ރާއްޖެއިން ކޮވިޑް-19 ވެކްސިން ގަންނަ އަގުތައް ހޯދުމަށް ބައެއް ފަރާތްތަކުން ސުވާލުކުރަމުން ގެންދާކަމަށާއި ނަމަވެސް ވެކްސިން ގަންނަ އަގުތައް ހާމަކުރުން އެގައުމުތަކުން މަނާކޮށްފައިވާކަމަށް ހެލްތު މިނިސްޓަރ އަހުމަދު ނަސީމް ވިދާޅުވެއްޖެއެވެ.

ހެލްތު އެމަރޖެންސީ އޮޕަރޭޝަން ސެންޓަރު (އެޗްއީއޯސީ)ން ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރ ވިދާޅުވީ އަގުތައް ހާމަކުރުން މަނާވެފައިވަނީ ވެކްސިން ވިއްކާ ގައުމުތަކުން އެކި ގައުމުތަކަށް ވެކްސިން ވިއްކަމުންދަނީ އެކި އަގުތަކުގައި ވުމުން ކަމަށެވެ. އެހެންނަމަވެސް ވެކްސިން ގަނެފައިވާނީ އެހާ އަގުބޮޑުކޮށް ނޫންކަމަށް ދަންނަވަންކެރޭ ކަމަށް މިނިސްޓަރ ވިދާޅުވިއެވެ.

މީގެއިތުރުން މިނިސްޓަރ ވިދާޅުވީ ސަޕްލައި އެގްރިމެންޓްގައި ބަލަންޖެހޭ އެތައް ކަމެއް ހުންނަކަމަށެވެ. އެހެންކަމުން ސަރުކާރުން ނިންމާފައި އޮންނަނީ އެވެކްސިނެއް އުފައްދާ ކުންފުންޏަކުން ސީދާ ވެކްސިން ގަތުމަށްކަމަށް މިނިސްޓަރ ވިދާޅުވިއެވެ.

ރާއްޖެ އިން މިހާރު ވެސް ވަނީ 1،000،000 ޑޯޒްގެ ވެކްސިން ހޯދަން އެކި ފަރާތްތަކަށް ފައިސާ ދައްކާފައެެވެ. އޭގެ ތެރޭގައި ހިމެނެނީ ސިންގަޕޫރުގެ އެސްޓްރާޒެނިކާ އިން 700،000 ޑޯޒް އާއި އިންޑިއާގެ ސިރަމް އިންސްޓިޓިއުޓުން 300،000 ޑޯޒް އެވެ. އަދި ރަޝިޔާގެ ސްޕަޓްނިކްވީ ވެކްސިން ގެ 200،000 ޑޯޒް ހޯދުމަށް އެއްބަސްވުމެއްގައި ސޮއިކުރުމުގެ މަސައްކަތްކުރަމުން އަންނަ ކަމަށް ސަރުކާރުން ވަނީ ބުނެފައެވެ.