ޗެލްސީއާއެކު ހަދާފައި އޮތް އެއްބަސްވުން އެ ޓީމުގެ ކޯޗު ތޯމަސް ޓުޗެލް އާކޮށްފިއެވެ.

ޗެލްސީގެ ކޯޗަކަށް އުމުރުން 47 އަހަރުގެ ޓުޗެލް ހަމަޖެއްސީ މި އަހަރުގެ ޖެނުއަރީ މަހު، އެ ޓީމުގެ ކޯޗުގެ މަގާމުން ފްރޭންކް ލަމްޕާޑް ވަކިކުރުމަށްފަހުއެވެ. އެ ފަހަރު ޓުޗެލް ވަނީ ޗެލްސީއާއެކު އެއް އަހަރާ ބައިގެ އެއްބަސްވުމެއް ހަދާފައެވެ.

ޓުޗެލް ވަނީ ޗެލްސީގެ ކޯޗުގެ މަގާމާ ހަވާލުވިތާ 124 ދުވަހުގެ ތެރޭގައި އެ ޓީމަށް ޔުއެފާ ޗެމްޕިއަންސް ލީގުގެ ޗެމްޕިއަންކަން ހޯދައިދީފައެވެ. މިއީ ޗެލްސީއާއެކު ޓުޗެލްގެ ފުރަތަމަ ކާމިޔާބީއެވެ. އަދި މިއީ ޓުޗެލްގެ ކޯޗިން ކެރިއަރުގައިވެސް ކާމިޔާބުކުރި ފުރަތަމަ ޗެމްޕިއަންސް ލީގެވެ. އެކަމަކު ޓުޗެލުގެ އިރުޝާދުގެ ދަށުން މި ސީޒަނުގެ އެފްއޭ ކަޕުގައި ޗެލްސީ ކުޅުނު ނަމަވެސް، ފައިނަލުގައި ލެސްޓާ ސިޓީ އަތުން ޗެލްސީ ވަނީ 1-0 ގެ ނަތީޖާއަކުން ބަލިވެފައެވެ.

އެކަމަކު ހުކުރު ދުވަހު ޓުޗެލް އެއްބަސްވުން އާކުރިއިރު، އޭނާ ވަނީ ޗެލްސީގައި އިތުރު ދެ އަހަރު މަޑުކުރަން ނިންމާފައެވެ. އެހެންކަމުން ޓުޗެލްގެ އެއްބަސްވުން ހަމަވާނީ 2024 ވަނަ އަހަރުގެ ޖޫން މަހުގެ ނިޔަލަށެވެ.

ޓުޗެލް އަކީ ޗެލްސީގެ ވެރިޔާ ރޯމަން އަބްރަމޮވިޗް، 2003 ވަނަ އަހަރު އެ ކުލަބު ގަތް ފަހުން، އެ ޓީމާ ހަވާލުވި 11 ވަނަ ކޯޗެވެ. އަދި ސީޒަނެއްގެ މެދުތެރެއިން އެ ޓީމާ ހަވާލުވި ފަސްވަނަ ކޯޗެވެ. 

މި ފަހަރުގެ ޗެމްޕިއަންސް ލީގު ޗެލްސީއާއެކު ޓުޗެލް ކާމިޔާބުކުރިއިރު، އޭނާއަކީ އެއް އަހަރު ފައިނަލުން ބަލިވެ، ޖެހިގެން އައި ސީޒަނުގައި ޗެމްޕިއަންސް ލީގުގެ ތަށި ހޯދި ޖަރުމަނުގެ ތިންވަނަ ކޯޗެވެ. ޓުޗެލް މިދިޔަ ސީޒަނުގައި މުޅިން އަލަށް ޕީއެސްޖީއަށް ޗެމްޕިއަންސް ލީގުގެ ފައިނަލުން ފުރުސަތު ހޯދައިދިން ނަމަވެސް، އެ ފަހަރުގެ ފައިނަލުން ޕީއެސްޖީ ވަނީ ބަޔާން މިއުނިކް އަތުން 1-0 ގެ ނަތީޖާއަކުން ބަލިވެފައެވެ.

ހުކުރު ދުވަހުގެ ވަގުތެއްގައި ޗެލްސީގެ އެއްބަސްވުން ޓުޗެލް އާކުރިއިރު، ހަމަ އެ ދުވަހު އެ ޓީމުގެ ތަޖުރިބާކާރު ޑިފެންޑަރު ތިއާގޯ ސިލްވާ އާއި ފޯވާޑް އޮލިވިއޭ ޖިރޫޑުވެސް ވަނީ އެއްބަސްވުން އާކޮށްފައެވެ.