މައްސަލަ ޖެހިފައިވާ އަނބިމީހާ ރުއްސަން ސައުދީ މީހަކު ކުރި ކަމަކުން އިތުރު މައްސަލަތަކެއް އުފެދިއްޖެއެވެ.
އަނބިމީހާއަށް އޭނާގެ ހިތުގައިވާ ލޯބި ހާމަކޮށްދިނުމަށް އަނބިމީހާ ޓީޗަރެއްގެ ގޮތުގައި މަސައްކަތްކުރާ ސްކޫލްގައި އޭނާ ކިޔަވައިދޭ ކްލާހަށް ސިއްރުން ވަދެ މުޅި ކްލާސް ރޫމްގައި ހުދު ފޮތި އަޅާ ޒީނަތްތެރިކޮށް މެސެޖްތައް ހަރުކޮށް، ކޭކުތައް ބަހައްޓާ، މާމެލާމެލި އަތުރާ ފުއްޕާހަން އެލުވިއެވެ.
އޭނާގެ މަގްސަދަކީ، ދެމީހުންގެ ދޭތެރޭގައި ހިނގި ޒުވާބަކަށްފަހު އަނބިމީހާ ރުޅި އައިސް އޭނާއާ ދުރުވުމުން އަލުން ގުޅުމަށް އެދުމެވެ.
ސައުދީ އަރަބިއްޔާގެ އުތުރުގެ ހިސާބެއް ކަމަށްވާ އަލް ޖައުފު ގައި ހިނގި މިހާދިސާގައި، ބޮޑު ހަރަދެއްކޮށް މިހުރިހާ މަސައްކަތެއް ފިރިހެން މީހާ ކުރި ނަމަވެސް، މިކަން އެނގުނު ހިސާބުން ސްކޫލުން ބޮޑު ތަހުގީގެއް ހިންގަން ފެށީއެވެ.
އަރަބް ނިއުސްގައިވާ މި ޚަބަރުގައި ޖެހިގެން އައި ދުވަހު ސްކޫލް ޕްރިންސިޕަލަށް މިކަން ހިނގި ކަން އެނގުމާއެކު، ކްލާހުން މި ހުރިހާ ތަކެތި ނެރެ ކްލާސް ސާފު ކުރަން އެންގިއެވެ. އަދި އެޑިއުކޭޝަންގެ ކަމާބެހޭ އޮފިޝަލުންނަށް މިކަން ރިޕޯޓުކޮށް މިކަން ތަހުގީގު ކުރަން ފެށިއެވެ.
ފަހުން އެނގުނު ގޮތުގައި ފިރިހެން މީހާއަކީ އަލް ޖައުފު ސަރަހައްދުގެ ތައުލީމާ ބެހޭ އިދާރާގައި މަސައްކަތް ކުރާ މުވައްޒަފަކަށް ވުމުން ބަންދު ގަޑީގައި ސްކޫލަށް އޭނާއަށް ވަނުމުގެ ފުރުސަތު ލިބުނީއެވެ. ކަމާބެހޭ ފަރާތުން އޭނާގެ މި އަމަލާ ގުޅިގެން އަޅާނެ ފިޔަވަޅެއް އަދި ހާމަކޮށްފައެއް ނުވެއެވެ. އަދި މި ހުރިހާ ކަމެއް ކޮށްގެން އަނބިމީހާ ރުއްސުނު ކަމެއްވެސް ނޭނގެއެވެ.
ކްލާސް ރޫމް ޒީނަތްތެރި ކޮށްފައިވާ ގޮތުގެ ވީޑިއޯ މިހާރު ޔޫޓިއުބްގައިވަނީ އާއްމު ވެފައެވެ. ގިނަ ބައެއްގެ ސަމާލުކަން ލިބިފައިވާ މި ވީޑިއޯއަށް މިހާތަނަށް ދެލައްކަ އަށް ވުރެ ގިނަ ވިއުސް ލިބިފައިވެއެވެ.
ވީޑިއޯ ބެލުމަށްފަހު މީހުން ކޮށްފައިވާ ކޮމެންޓްތަކަށް ބަލާއިރު، ގިނަ މީހުންވަނީ ފިރިހެންމީހާގެ މި އަމަލާ މެދު ހިތްހަމަ ނުޖެހުން ފާޅު ކޮށްފައެވެ.
