އެންމެ ފަހުންކުރި ވިއްސާރައިގައި ފުވައްމުލަކުގެ 99 ގެއަކަށް ބޮޑެތި ގެއްލުންތަކެއް ލިބިފައިވާ ކަމަށް ފުވައްުމުލައް ސިޓީ ކައުންސިލުން ބުނެފިއެވެ.

ސިޓީ ކައުންސިލުން ބުނީ މި މެއި މަހު އެ ސިޓީއަށް ކުރި ގަދަ ވިއްސާރައަށްފަހު ހެދި އެސެސްމެންޓުން 99 ގެއަކަށް ފެންވަދެ ބޮޑެތި ގެއްލުންތައް ވެފައިވާތީވެ، އެހީތެރިކަމަށް އެދި ނޭޝަނަލް ޑިޒާސްޓަރ މެނޭޖްމެންޓް ސެންޓަރަށް މިހާރު ފޮނުވާފައިވާ ކަމަށެވެ. މި އެހީތައް ވަރަށް އަވަހަށް އެ ގެތަކަށް ލިބިގެންދާނެ ކަމަށް ކައުންސިލުން ބުންޏެވެ.

ބޯކޮށް ވާރޭވެހި ފެން ބޮޑުވާ މައްސަލަ ހައްލު ކުރުމަށް ފެން ހިންދާ ނިޒާމަށް ބަދަލުތަކެއް ގެންނަން ކައުންސިލުން ގެންދަނީ މަސައްކަތް ކުރަމުންނެވެ. މޭޔަރ ވިދާޅުވީ، ރަނގަޅު ފެން ހިންދާ ނިޒާމެއް ގާއިމުކުރުމަށް މިހާރު ޕްލޭނިންގ މިނިސްޓްރީއާކު މަސައްކަތް ކުރަމުން އަންނަ ކަމަށެވެ. ފުވައްމުލަކުގައި ގާއިމުކުރުމަށް ކުރިން ނިންމާފައިވާ ސްޓޯމް ވޯޓަރ ސިސްޓަމަކީ، އެ ސިޓީއަށް އެންމެ އެކަށީގެންވާ ސިސްޓަމަކަށް ނުވާތީ ދާއިމީ ހައްލެއް ހޯދުމުގެ މަސައްކަތް ފަށާފައިވާ ކަމަށެވެ.

މެއި 15 ވަނަ ދުވަހު ކުރި ވިއްސާރައިގައ 15 ގެއަކުން މީހުން ބަދަލުކުރަން ޖެހުނު ކަމަށް ކައުންސިލުންވަނީ ބުނެފައެވެ. އަދި ފެނުގެ އަސަރު ކުރުމުގެ ސަބަބުން 87 ގެއަކުން ހިފާ ގެންގުޅޭ ތަކެއްޗާއި ފަރުނީޗަރު ބޭނުން ނުކުރެވިގެން އުކާލަން ޖެހުނު ކަމަށް ކައުންސިލުން މައުލޫމާތު ދެއެވެ.