އޮންލައިންކޮށް މަޖިލީހުގެ ޖަލްސާ ކުރިއަށްދަނިކޮށް، ކެމެރާ ކުރިމަތީގައި ކުޑަކަމުދިޔަ މަންޒަރު އާންމު ވުމުން މެންބަރަކު މަސްއޫލިއްޔަތުތަކުން އަމިއްލައަށް އެކަހެރިގެންފިއެވެ.

އާމޮސްއަކީ، ކެނެޑާގެ މަޖިލިސް މެމްބަރަކަށް ވުމުގެ އިތުރުން، ކެނެޑާގެ މިނިސްޓަރ އޮފް އިނޮވޭޝަން، ސައިންސް އެންޑް އިންޑަސްޓްރީގެ ޕާލަމެންޓްރީ ސެކެޓްރީވެސް މެއެވެ. އާމޮސް ބުނެފައިވަނީ، ޕާލަމެންޓްރީ ސެކެޓްރީގެ މަގާމުންނާއި، އަދި ކޮމިޓީގެ މަސައްކަތުން ވަގުތީގޮތުން ދުރަށްދާން ނިންމާފައިވާ ކަމަށެވެ.

ކެނެޑާގެ ގާނޫނު ހަދާ މަޖިލީހުގެ މެމްބަރު، ވިލިއަމްސް އާމޮސްގެ މިއަމަލު މިގޮތަށް ތަކުރާރުވި މިއީ ދެވަނަ ފަހަރެވެ. މީގެ މަހެއްހާ ދުވަސް ކުރިން ފުރަތަމަ ފަހަރަށް ކެމެރާ ކުރިމަތީގައި ކުޑަކަމު ދިޔުމަށްފަހު، ހުކުރު ދުވަހުގެ ރޭ އޮންލައިންކޮށް ކުރިއަށްދިޔަ މަޖިލީހުގެ ޖަލްސާގައިވެސް އާމޮސްގެ ފަރާތުން މިކަން ވަނީ ތަކުރާރު ވެފައެވެ.

"ރޭ ކުރިއަށްގެންދިޔަ ސެޝަނަކީ އާއްމުކޮށް ހުޅުވާލައިގެން ކުރިއަށްދިޔަ ސެޝަނެއް ނޫން. ކެމެރާ ކުރިމަތީގައި ކުޑަކަމުދިޔައީ ގަސްދުގައެއް ނޫން. ކެމެރާ އޮން ކަމެއް ނޭގި" ޓްވިޓަރ މެދުވެރިކޮށް މާފަށް އެދެމުން އާމޮސް ބުނެފައިވެއެވެ.

އާމޮސް އަކީ ބޮޑުވަޒީރު، ޖަސްޓިން ޓްރޫޑޯގެ ލިބަރަލް ޕާޓީއަށް ނިސްބަތްވާ މެމްބަރެކެވެ.

މިއަހަރުގެ އެޕްރިލް މަހުގެ 14 ވަނަ ދުވަހު، އާމޮސްވަނީ، ގާނޫނު ހަދާ މަޖިލީހާއެކު ކުރިޔަށްދިޔަ ވިޑިއޯ ކޯލްއެއްގައި ބަރަހަނާކޮށް ފެނިފައެވެ. މި ވީޑިއޯ ކޯލްގެ މަންޒަރުގެ ސްކްރީން ޝޮޓްތައް އޮންލައިން މީޑިއާތަކުގައި ފުޅާދާއިރާއެއްގައި ވަނީ ދައުރުވެފައެވެ.

އާމޮސް ވަނީ އެޕްރީލް މަހުގެ ހާދިސާއާ ގުޅިގެންވެސް މާފަށް އެދިފައެވެ.