ތައްޓަކާއިއެކު އެންމެ ފުރިހަމަގޮތުގައި ސީޒަން ނިންމާލަން ފުރުސަތު ލިބިފައިވާ ކަމަށާއި، އަލުން ޗެމްޕިއަންސް ލީގަށް ކޮލިފައިވުމަށް މި ލިބުނު ފުރުސަތުގެ ބޭނުން ހިފުން ވަރަށް މުހިންމު ކަމަށް މެންޗެސްޓާ ޔުނައިޓެޑްގެ ކޯޗް ހޯސޭ މޮރީނިއޯ ބުނެފިއެވެ.

ސެލްޓާ ވީގޯ ބަލިކުރުމަށް ފަހު ޔޫރޮޕާ ލީގުގެ ފައިނަލަށް ދަތުރުރުމަށްފަހު ނޫސްވެރިންނާ ވާހަކަ ދައްކަމުން މޮރީނިއޯ ބުނެފައި ވަނީ، މިއީ މެންޗެސްޓާ ޔުނައިޓެޑުން ކުޅުނު އެންމެ ޓަފް މެޗު ނޫން ކަމަށާއި، މިއަށްވުރެ މާ ވަރުގަދަ ފައިނަލުތައް ވެސް އަދި ސެމީ ފައިނަލުތައް ވެސް އެކުލަބުން ކުޅެފައިވާ ކަމަށެވެ.

ނަމަވެސް މެޗަށް ނިކުތުމުގެ ކުރީގައި މޮރީނިއޯ ބުނެފައި ވަނީ، ސެލްޓާއާ ދެކޮޅަށް ކުޅޭ މެޗަކީ އެޓީމުގެ ހަޔާތުގައި ވެސް ކުޅޭ އެންމެ އުނދަގޫ އެންމެ ބޮޑު މެޗު ކަމަށެވެ.

މެޗަށް ފަހު ވާހަކަ ދައްކަމުން މޮރީނިއޯ ވަނީ އޭނާ މެޗުގެ ކުރިން ދެއްކި ވާހަކަތައް އަމިއްލައަށް ދޮގުކޮށްފައެވެ.

މޮރީނިއޯ ބުނެފައިވަނީ މި މެޗަކީ ޔުނައިޓެޑުން ކުޅުނު އެންމެ އުނދަގޫ މެޗު ނޫން ކަމަށާއި ނަމަވެސް މިއީ ސެލްޓަ ވީގޯއިން ކުޅުނު އެންމެ އުނދަގޫ މެޗު ކަމަށެވެ.

މޮރީނިއޯ ބުނެފައިވަނީ މެޗުގެ ފަހުކޮޅުގައި ޔުނައިޓެޑުގެ ކުޅުން ވަރަށް ދަށްވި ކަމަށާއި، ފަހު ވަގުތާ ޖެހެންދެން ކުޅުންތެރިންނަށް ހިތްވަރު ކޮށްލެވުނީ، މެޗުން މޮޅުވާން އެ ކުޅުންތެރިން ބޭނުންވެފައި ތިބިވަރުން ކަމަށެވެ.

މިފަހަރުގެ ސީޒަނަށް ބޮޑެތި ހަރަދުތަކަކާ އެކު ނިކުމެ މާ އެދެވޭ ނަތީޖާތަކެށް ނުދެއްކުނު ނަމަވެސް، އަލުން ޗެމްޕިއަންސް ލީގަށް ކޮލިފައިވުމަށް އަމާޒުހިފައިގެން މަސައްކަތް ކުރަމުން އަންނަ ޔުނައިޓެޑަށް ޔޫރޮޕާ ލީގުގެ ޗެމްޕިއަންކަން ހޯދައިގެން އެޓީމުގެ ޓާގެޓަށް ވާސިލް ވެވޭނެއެވެ.

މޮރީނިއޯ ބުނެފައިވަނީ ލީގު ނިންމާލަން ޔުނައިޓެޑަށް މި ލިބުނި ރަނުގެ ފުރުސަތެއް ކަމަށާއި، ފައިނަލް މެޗު ކާމިޔާބުކޮށް، ތައްޓަކާ އެކު، އަލުން ޗެމްޕިއަންސް ލީގުގެ ޖާގައަކާއެކު، އެންމެ ފުރިހަމަ ގޮތުގައި ސީޒަން ނިންމާލުމަށް ކުރެވެންހުރި ހުރިހާ މަސައްކަތެށް ކުރާނެ ކަމަށެވެ.

ޔޫރޮޕާ ލީގުގެ ފައިނަލުގައި ޔުނައިޓެޑުން ނިކުންނަން ޖެހޭނީ ލިއޯން ބަލިކުރުމަށް ފައިނަލަށް ދަތުރުކުރި އަޔެކްސްއާ ދެކޮޅަށެވެ. ފައިނަލް މެޗު އޮންނާނީ މިމަހުގެ 24 ވަނަ ދުވަހުއެވެ.