ހޮނިހިރު ދުވަހު މުޅި ރާއްޖެއިން ކޮވިޑް-19އާ ދެކޮޅަށް ވެކްސިން ޖެހި މީހުންގެ އަދަދު 2000އަށް ވުރެ ދަށް ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކުން ދައްކައިފިއެވެ.

އެޗްޕީއޭއިން އާންމުކުރި ތަފާސްހިސާބުތައް ދައްކާގޮތުން ހޮނިހިރު ދުވަހު މުޅި ރާއްޖެއިން ވެކްސިން ޖެހީ ޖުމްލަ 1،590 މީހުންނެވެ. އެއީ ފުރަތަމަ ޑޯޒު ޖެހި 422 މީހުންނާއި ދެވަނަ ޑޯޒު ޖެހި 1،168 މީހުންނެވެ. ފުރަތަމަ ޑޯޒު ޖެހި 422 މީހުންގެ ތެރެއިން 170 މީހުން ވެކްސިން ޖެހީ މާލެއިންނެވެ. އަދި 252 މީހުން ވެކްސިން ޖަހާފައިވަނީ އަތޮޅުތެރެއިންނެވެ. އަދި ދެވަނަ ޑޯޒު ޖެހި މީހުންގެ ތެރެއިން 310 މީހުން ވެކްސިން ޖެހީ މާލެ ސަރަހައްދުންނެވެ. އަދި 858 މީހުން ވެކްސިން ޖަހާފައިވަނީ އަތޮޅުތެރެއިންނެވެ.

މިހާތަނަށް ވެކްސިން ޖެހި މީހުންގެ ޖުމްލަ އަދަދު 309،444ށް އަރާފައިވާއިރު އޭގެތެރެއިން 165،181 މީހުން ވަނީ ދެވަނަ ޑޯޒު ޖަހާފައެވެ.

ރާއްޖޭގައި ކޮވިޝީލްޑްގެ އިތުރުން ފައިޒަރ އަދި ސިނޮފަރމް ވެކްސިނަށް ހުއްދަ ދީފައިވާއިރު، ދާދި ފަހުން މޯލްޑިވްސް ފުޑް އެންޑް ޑްރަގް އޮތޯރިޓީ (އެފްޑީއޭ)ން ވަނީ ރަޝިއާގެ ސްޕަޓްނިކް ވެކްސިން ރާއްޖޭގައި ބޭނުން ކުރުމުގެ ހުއްދަ ވެސް ދީފައެވެ. މިވަގުތު ރާއްޖޭގައި ޖަހަމުން އަންނަނީ ފައިޒާ، ސިނޮފާމް، އަދި ކޮވިޝީލްޑް ވެކްސިނެވެ.

ކޮވިޝީލްޑް ވެކްސިންގެ ދެވަނަ ޑޯޒު އެންމެނަށް ނުޖެހެނީސް އެ ވެކްސިން ހުސްވެފައިވާއިރު އެ ވެކްސިން ދެން ލިބޭނެ ދުވަހެއް ނޭނގޭ ކަމަށް އެޗްޕީއޭއިން ވަނީ ބުނެފައެވެ. ބަދަލުގައި އެސްޓްރަޒެނެކާ ވެކްސިން ޖެހޭނެ ކަމަށް ބުނެފައިވާއިރު އެ ވެކްސިން ގެނައުމުގެ މަސައްކަތްކުރަމުން އަންނަ ކަމަށް ބުނެފައިވެއެވެ. އެކަމަކު އަންނަ މަހުގެ ފުރަތަމ ހަފްތާގައި ވެސް ވެކްސިން ނުލިބޭނެ ކަމަށް ހެލްތު މިނިސްޓަރ ނަސީމް ވިދާޅުވެފައިވެއެވެ.

މިދިޔަ ފެބްރުއަރީ 1ވަނަ ދުވަހުން ފެށިގެން ކޮވިޝީލްޑް ވެކްސިން ޖަހަން ފަށާފައިވާއިރު، އޭގެ ދެވަނަ ޑޯޒް ޖެހޭނީ ވެކްސިން ޖަހާތާ 8 ހަފްތާއާއި 16 ހަފްތާއާ ދެމެދުގެ މުއްދަތެއްގައެވެ.

ރަޝިއާގެ ސްޕަޓްނިކް ވެކްސިންއަށް ވެސް ހުއްދަ ދީފައިވާއިރު، އަންގާރަ ދުވަހުގެ ރޭ ރައީސް ވިދާޅުވީ ރަޝިޔާގެ ސްޕަޓްނިކް ވެކްސިންގެ 2 ލައްކަ ޑޯޒް ގެނައުމަށް މަސައްކަތް ކުރަައްވަމުން ގެންދަވާކަމަށާއި އެ ވެކްސިނަށް ކުރިޔަށް އޮތް ދެ ދުވަހުގެ ތެރޭގައި އޯޑަރު ދެއްވާނެކަމަށެވެ. ވެކްސިންތައް ހުސްވަމުންދާއިރު، ވެކްސިން ހޯދުމުގެ މަސައްކަތް ހުއްޓަވާނުލައްވާ ކަމަށް އެމަނިކުފާނު ވިދާޅުވެފައިވެއެވެ. އެގޮތުން ކޮވިޑްގެ ވެކްސިން ގެނައުމަށް ގިނަ ގޮންޖެހުންތަކެއް ހުރި މި ދަނޑިވަޅުގައި ވެސް ވެކްސިން ކަށަވަރުކުރުމަށް ގިނަ މަސައްކަތްތަކެއް ކުރަމުންދާކަމަށާއި، އެގޮތުން ސިންގަޕޫރްގެ އެސްޓްރަޒެނަކާގެ 7 ލައްކަ ޑޯޒް ގެނައުމަށް އެގްރިމެންޓްކޮށްފައި ވާނެ ކަމަށް ވެސް އެމަނިކުފާނު ވިދާޅުވިއެވެ. އެހެންނަމަވެސް އިމްޕޯޓްކުރުމުގައި މިވަގުތު ހުރި ދަތިތަކުގެ ސަބަބުން އަދިވެސް އެ ވެކްސިން ލިބިފައިނުވާކަން ރައީސް ވަނީ ފާހަގަ ކުރައްވާފައެވެ.