ކޮވިޑް-19ށް ޕޮޒިޓިވްވެގެން ކަރަންޓީނު ފުރިހަމަ ކުރާ މީހުންނަށް ލިޔުމެއް ދޫނުކުރާ ގޮތަށް އެޗްޕީއޭއިން ނިންމައިފިއެވެ.
މީގެ ކުރިން ބަލި ޖެހިގެން ކަރަންޓީނު ކުރާއިރު ލިޔުމެއް ދެއެވެ. ކަރަންޓީނު ނިމުމުން ވެސް ނިމިއްޖެ ކަމުގެ ލިޔުމެއް ދެއެވެ. މި ލިޔުން ލިބުމުން ނޫނީ ބޭރަށް ނިކުމެ އުޅުން މަނަލެވެ.
ކޮވިޑަށް ޕޮޒިޓިވްވާ މީހުންގެ ބަލި ހާލަތަށް ބަލައި، ކަރަންޓީނުގައި ހުންނަންޖެހޭ މުއްދަތު ތަފާތުވާނެ ކަމަށާއި، އާންމުކޮށް ކަރަންޓީނުކުރާ މުއްދަތަކީ 14 ދުވަސް ކަމަށް ވިޔަސް އޭގެ ފަހުން ވެސް ހުން އައުމާއި ނޭވާލާން ދަތިވުމާއި ކެއްސުން ފަދަ ކަންކަން ހުންނަ ނަމަ 21 ދުވަހަށް ކަރަންޓީނު ކުރާ ހާލަތު ވެސް އަންނަކަމަށް އެޗްޕީއޭއިން ބުނެއެވެ. އަދި ފަރުވާދޭ މެޑިކަލް ފެސިލިޓީއަކަށް ގެންދާ މީހެއްނަމަ އެމީހަކު ދޫކޮށްލާނީ ޑޮކްޓަރުގެ އިރުޝާދަށް ކަމަށާއި އެ މީހުންގެ މުއްދަތު ވެސް 14 ދުވަހަށް ވުރެ އިތުރުވެދާނެ ކަމަށް އެޗްޕީއޭ އިން ބުންޏެވެ.
އެޗްޕީއޭއިން ބުނީ ކަރަންޓީނު ނިމިއްޖެ ކަމުގެ އިތުރު ލިޔުމެއް ދޫނުކުރަން ނިންމާފައި ވަނީ އެކި މީހުން ކަރަންޓީނުގެ މުއްދަތު ތަފާތު ވާތީ ކަމަށެވެ.
އެޗްޕީއޭއިން މިގޮތަށް ނިންމާފައި ވަނީ ކަރަންޓީނުގެ ލިޔުން ނުލިބި ގިނަ ބަޔަކު އެކަމުގެ ޝަކުވަކުރަމުންދާ ދަނޑިވަޅެއްގައެވެ. އެ ޑޮކިއުމެންޓް ދޫކުރުމުގައި ވެސް ބޮޑު ބެކްލޮގެއް އެބައޮތް ކަމަށް އެޗްޕީއޭއިން ބުނެފައިވެއެވެ.
