ފަލަމަސްގަނޑަށް ލިބުނު އަނިޔާއަކާ ގުޅިގެން ލިވަޕޫލުގެ ޒުވާން ޑިފެންޑަރު ޓްރެންޓް އަލެކްސަންޑަ-އާނޯލްޑަށް ކުރިއަށް ޔޫރޯ ފުޓްބޯޅަ މުބާރާތުގައި ނުކުޅެވޭނެކަން ޔަގީންވެއްޖެއެވެ.

މި ފަހަރުގެ ޔޫރޯއަށް އެކުލަވާލި 26 ކުޅުންތެރިންގެ ސްކޮޑުގައި އާނޯލްޑް ހިމަނަން އިންގްލެންޑުގެ ކޯޗު ގެރެތު ސައުތުގޭޓް ނިންމިއިރު، މިދިޔަ އަންގާރަ ދުވަހު އިނގިރޭސި ބައެއް މީޑިއާތަކުން ވަނީ ފައިނަލް ސްކޮޑުން އޭނާއަށް ފުރުސަތު ނުދޭން ނިންމާފައިވާ ކަމަށް ރިޕޯޓުކޮށްފައެވެ. އެގޮތަށް މީޑިއާތަކުން ރިޕޯޓުކުރީ މި ފަހުން ފީފާ ވޯލްޑް ކަޕުގެ ޔޫރަޕިއަން ކޮލިފައިންއަށް ނެގި އިންގްލެންޑުގެ ސްކޮޑުން އާނޯލްޑަށް ފުރުސަތު ދީފައި ނުވާތީއެވެ.

ނަމަވެސް އިންގްލެންޑުގެ ފައިނަލް ސްކޮޑުގައި އާނޯލްޑް ހިމެނިއިރު، ޔޫރޯއަށް ތައްޔާރުވުމުގެ ގޮތުން ބުދަ ދުވަހުގެރޭ ކުޅުނު ބައިނަލްއަގުވާމީ އެކުވެރިކަމުގެ މެޗުގެ ތެރެއިން އާނޯލްޑުގެ ފައިގެ ފަލަމަސްގަނޑަށް ވަނީ އަނިޔާވެފައެވެ. އަމިއްލަ ގައުމުގައި ކުޅުނު އެ މެޗުން އިންގްލެންޑް މޮޅުވީ އޮސްޓްރިއާ އަތުން 1-0 ގެ ނަތީޖާއަކުންނެވެ.

އެ މެޗަށްފަހު ހެދި ޓެސްޓުތަކުން ވަނީ އާނޯލްޑް ހަތަރެއް ނުވަތަ ހަ ހަފުތާއަށް ކުޅުމާ ދުރަށް ދާން ޖެހިފައިވާކަން ހާމަވެފައެވެ. އެހެންކަމުން އޭނާ މިހާރު ވަނީ އިންގްލެންޑުގެ ޔޫރޯ ސްކޮޑުން ބާކީކޮށްފައެވެ.

މި މަހުގެ 11 ވަނަ ދުވަހު ޔޫރޯ ފަށާއިރު، އެ މުބާރާތުގައި އިންގްލެންޑް ހިމެނުނީ ގުރޫޕް ޑީ ގައެވެ. އެ ގުރޫޕުގައި ދެން ހިމެނެނީ ކްރޮއޭޝިއާ، ޗެކް ރިޕަބްލިކް އަދި ސްކޮޓްލެންޑެވެ. ޔޫރޯގެ ފުރަތަމަ މެޗުގައި މި މަހުގެ 13 ވަނަ ދުވަހު އިންގްލެންޑް ނުކުންނާނީ ކްރޮއޭޝިއާއާ ދެކޮޅަށެވެ.