ކުޅުދުއްފުށި އެއާޕޯޓަށް ލަފާފުރުވުމަށް އާންމުން ދިއުން މަނާކޮށްފިއެވެ.

ކުޅުދުއްފުށީ ސިޓީ ކައުންސިލުން ބުނީ މިދުވަސްވަރަކީ މާލެ އަދި ރާއްޖޭގެ އެކި ހިސާބުތަކުގައި ކޮވިޑް-19 ރޯގާ ހަލުވިކަމާއެކު ފެތުރެމުންދާ ދުވަސްވަރަކަށްވާތީ ރައްކާތެރިވުމަށް ގިނަގުނަ މަސައްކަތްތަކެއް ކުރަމުންދާ ކަމަށެވެ. ނަމަވެސް މި މަސައްކަތްތަކުގެ ނަތީޖާ އެންމެ އެދެވޭގޮތެއްގައި ފެންނާނީ ރައްކާތެރިވެ ތިބުމަށް އެންމެން އެކުގައި މަސައްކަތް ކޮށްގެންކަން ކައުންސިލުން ފާހަގަކޮށްފައިވެއެވެ.

ކައުންސިލުން ބުނީ ވޭތުވެދިޔަ ދުވަސްތަކުގައި މާލެއިން ކުޅުދުއްފުށި ސިޓީއަށް ދަތުރުކޮށް ހޯމްކަރަންޓީން ފުރިހަމަކުރުމުގެ ތެރެއިން ކޮވިޑް-19ށް ޕޮޒިޓިވް ކޭސްތަކެއް ވަނީ ފެނިފައި ކަމަށެވެ. އެހެންކަމުން އެއާޕޯޓަށް މީހުން ލަފާފުރުވުމަށް އާންމުން ދިއުމަކީ މަނާކަމެއް ކަމުގައި ކުޅުދުއްފުށި ކޮވިޑް-19 ޓާސްކްފޯސްގެ ފަރާތުން ނިންމާފައިވާ ކަމަށެވެ.

ކޮންޓްރޯލް ކުރުމަށް ކުރަމުންދާ މަސައްކަތުގައި އާއްމު ރައްޔިތުންގެ ފަރާތުން ލިބޭ އެއްބާރުލުން ކައުންސިލުން ފާހަގަކޮށްފައިވެއެވެ.

ކުޅުދުއްފުށި ސިޓީން ފްލޫ ކްލިނިކަށް ދެއްކި ތިން މީހަކު ކޮވިޑް-19 އަށް ޕޮޒިޓިވްވެ، އެ ސިޓީ މޮނިޓަރިންއަށް ލާފައިވަނީ މިމަހުގެ 2 ވަނަ ދުވަހުއެވެ. އެންމެފަހުގެ މައުލޫމާތަށް ބަލާއިރު، އެސިޓީގައި 12 އެކްޓިވް ކޭސް ހިމެނެއެވެ. އާއްމު ރައްޔިތުންގެ އެއްބާރުލުމާއެކު ކޮވިޑް-19 ވަރަށް ބޮޑަށް ކޮންޓްރޯލް ކުރެވިފައިވާ ކަމަށް ކައުންސިލުން މައުލޫމާތުދެއެވެ.