މުޅި އިންޑިއާއިން ހެޕަޓައިޓިސް ނައްތާލުމަށް ސަރުކާރުގެ އެހީ ބޭނުންވާ ކަމަށް މަޝްހޫރު އެކްޓަރ އަމީތާބު ބައްޗަންބުނެފިއެވެ.
އަމީތާބު ވަނީ ވޯލްޑް ހެލްތު އޮގަނައިޒޭޝަން (ޑަބްލިއު އެޗް އޯ) ގެ ސައުތު އޭޝިއާ ރީޖަންގެ އެމްބެސެޑާކަން ހުކުރު ދުވަހު އައްޔަން ކޮށްފައެވެ.
އެކަމަށް ބޭއްވި ރަސްމިއްޔާތުގައި ނޫސްވެރިންނާ ބައްދަލުކުރައްވާ އަމީތާބު ބުނީ ހެޕަޓައިޓިސް މުޅިން ނައްތާލުމަށް ވަކި ވަކިން މަސައްކަތް ކުރި ކަމުގައި ވިއަސް އެކަމެއް ނުވާނެކަމަށާއި އެކަން ވާނީ ސަރުކާރުގެ ފެންވަރުގައި އެކަން ކުރުމަށް އުޅެގެން ކަމަށެވެ.
އަމީތާބު ބުނީ ހެޕަޓައިޓިސް އަށް ހާއްސަ ސަމާލުކަމެއް ދޭން ފެށުމުން އޭގެ އެދެވޭ ނަތީޖާ ފެންނަން ފަށާނެ ކަމަށެވެ.
އުމުރުން މިހާރު 74 އަހަރު ވެފައިވާ އަމީތާބު ބުނީ ހެޕަޓައިޓިސް ނައްތާލުމުގެ ޕްރޮގްރާމުގައި އޭނާއަށް ބައިވެރިވެވޭތީ އުފާކުރާ ކަމަށެވެ.
"އަހަންނަށް ހުރިހާ އާއިލާތަކަށް އަދި ގެތަކަށް ނުދެވިދާނެ، އެހެން ނަމަވެސް މިކަމަށް ހާއްސަކޮށްފައިވާ ޓީމްތަކުން ގޮސް އެމީހުންނަށް ހޭލުންތެރިވުމަށް އެހީ ވެދޭނެ," އަމީތާބު ބުންޏެވެ.
އަމީތާބު ބުނީ އޭނާއަށް ކުރިން ހެޕަޓައިޓިސް ޖެހުނު ކަމަށާއި އެހެން ނަމަވެސް މިހާރު މުޅިން ރަނގަޅު ވެއްޖެކަމަށެވެ. " އަހަންނަށް ލިވާގެ ސިރްހޮސިސް ޖެހުނު. މީހުން ބުނަނީ އަހަރެން ރާ ބޮނީ ކަމަށް. އެކަމަކު އަހަންނަކީ ރާ ބޯ މީހެއް ނޫން. އެ ނަން އިވުނަސް ބިރުގަނޭ. އަހަރެމެން އެބަޖެހޭ ހޭލުންތެރިކުރުވަން" އަމީތާބް ބުންޏެވެ.
