މި އަހަރު ބޭއްވުމަށް ހަމަޖެހިފައިވާ ޔޫރޯ ފުޓްބޯޅަ މުބާރާތް ފެށުމަށް ކުޑަތަން ވެފައިވާއިރު، ރާއްޖެޓީވީން ވަނީ "މައިލޯ ޔޫރޯ ފޯރި 2021" އަށް އެނަލިސްޓުން ނަގާފައެވެ.

ރާއްޖެޓީވީން ގެނެސްދޭ ކަވަރޭޖުގައި ތަޖުރިބާކާރު ހަ އެނަލިސްޓުން ހަރަކާތްތެރިވާނެއެވެ. އޭގެ ތެރެއިން އެއް ބޭފުޅަކީ ކުރީގެ މަޝްހޫރު ގޯލްކީޕަރު އަދި މިހާރު ރާއްޖޭގެ ޓެންޑަ ބޯޑުގެ ޗެއާމަން އިސްމާޢީލް ޒަރިޔަންދުއެވެ. މި ފަހަރުގެ ރާއްޖެޓީވީ ކަވަރޭޖުގައި ޒަރިޔަންދު ހަރަކާތްތެރިވާއިރު، މީގެ ކުރިންވެސް އެނަލިސްޓެއްގެ ގޮތުގައި އޭނާ ވަނީ ފުޓްބޯޅައިގެ ބޮޑެތި ޕްރޮގްރާމްތަކުގައި ބައިވެރިވެފައެވެ.

މި މަހު ފަށާ "ޔޫރޯ 2020" ގެ އެނަލިސްޓެއްގެ ގޮތުގައި ޒަރިޔަންދު ހަރަކާތްތެރިވާއިރު، އޭނާ އިންސާފުކުރުމަށް ހަމަޖެހިފައިވަނީ ގްރޫޕް "އޭ" އެވެ. އެ ގްރޫޕުގައި ހިމެނޭ ގައުމުތަކަކީ ޔޫރަޕުގެ ގަދަ ބާރެއް ކަމުގައިވާ އިޓަލީ، ސްވިޓްޒަލެންޑް، ވޭލްސް އަދި ތުރުކީއެވެ. މި ގްރޫޕުގެ މެޗުތައް ކުޅޭނީ އަޒަބައިޖާނުގެ ބާކޫ އާއި އިޓަލީގެ ރޯމްގައެވެ.

ރާއްޖެޓީވީއަށް ދިން ހާއްސަ އިންޓަވިއުއެއްގައި ޒަރިޔަންދު ވިދާޅުވީ ގިނަ ބަޔަކު ހީކުރާ ގޮތުގައި ގްރޫޕް އޭ ގައި އެންމެ ވަރުގަދަވާނީ އިޓަލީ ކަމަށެވެ. އެކަމަކު އެ ގްރޫޕުގައި ދެން ހިމެނޭ ޓީމުތަކަކީވެސް އިޓަލީއަށް ދޫކުރާނެ ޓީމުތަކެއް ނޫން ކަމަށާއި، އެގޮތުން ސްވިޓްޒަލެންޑުންވެސް އިޓަލީއަށް ރަނގަޅު ފައިޓެއް ދޭނެ ކަމަށް ވިދާޅުވިއެވެ.

ޒަރިޔަންދު ވިދާޅުވީ އޭނާ އެނަލިސްޓުކަން ކުރަން ޖެހުނު ގްރޫޕާ މެދު ހިތްހަމަޖެހޭ ކަމަށެވެ. އަދި ބޮޑަށް ބަލާނީ ކުޅުންތެރިންނަށް ނޫން ކަމަށާއި، އޭގެ ބަދަލުގައި އޭނާ ބަލަނީ ބައިނަލްއަގުވާމީ މުބާރާތްތަކުގައި ޓީމުތަކުން ކާމިޔާބު ހޯދާފައިވާ މިންވަރަށާއި، މި މުބާރާތުގައި ޓީމުތަކުން ކުޅޭނެ ގޮތަށް ކަމަށްވެސް ވިދާޅުވިއެވެ.

މީގެ އިތުރުން ޒަރިޔަންދު ވަނީ މިފަދަ ހާލަތެއްގައި ރާއްޖެޓީވީން އިސްނަގައިގެން ޔޫރޯގެ އެކްސްކްލޫސިވް ރައިޓްސް ހޯދުމުން، އެކަމަށް ޝުކުރުއަދާކޮށްފައެވެ. އަދި ކޮވިޑް-19 ގެ މިހާލަތުގައި ދިވެހީންގެ ސިޓިން ރޫމުތަކަށް ޔޫރޯ ފޯރި އެންމެ ފުރިހަމަ ގޮތުގައި ގެނަސްދެވޭނެ ކަމަށް އުންމީދުކުރައްވާ ކަމަށްވެސް ޒަރިޔަންދު ވިދާޅުވިއެވެ.