ކޮވިޑް-19 ފެތުރުން ކޮންޓްރޯލް ކުރުމަށް މާލެ ސަރަހައްދުގައި އިއުލާނުކޮށްފައިވާ ކާފިއު ގަޑި އިތުރުކޮށް، އަޅާފައިވާ އިތުރު ހަރުކަށި ފިޔަވަޅުތަކާއެކު މާރުކޭޓުގެ ވިޔަފާރި ވަރަށް ބޮޑަށް ދަށަށް ގޮސްފައިވާ ކަމަށް ވިޔަފާރިވެރިން ބުނެފިއެވެ.
ވިޔަފާރިވެރިން ބުނީ މީހުން އަންނަނީ އަތުން ގުނާލެވޭހާ މަދުން ކަމަށާ ވިޔަފާރިތަކަށް ބޮޑެތި ގެއްލުންތަކެއް ކުރިމަތިވަމުން ދާ ކަމަށެވެ. މީގެ ކުރިން މާލެ ކައިރި ރަށްރަށުން ވެސް ވިޔަފާރި ކުރަން މީހުން އަންނަ ކަމަށާއި ނަމަވެސް މިހާރު އެ މީހުން ވެސް ނާންނާތީ ބޮޑެތި ގޮންޖެހުންތަކާއި ކުރިމަތިވެފައިވާ ކަމަށް ވިޔަފާރިވެރިން ބުނެއެވެ. އަދި މިދުވަސްވަރު ހުޅނަގު މޫސުމުގެ ވިއްސާރަ ކުރަމުން ދިއުމާއެކު ބައެއް ރަށްރަށުގެ ދަނޑުތައް ހަލާކުވުމާ ގުޅިގެން ތަކެތީގެ އަގު އުފުލުން އެކަށީގެން ވާ ކަމަށް ވެސް ވިޔަފާރިވެރިން ބުނެއެވެ.
ފާއިތުވި ރަމަޟާން މަހު މާރުކޭޓުގެ ވިޔަފާރި ދަށްވި ނަމަވެސް މިހާރު އެވަރަށް ވެސް ވިޔަފާރި ނުވާ ކަމަށް ބުނެއެވެ. އަދި ކޮވިޑްގެ މި ހާލަތާއެކު ބައެއް މީހުން މާރުކޭޓަށް ވިޔަފާރި ކުރަން އަންނަން ޖެހިލުންވާ ކަމަށް ވެސް ވިޔަފާރިވެރިން ވަނީ ފާހަގަކޮށްފައެވެ. މީގެ އިތުރުން މަސްމާރުކޭޓޫގައި ވެސް މަހުގެ އަގުތައް އުފުލިފައިވާއިރު އެ ތަނުގައި ތިބޭ ވިޔަފާރިވެރިން ބުނީ މި ހާލަތުގައި މަސް ބާނަންދާ މީހުން މަދު ކަމަށާއި މިހާރު މަސް ލިބުމުގައި ގިނަ ދަތިތަކެއް ކުރިމަތިވެފައިވާ ކަމަށެވެ.
މާރުކޭޓުތަކުގެ ވިޔަފާރި ދަށަށް ގޮސްފައިވާއިރު މާލެ ސިޓީ ކައުންސިލުން ބުނީ އެ ކައުންސިލްގެ ބެލުމުގެ ދަށުގައިވާ މާރުކޭޓުތައް ހުޅުވާނީ ހެނދުނު 08:30ން މެންދުރު 03:30ށް ކަމަށެވެ. އަދި ކޮންމެ ގޮޅިއަކަށް ވެސް ދޫކުރަނީ އެއް ފާސް ކަމަށް ސިޓީ ކައުންސިލުން ބުނެއެވެ.
މާލެ ސަރަހައްދުގައި އިއުލާނުކޮށްފައިވާ ކާފިއު ގަޑި ހަވީރު 4:00ން ހެނދުނު 8:00ށް ވަނީ އިތުރުކޮށްފައެވެ. އަދި ކާފިއު ނޫން އެހެން ގަޑިތަކުގައި ބޭރަށް ނުކުމެ އުޅުމުގައި އިތުރު ހިފެހެއްޓުންތަކެއް އަޅަން ނިންމާފައިވާއިރު، ކާފިއު ނޫން ގަޑީގައި ކޮންމެ ގެއަކަށް ވެސް ރެސިޑެންޝަލް ޕާމިޓެއް ދޫކުރުމަށް ވަނީ ނިންމާފައެވެ.
