަކަން ގާއިމްކުރެއްވުމަށް މަސައްކަތް ކުރައްވާނެ ކަމަށާއި، ޒުވާނުންނާއި ޒުވާނުންގެ ދައުރު އިތުރަށް ފުޅާ ކުރެއްވުމަށް އަޑު އުފުއްލަވާނެ ކަމުގައިވެސް ވިދާޅުވިއެވެ.

އަދި މިންތީގެ ހަމަހަމަކަށް ވަކާލާތު ކުރައްވާނެ ކަމަށާއި، މިކަމުގައި ހޭލުންތެރިކަން އިތުރުކުރެއްވުމަށް އެމަނިކުފާނުގެ ދައުރުގައި މަސައްކަތް ކުރައްވާނެ ކަމަށް ވިދާޅުވިއެވެ. ގިނަ ބައެއްގެ ބޭނުންތަކާއި އިހުސާސްތައް ހިމެނިގެން އިންސާނީ އެހީތެރިކަން ފޯރުކޮށް ދިނުމަކީ މެދުކެނޑުމެއް ނެތި ކުރިއަށް ދާންޖެހޭ މަސައްކަތެއް ކަމަށް ވެސް ވިދާޅުވިއެވެ.

ދެފުށް ފެންނަ ގޮތަކަށް މަސައްކަތް ކުރައްވާނެ ކަމަށާއި، އެއްވެސް ބައެއް ބާކީ ނުކޮށް މަސައްކަތް ކުރައްވާނެ ކަމަށްވެސް އެމިކުފާނު ވަނީ ވިދާޅުވެފައެވެ.

ފާއިތުވި ދުވަސްތަކުގައި 193 މެންބަރު ގައުމުތަކުގެ އިސްވެރިންނާ ވާހަކަދައްކަވައި، އެމަނިކުފާނުގެ އުންމީދާ ވިޝަން ހިއްސާ ކުރައްވާފައިވާނެ ކަމަށާއި އަދި އެގައުމު ތަކުން ބޭނުންވާ ކަންކަމުގެ އަޑުވެސް އެއްސެވި ކަމަށް ވިދާޅުވިއެވެ.

މިއަދުގެ ބޭނުންތަކަށް ޖަވާބުދާރީ ވުމަށް އދ. އަކީ މިއަށްވުރެވެސް ވަރުގަދަ ތަނެއް ކަމުގައި ވާންޖެހޭ ކަމަށާއި، ދެފުށް ފެންނަ، ފުރިހަމަ އަށް މަސައްކަތް ކުރެވޭ، ނަތީޖާ ނެރެވޭ، ޒިންމާދާރު ތަނަކަށް ވާންޖެހޭ ކަމުގައި ވިދާޅުވިއެވެ. ޝާހިދު ވިދާޅުވީ، އދ. ގެ ނިޒާމުގެ ތެރޭގައި އާއި، އދ. ގެ އެކި ގުނަވަންތަކުގެ މެދުގައި އޮންނަ ގުޅުންތައް އިތުރަށް ބަދަހިވާންޖެހޭ ކަމަށެވެ.

އެހެންކަމުން މިކަންކަން ދިރުވޭނޭހެން އދ. ގެ މަސައްކަތް ބައްޓަން ކުރުމާއި އެކު، އެ މަސައްކަތްތައް އިތުރަށް ފުޅާ ކުރެވޭނޭ މަގުތައްވެސް ބަލަންޖެހޭ ކަމަށެވެ.

މިނިސްޓަރ ޝާހިދު ރިޔާސަތާ ހަވާލުވެވަޑައިގަންނަވާނީ ސެޕްޓެމްބަރ 14ގައެވެ. މިއީ އެއް އަހަރުގެ ދައުރެކެވެ.

އާންމު މަޖިލީހުގެ ރިޔާސަތުގެ ވޯޓު އޮތީ ހޯމަ ދުވަހު، ނިއުޔޯކްގައި ހުންނަ އދ. ގެ މައި މަރުކަޒުގައެވެ.

މި އިންތިޚާބު، ދިވެހިރާއްޖޭގެ ކެންޑިޑޭޓް، މިނިސްޓަރ އޮފް ފޮރިން އެފެއަރޒް ޢަބްދުﷲ ޝާހިދު ކާމިޔާބު ކުރެއްވީ ވޯޓުގައި ބައިވެރިވި 191 ޤައުމުގެ ތެރެއިން 143 ގައުމުގެ ވޯޓު ކާމިޔާބު ކުރައްވައިގެންނެވެ.

2021 ސެޕްޓެމްބަރު 14 ގައި ފެށޭ ޢާއްމު މަޖިލީހުގެ 76 ވަނަ ދައުރުގައި އޭޝިއާ ޕެސިފިކް ސަރަހައްދުގެ ފަރާތުން ރިޔާސަތު ބަލަހައްޓަން ފޮރިން މިނިސްޓަރ ޝާހިދު ނޮމިނޭޓްކުރެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙެވެ.

މިއީ މި މަޖިލީހުގެ ރިޔާސަތަށް ދިވެހިރާއްޖެއިން ކުރިމަތިލި ފުރަތަމަ ފަހަރެވެ. އަދި ދިވެހިރާއްޖެ ވެގެން މިދިޔައީ ތަރައްގީވަމުން އަންނަ ކުދި ޖަޒީރާ ގައުމުތަކުގެ ތެރެއިން އދ. ގެ ރިޔާސަތު ބަލަހައްޓާ 6 ވަނަ ގައުމަށެވެ.

އދ. ގެ އާންމު މަޖިލީހަކީ މައިގަނޑު 6 ގުނަވަނުގެ ތެރެއިން އެއް ގުނަވަނެވެ. އަދި މިއީ ސިޔާސަތު ކަނޑައެޅުމާއި މަޝްވަރާކުރުމުގެ މައިގަނޑު ގުނަވަންވެސްމެއެވެ.

މަޖިލީހުގެ ޖަލްސާތަކުގެ ރިޔާސަތު ބަލަހައްޓަވާނީ އެމަޖިލީހުގެ ރައީސްއެވެ. އަދި މަޖިލީހުގެ ރައީސް، ބައިނަލްއަގްވާމީ ބައްދަލުވުންތަކާ ސަރަހައްދީ ބައްދަލުވުންތަކުގައި އދގެ މުޅި މެމްބަރޝިޕް ތަމްސީލު ކުރައްވާނެއެވެ.

ދިވެހިރާއްޖެއިން އދގެ މެމްބަރު ގައުމަކަށްވީ ރާއްޖެއަށް މިނިވަންކަން ލިބުނުތާ ދާދި ކުޑަ ދުވަސްކޮޅެއްގެ ތެރޭގައި، 1965 ވަނަ އަހަރުގެ ސެޕްޓެމްބަރު މަހުގެ 21 ވަނަ ދުވަހުއެވެ.