ރާއްޖޭގައި މިހާރު ފެތުރެމުން އަންނަ ވޭރިއަންޓަކީ ވަރަށް އަަވަހަށް މީހާ ބަލިކޮށްލާ ވޭރިއަންޓެއްކަމަށް ހެލްތު މިނިސްޓަރ އަހުމަދު ނަސީމް ވިދާޅުވެއްޖެއެވެ.
ހެލްތު އެމަރޖެންސީ އޮޕަރޭޝަން ސެންޓަރު (އެޗްއީއޯސީ)ން ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރ ވިދާޅުވީ ކުރީގައި ރާއްޖޭގައި ފެނިފައިވާ ކޮވިޑް ކޭސްތަކަށް ބަލާއިރު ގެޔަކުން އެކަަކަށް ކޮވިޑް ޖެހުމަށްފަހު ދެން ތިބި މީހުންނަށް ނުޖެހި ސަލާމަތްވާކަމަށެވެ. ނަމަވެސް މިހާރުގެ ހާލަތަށް ބަލާއިރު ގެޔަކުން އެކަކަށް ކޮވިޑް ޖެހުމާއެކު ގޭގައި ދެން ތިބި އެންމެންނަށްވެސް ވައިރަސް ޖެހޭކަމަށް މިނިސްޓަރ ވިދާޅުވިއެވެ. އެގޮތަށް ކިތަންމެ ގެޔެއްގައި ކަންކަން ހިނގާފައި އެބަހުރިކަމަށާއި އެއް އިމާރާތެއްގައި އެކި އެޕާޓްމަންޓްތަކުގައި ދިރިއުޅޭ މީހުން އެއް އެޕާޓްމަންޓުން އަނެއް އެޕާޓްމެންޓަށް ނުދިޔުމަށް އެެދިވަޑައިގަންނަވާ ކަމަށް ވިދާޅުވިއެވެ.
މީގެއިތުރުން ވައިރަސް ފެތުރުން ކޮންޓްރޯލްކުރުމަށް އެޗްޕީއޭއިން ދެމުންދާ އިރުޝާދުތަކާ އެއްގޮތަށް ދިރިއުޅުމުގެ ކަންކަން ބައްޓަންކުރުމަށް އެދިވަޑައިގެންނެވިއެވެ. އަދި މިހާރު އެޅިފައިވާ ފިޔަވަޅުތަކާއެކު ވެސް ކޮންމެސް ވަރަކަށް ކޭސްތައް ދަށަށްދާން ފަށާފައިވާކަމަށް މިނިސްޓަރ ވިދާޅުވިއެވެ.
އަޅުގަނޑުމެން މިކަމާގުޅޭގޮތުން ސަމާލުވެ ކަންތައް ކުރާ މިންވަރަކުން ކާމިޔާބުވާނީ. މިއެޅުނު ފިޔަވަޅިތަކާއެކު ކޮންމެސް ވަރަކަށް ކޭސްތައް ދަށަށްދާން ފަށާފައިވަނީ. މިފިޔަވަޅުތަކާއި ގުޅިގެންވެސް ކޮންމެހެން ޒަރޫރީ ބޭނުމަކަށް ނޫނީ ފާހެއް އޮތީތީވެ ބޭރަށް ނިކުމެ ނޫޅުއްވާ ޒަރޫރީ ބޭނުމަކަށް ނިކުންނަވާފައި ވީހާވެސް އަވަހަށް ގެއަށް ވަޑައިގަތުން މުހިންމު. މިކަމުގައި އެންމެން މަސައްކަތްކުރަން ޖެހޭ. އެއްބާރުލުން ބޭނުންވޭ.އަހުމަދު ނަސީމް / ހެލްތު މިނިސްޓަރ
މީގެއިތުރުން މިނިސްޓަރ ވަނީ އެވަގުތަކު ލިބެން ހުރި ވެކްސިނެއް ޖެހުމަށް އިލްތިމާސްކުރައްވާފައެވެ. މިނިސްޓަރ ވިދާޅުވީ ރާއްޖޭގައި މިބަލީގައި ނިޔާވެފައިވާ މީހުންގެ ގާތްގަނޑަކަށް 70 އިންސައްތަ މީހުންނަކީ ވެކްސިންގެ އެއްވެސް ޑޯޒެއް ޖަހާފައިނުވާ މީހުންކަމަށެވެ. މިނިސްޓަރ ވިދާޅުވީ ޚާއްސަކޮށް ދޮށީ އުމުރުގެ މީހުންގެ ތެރޭގައި ވެކްސިން ނުޖަހާ މީހުން އެބަތިބިކަމަށެވެ.
އެއް ބައި މީހުންނަކީ އެނދުމަތިވެފައި ތިބި މީހުން ،އަނެއް ބައި މީހުންނަކީ ވެކްސިން ޖަހަން ބޭނުންނުވާ މީހުން. އަނެއް ބައި މީހުންނަކީ ވެކްސިން ޖެހުމަށް ކޮންމެސް ކަހަލަ އުޒުރު ދިމާވެގެން އެކަން ނުކުރެވޭ މީހުން. އެކަހަލަ ކަންކަންވެސް ދިމާވެފައި އެބަހުރި. މުހިންމު ކަމަކީ އެންމެންވެސް ލިބެންހުރި ވެކްސިނެއް ޖެހުން. އެއީ ސިނޯފަރމް ވިއްޔާ ސިނޯފަރމް ވެކްސިން ނުޖަހާނަމޭ ބުނެ އެހެން ނުހަދާ. މިހެން ލިބޭ ފުރުސަތުގެ ބޭނުން ކުރުން އަޅުގަނޑުގެ އިލްތިމާސަކީ އެއީއަހުމަދު ނަސީމް / ހެލްތު މިނިސްޓަރ
މީގެއިތުރުން މިނިސްޓަރ ވިދާޅުވީ އެކި ސަބަބުތަކާހެދި ވެކްސިން ޖެހުމަށް ނާދެވޭ މީހުންނަށް ވެކްސިން ޖަހައިދިނުމުގެ ކަންކަން އެގޭގެއަށްގޮސްގެން ކުރުމަށް މާލެ ސަރަހައްދުގައި ހަތަރު ޓީމަކުން މިހާރު މަސައްކަތްކުރަމުން އަންނަކަމަށެވެ. މީގެ ދެހަފްތާއެއްހާ ދުވަސްކުރިން ފަށައިގެން އެމަސައްކަތްކުރަމުން އަންނަ ކަމަށް މިނިސްޓަރ ވިދާޅުވިއެވެ.
އަޅުގަނޑުމެންނަށް ރީޗްކުރެވެނީ ގާތްގަނޑަކަށް 23 މީހުންނަށް ދުވާލެއްގެ މައްޗަށް. އެކަންތައް ކުރުމަށް 3 އެމްބިޔުލަންސް ބާއްވައިގެން ޑޮކްޓަރުން ތިބެގެން އެކަން ކުރަނީ. އެކަން ކުރަނީ ދަމަނަވެށިން. މީގެއިތުރު މައުލޫމާތު ދަމަނަވެށިން ލިބޭނެ. އޭރަކު ލިބެން ހުންނަ ވެކްސިން ޖަހައިގެން ކޮންމެސް ވަރެއްގެ ހިމާޔަތެއް ހޯދުން މުހިންމުކަމެއް އެއީ.އަހުމަދު ނަސީމް / ހެލްތު މިނިސްޓަރ
ރާއްޖެއަށް ކޮވިޑް-19ގެ ހަތަރު ވަނަ ރާޅަކާއި ކުރިމަތިވެފައިވާއިރު ދުވާލެއްގެ މައްޗަށް ފެންނަ ކޭސްތަކުގެ އަދަދު ހާހަކުން މަތިން ގާތްގަނޑަކަށް ތިން ހަފްތާވަންދެން ވަނީ ރިޕޯޓްކޮށްފައެވެ. ކޭސްތައް މައްޗަށްދާން ފެށުމުން މާލެ ސަރަހައްދުގައި ވަނީ ފިޔަވަޅުތައް ވަރުގަދަކޮށްފައެވެ. އެގޮތުން ކޮންމެ ދުވަހަކު ހަވީރު 4ން ފެށިގެން ހެނދުނު 8 ޖެހުމާ ހަމައަށް ކާފިއު ހިންގަމުން އަންނައިރު ކާފިއު ނޫން ގަޑިތަކުގައި ބޭރު ތެރޭގައި އުޅެވޭނީ ހުއްދަ އޮންނަ ފަރާތްތަކަށް ކަމަށް ވަނީ ކަނޑައަޅާފައެވެ.
