ކޮވިޑް-19ގައި ނިޔާވި އުމުރުން 10 އަހަރުގެ ފާތުމަތު މިޝްކާ މުހައްމަދުގެ އާއިލާއަށް އެޑިއުކޭޝަން މިނިސްޓްރީން ތައުޒިޔާގެ މެސެޖެއް ފޮނުވައިފިއެވެ.
އެޑިއުކޭޝަނުން ބުނީ އިމާދުއްދީން ސްކޫލްގެ ދަރިވަރު ފާތުމަތު މިޝްކާ މުހައްމަދު އަންގާރަ ދުވަހުގެ ރޭގެ ވަގުތެއްގައި ނިޔާވުމާގުޅިގެން މިޝްކާގެ ލޮބުވެތި އާއިލާއަށް، މިނިސްޓަރ އޮފް އެޑިޔުކޭޝަނާއި މިނިސްޓްރީގެ އިސްވެރިންނާއި އެންމެހާ މުވައްޒަފުންގެ ނަމުގައި އިޚްލާސްތެރި ތައުޒިޔާ ދަންނަވާ ކަމަށެވެ.
2018 ވަނަ އަހަރު އިމާދުއްދީން ސްކޫލާއި ގުޅުނު މިޝްކާއަކީ ކިޔެވުމުގެ އިތުރުން ސްކޫލުގައި ބާއްވާ ހުރިހާ އިތުރު ހަރަކާތެއްގައި ބައިވެރިވެ ވަނަ ހޯދައި ހުނަރުވެރި ދަރިވަރެއް ކަމަށް ވެސް އެޑިއުކޭޝަނުން ފާހަގަ ކޮށްފައިވެއެވެ. އަދި ޚާއްސަ ދުވަސްތައް ފާހަގަކުރުމަށް ސްކޫލުގައި ބޭއްވޭ ޚާއްސަ އެސެމްބްލީތަކުގައި މަދަހައާއި ޅެން ހުށަހެޅުމުގެ އިތުރުން، ގުރުޢާން މުބާރާތާއި މަދަޙަ މުބާރާތުން ވެސް މިޝްކާ ފަޚުރުވެރި ވަނަތަކެއް ހާސިލް ކޮށްފައިވާ ކަން މި މެސެޖުގައި ފާހަގަ ކޮށްފައިވެއެވެ.
މީގެ އިތުރުން އެންމެ ފަހުން އެ ސްކޫލްގައި އޮންލައިންކޮށް ބޭއްވި 'ސްޓޯރީ ޓެލިން' އަދި 'ކްރިއޭޓިވް ރައިޓިންގ' އިން ވެސް އެންމެ މޮޅު 5 ދަރިވަރުންގެ ތެރޭގައި މިޝްކާ ހިމެނިފައިވާ ކަމަށާއި މިޝްކާގެ ކުއްލި ވަކިވުމަކީ އިމާދުއްދީން ސްކޫލަށާއި، ތައުލީމީ އާއިލާއަށް ލިބުނު ނުހަނު ބޮޑު ހިތާމައެއް ކަމަށް ފާހަގަކުރެއެވެ. އަދި މި ހިތާމަވެރި ދަނޑިވަޅުގައި މަރުހޫމާގެ ފުރާނައަށް މާތްﷲ ރަހުމަތްލައްވައި ސުވަރުގޭގެ ދާއިމީ ނިޢުމަތް ލެއްވުން އެދި ދުޢާކުރާކަމަށާއި މި ފުން ހިތާމައިގައި މި މިނިސްޓްރީގެ އެންމެހާ މުވައްޒަފުންބައިވެރިވެ، މަރުހޫމާގެ އާއިލާއާއި އެކުވެރީންނަށް ކެތްތެރިކަން ދެއްވުން އެދި ދުއާ ކުރާ ކަމަށް އެޑިއުކޭޝަން މިނިސްޓްރީން ބުނެއެވެ.
މި ބަލީގައި ކުޑަކުއްޖަކު ނިޔާވި އިރު މިއީ ރާއްޖެއިން ކޮވިޑްގައި ނިޔާވި ފުރަތަމަ ކުޑަކުއްޖާއެވެ. އެމްބިއުލާންސް ފޮނުވުމުގައި ލަސްވި ކަމަށް ހެލްތު މިނިސްޓްރީން އިއުތިރާފުވެފައިވާއިރު، ކޮވިޑް-19 ރާއްޖޭގައި އެންމެ ފުރަތަމަ ފެތުރެން ފެށި އިރު ވެސް އެ މައްސަލަ ފެންމަތިވިއެވެ. ކޮވިޑް-19 ރެސްޕޮންސް ޓީމުގައި އައިޖީއެމްއެޗްގެ އެމްބިއުލާންސްތައް ބޭނުންކުރަމުން އަންނައިރު ބަލި މީހުން އުފުލުމާއި ނިޔާވާ މީހުން އުފުލުމަށް ވެސް ގެންގުޅެނީ އެއް އެމްބިއުލާންސްތަކެކެވެ.
