ޖަޕާނުގައި ކޮވިޑް-19 އާ ދެކޮޅަށް ކުރަމުން އަންނަ މަސައްކަތުގެ ތެރެއިން ޔުނިވަރސިޓީތަކާއި މަސައްކަތުގެ މާހައުލުގައި ވެކްސިން ދިނުމުގެ ޕްރޮގްރާމް ފެށުމަށް ތައްޔާރުވެއްޖެއެވެ.

ޖަޕާނުގައި ކޮވިޑް ފެތުރުން ކޮންޓްރޯލް ކުރުމަށް ވެކްސިން ދިނުމުގެ ކަންކަން ހަރުދަނާކޮށް ގިނަ ބަޔަކަށް ވެކްސިން ދިނުމުގެ މަސައްކަތް އަންނަނީ ކުރަމުންނެވެ. މިކަމާ ގުޅިގެން އެގައުމުގެ ޗީފް ކެބިނެޓް ސެކްރެޓަރީ ކަޓްސުނޮބޫ ކާޓޯ ވިދާޅުވީ ޔުނިވަރސިޓީތަކާއި އޮފީސްތަކަަށް ދިނުމަށް ހަމަޖެހިފައިވަނީ މޮޑާނާގެ ވެކްސިން ކަމަށް ބުނެފައިވެއެވެ.

އެންމެ ފަހުގެ މީޑިއާ ރިޕޯޓުތައް ދައްކާ ގޮތުން އެގައުމުގެ އާބާދީގެ 2.6 އިންސައްތަ މީހުންވަނީ ފުރިހަމަ ކުރަން ޖެހޭ އަދަދަށް ވެކްސިންގެ ޑޯޒްތައް ފުރިހަމަ ކޮށްފައެވެ. އެގޮތުން މިހާތަނަށް 12.3 މިލިއަން ޑޯޒް ދީފައިވާ ކަމަށް ފަހުގެ ތަފާސްހިސާބުތައް ދައްކައެވެ.

ޖަޕާނުގައި ވެސް ކޮވިޑް ފެތުރެމުން ދާއިރު މިހާތަނަށް 744,487 މީހަކަށް މި ބަލި ޖެހިގެން ރިޕޯޓު ކޮށްފައިވެއެވެ. އަދި 12,967 މީހަކު ބަލީގައި ނިޔާވެފައިވާއިރު ބަލި ޖެހުނު މީހުންގެ ތެރެއިން 675,877 މީހަކު ވަނީ ބަލިން ރަނގަޅުވެފައެވެ.

ދުނިޔޭގެ އެކިކަންކޮޅުތަކުގައި ކޮވިޑް ފެތުރެމުންދާއިރު 171,491,205 ކޮވިޑް ޖެހިގެން ރިޕޯޓު ކޮށްފައިވާ ކަމަށް ވޯލްޑްމީޓަރސް އިން ހާމަ ކޮށްފައިވެއެވެ.