އެޕްރީލް މަހުގެ 25 ގައި އެޅުވުމަށް ތައްޔާރުވަމުން އަންނަ "ބޭވޮޗް" ބަލައިފި ކަމަށާއި އެ ފިލްމު ވަރަށް މަޖާވާނެކަމަށް އެކްޓަރ ޕްރިޔަންކާ ޗޮޕްރާ ބުނެފިއެވެ.
ޕްރިޔަންކާ މިހާރު އަންނަނީ ވަރަށް ގަދައަށް އެ ފިލްމް ޕްރޮމޯޓް ކުރަމުންނެވެ. އެގޮތުން އޭނާ ވަނީ "ބޭވޮޗް" ގެ ޕްރޮމޯޝަން ނިއުޔޯކްގައި ފަށައިފައެވެ.
މިއީ ޒުވާނުންތަކެއްގެ ތެރޭގައި ހިނގާ، ޒުވާން ކަންތައްތަކެއް ދައްކުވައި ދޭނެ ފިލްމެއް ކަމަށް ޕްރިޔަންކާ ބުންޏެވެ. މި ފިލްމު ހަދާފައިވަނީ ނުވަދިހައިގެ އަހަރުތަކުގައި މަޝްހޫރުވެގެން ދިޔަ ޓީވީ ސިލްސިލާ "ބޭވޮޗް" އަށް ބިނާކޮންނެވެ.
ސެތު ގޯޑެން ޑައިރެކްޓްކޮށް، ޑްވޭން ޖޯންސަން (ރޮކް) އާއި ޒެކް އެފްރޯން، އެލެގްޒެންޑާ ޑަޑާރިއޯ ފަދަ ތަރިން ފެނިގެންދާ "ބޭވޮޗް" ގައި ޕްރިޔަންކާ ކުޅެފައި ވަނީ ވިކްޓޯރިއާ ލީޑްސް ކިޔާ ވިލަންއެއްގެ ރޯލެވެ.
މި ފިލްމުގެ އެކްޓަރ ރޮކް ބުނެފައިވަނީ "ބޭވޮޗް"ގެ ރީތިކަމާއި މަޖާކަން ހަމަހަމަ ކުރުމަކީ އުދަގޫ ކަމެއް ކަމަށާއި އެހެންކަމުން "ބޭވޮޗް" އަށް އެންމެ ރަނގަޅު ޗޮއިސް އަކީ ޕްރިޔަންކާ ކަމަށެވެ. އޭނާ އަދި ބުނީ މިއީ ވަރަށް ވަރުގަދަ ފްރެންޗައިޒަކަށްވާތީ "ބޭވޮޗް" އަކީ އާދައިގެ ކުޑަކުޑަ ފިލްމެއް ނޫން ކަމަށެވެ.
