މާހައުލީ ނިޒާމު ރައްކާތެރިކުރުމަށް ކޮންމެ މީހަކަށް ވެސް ފަރުދީ ލެވެލްގައި ކުރެވޭނެ މަސައްކަތްތައް ހުންނާނެ ކަމަށް އެންވާރަމަންޓް އެންޑް ކްލައިމެޓް ޗޭންޖް މިނިސްޓްރީން ބުނެފިއެވެ.

ދުނިޔޭގެ ތިމާވެށީގެ ދުވަހުގެ މުނާސަބަތުގައި މިނިސްޓްރީން ނެރުނު ބަޔާނެއްގައި ވަނީ، މާހައުލީ ނިޒާމުތައް އިޔާދަކުރުމަށް، ނެތެމުންދާ ދިރޭތަކެތި ހިމާޔަތްކުރުމަކީ ވަރަށް މުހިއްމު ކަމެއް ކަމަށެވެ. އަދި މާހައުލީ ނިޒާމުތަކަށް ދިރުން ގެނެސް އާލާކުރުމަށް ކޮންމެ ފަރުދަކަށްވެސް މަސައްކަތް ކުރެވިދާނެ ކަމަށެވެ. އެގޮތުން، ގަސް އިންދުމާއި، މޫދަށާއި ތަންތަނަށް އަޅާފައިވާ ކުނި ނަގައި ސާފުކޮށް، ވެށި ސާފުކޮށް ބެލެހެއްޓުމާއި، ގުދުރަތީ ރީތިކަން ދެމެހެއްޓުމަށްޓަކައި އެންމެންނަށްވެސް ބާރުއެޅުންފަދަ ކަންކަމަކީ ކޮންމެ މީހަކަށްވެސް ފަރުދީ ފެންވަރުގައާއި ރަށު ފެންވަރުގައިވެސް ކުރެވޭނެ ކަންކަން ކަމަށް ބަޔާނުގައިވެއެވެ.

މިނިސްޓްރީން ބުނީ ގަސްގަހާގެއްސަކީ އޭގެ ސަބަބުން ވައި ސާފުވެ، ނަފްސާނީ ދުޅަހެޔޮކަންވެސް އިންސާނުންނަށް ލިއްބައިދޭ އެއްޗެއް ކަމަށެވެ. މިކަމުންވެސް ގުދުރަތީ މާހައުލުގެ މުހިއްމުކަން ދޭހަވާ ކަމަށާއި، ރާއްޖެއަކީ ރީތި ގޮނޑުދޮށްތަކާއި މޫދު ވަށައިގެންވާ އަދި މުއްސަނދި ފަރުގެ މާހައުލުތަކާއި ކަނޑުއަޑީގެ ބަގީޗާ ތައް ހިމެނޭ ތަނަކަށް ވީހިނދު އެމާހައުލުތައް ސާފުކޮށް ބެލެހެއްޓުމަކީ ކޮންމެ މީހެއްގެވެސް ބޮލުގައި އެޅިފައިވާ ޒިންމާއެއް ކަމަށެވެ. އަދި އެ ޒިންމާ ރަނގަޅަށް އަދާނުކުރެވޭނަމަ އިޔާދަނުކުރެވޭނެ ފަދަ ގެއްލުންތައް ލިބިގެންދާނެ ކަމަށް ވެސް ބަޔާނުގައި ބުނެފައިވެއެވެ. އެހެންވީމަ މިއަދު ވިސްނައި ނަޒަރު ހިންގަންވީ ގުދުރަތީ ނިޒާމުތައް އިޔާދަކުރުމަށް އަޅުގަނޑުމެން ކުރަނީ ކޮންކަމެއްތޯ އާއި، އިތުރަށް ކުރެވޭނީ ކޮންކަމަކާ މެދުގައި ކަމަށް ވެސް ބުނެފައިވެއެވެ.

މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީއިން ގުދުރަތީ ނިޒާމުތައް އިޔާދަކުރުމަށް ކުރަމުންގެންދާ މަސައްކަތްތަކުގެ ތެރޭގައި، ގުދުރަތީ ގޮތުން ޚާއްސަ ސިފަތައް ލިބިފައިވާ ސަރަހައްދުތައް ހިމާޔަތްކުރުމާއި، ނެތެމުންދާ ދިރޭތަކެތި ހިމާޔަތްކުރުމުގެ އިތުރުން، މޫސުމީ ބަދަލުތަކުން ލިބޭ ގެއްލުންތައް ކުޑަކުރުމުގެ މަސައްކަތްތައް ހިމެނޭ ކަމަށް ވެސް އެ މިނިސްޓްރީން ބުނެފައިވެއެވެ.

ކޮންމެ އަހަރެއްގައިވެސް 05 ޖޫން ގައި ބައިނަލްއަޤުވާމީ ފެންވަރުގައި ފާހަގަކުރާ ދުނިޔޭގެ ތިމާވެށީގެ ދުވަސް ރަސްމީގޮތެއްގައި ފާހަގަކުރަން ފަށާފައިވަނީ 1974ވަނަ އަހަރުއެވެ. މިދުވަސް ފާހަގަކުރުމުގެ އެންމެ ބޮޑު އެއް ބޭނުމަކީ ތިމާވެށީގެ މުހިއްމު ކަމާއިމެދު އާއްމުންގެ ހޭލުންތެރިކަން އިތުރުކުރުމެވެ.

މިއަހަރުގެ ތިމާވެށީގެ ދުވަހުގެ ޝިއާރަކީ،Ecosystem Restoration”"  ނުވަތަ މާހައުލީ ނިޒާމުތައް އިއާދަކުރުމެވެ. މިއަހަރުގެ ތިމާވެށީގެ ދުވަސް ފާހަގަކުރުމުގެ ގޮތުން ތިމާވެށި ހިމާޔަތްކުރުމާއި ގުޅޭ ވަރަށް މުހިއްމު ކަންތައްތަކެއް ކުރުމަށް ވަނީ ހަމަޖެހިފައެވެ. އެގޮތުން މިދުވަސް ފާހަގަ ކުރުމުގެ ގޮތުންމާދަމާ 14:30 ގައި ބާއްވާ އޮންލައިން ރަސްމިއްޔާތެއްގައި މިމަސައްކަތްތައް ފެށިގެންދާނެއެވެ.