ފުވައްމުލަކު ސިޓީގައި މަސައްކަތްތެރިންގެ ދަފްތަރު އެކުލަވާލުމުގެ މަސައްކަތް ކައުންސިލުން ފަށައިފިއެވެ.

ފުވައްމުލަކު ސިޓީ ކައުންސިލްގެ އިދާރާއިން ބުނީ މި ދަފްތަރު އެކުލަވާލުމުގެ މައިގަނޑު މަގުސަދަކީ ކުދި އަދި މެދުފަންތީގެ ވިޔަފާރިތަކަށް ފަހި މާހައުލެއް ފުވައްމުލަކުގައި ގާއިމުކޮށް ވިޔަފާރިތަކުގެ ދައުރު ފުޅާކޮށް އެ ވިޔަފާރި ދެމެހެއްޓެނިވި ގޮތެއްގައި ތަރައްގީވުމުގެ ގާބިލުކަން ލިބިފައިވާ ވިޔަފާރިތަކަކަށް ހެދުމަށް މަގުފަހިކުރުމެވެ. އަދި ކައުންސިލުން ކުރުވާ މަސައްކަތްތަކަކީ ވީހާވެސް ގިނަ ފަރާތްތަކަށް ބައިވެރިވުމުގެ ފުރުސަތު ލިބިދެވޭނެހެން، ދެފުށްފެންނަ ގޮތަކަށް ކުރެވޭ މަސައްކަތްތަކެއްކަމުގައި ހެދުން ކަމަށް ކައުންސިލުން ބުނެއެވެ.

ކައުންސިލުން ބުނީ މި ދަފުތަރުގައި ރަޖިސްޓްރީވުމަށް ކުންފުނިތަކުން އެ ކުންފުންޏެއް ފުރިހަމަ ނަމާއި، ވިޔަފާރި ރަޖިސްޓްރީގެ ކޮޕީއާއި އެސް.އެމް.އީ ރަޖިސްޓްރީގެ ކޮޕީ، ވެރިފަރާތުގެ އައިޑީ ކާޑު ކޮޕީ، ގުޅޭނެ ނަންބަރު އަދި ކުންފުނީގެ މެއިލް އެޑްރެސް ހިމެނޭ ގޮތަށް މަޢުލޫމާތުތައް ފުރިހަމަކުރުމަށްފަހު ކައުންސިލްގެ މެއިލް އެޑްރެހަށް 9 ޖޫންގެ ކުރިން އީމެއިލް ކޮށްދިނުމަށް އެދޭ ކަމަށެވެ.

ފުވައްމުލަކު ސިޓީގައި މަސައްކަތްތެރިންގެ ހައްގުތައް ކަށަވަރުކޮށްދިނުމާއި ފަހި ފުރުސަތުތައް ހޯދައިދިނުމަށް ކައުންސިލުން މީގެ ކުރިން ވެސް ބައެއް މަސައްކަތްތައް ކޮށްފައިވެއެވެ. މީގެ މަގުސަދަކީ ޒުވާނުންގެ ގާބިލުކަން އިތުރުކޮށް މަސައްކަތުގެ މާހައުލަށް ނެރުން ކަަމަށް ކައުންސިލުން ބުނެއެވެ.