ކޮވިޑް-19ން ރައްކާތެރިވުމަށް ބަލި ފެތުރުން ކޮންޓްރޯލްކުރުމަށްޓަކައި މޮނިޓަރިންގ ގެ ހާލަތަށް ގެނެވޭ ރަށްރަށުގައި ފިޔަވަޅުތަކެއް އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން އަންގައިފިއެވެ.

އެގޮތުން ބުދަ ދުވަހުން ފެށިގެން މޮނިޓަރިންގ ގައި އޮންނަ ރަށްރަށުގައި ރޭގަނޑު 9ން ފެށިގެން ފަތިހު 4ށް އެއްގަމު އުޅަނދުފަހަރު އުދުއްވުމާއި، މަގުމައްޗާއި އާންމު ތަންތަނަށް މީހުން ނިކުތުން ވަނީ މަނާކޮށްފައެވެ. އެހެންނަމަވެސް ރަށުގައި ބަލިފެތުރުމުގެ ހާލަތަށް ބަލައި މި ފިޔަވަޅު އަޅައިފައިވާ ވަގުތަށް ބަދަލުގެނެވޭނެކަމަށް އެޗްޕީއޭއިން ބުނެއެވެ.

ކާފިއު ހިންގާފައި އޮންނަ ވަގުތުތަކުގައި ސިފައިންނާއި ފުލުހުން، ސިއްހީ ޚިދުމަތްދޭ އިދާރާތަކުގެ މުވައްޒަފުންނާއި އެމުވައްޒަފުން ދުއްވާ އުޅަނދުފަހަރު އިސްތިސްނާވާނެއެވެ. މީގެއިތުރުން އެމްބިޔުލަންސް އާއި މޮނިޓަރިންގ ގެ ހާލަތުގައި އޮންނަ ރަށްރަށުގެ ޓާސްކުފޯހުގެ ފާސް ލިބިފައިވާ ފަރާތްތަކާއި އެމަރޖެންސީކޮށް ސިއްހީ ޚިދުމަތް ހޯދަންޖެހޭ މީހުން އިސްތިސްނާވާނެކަމަށް އެޗްޕީއޭއިން ބުނެއެވެ.

މީގެއިތުރުން ދެން އަޅާފިޔަވަޅުތަކަކީ:

- ޒަރޫރީ ބޭނުންތަކުގައި މެނުވީ ގެއިން ބޭރަށް ނުނިކުތުން

- ޕާޓީތަކާއި، ޙަފްލާތަކާއި، ރަސްމިއްޔާތުތައް ބޭއްވުން ހުއްޓައިލުން

- އެއް ގެއިން އަނެއް ގެއަށް ޒިޔާރަތް ކުރުން ހުއްޓައިލުން

- އެއްފަހަރާ ތިން މީހުންނަށްވުރެ ގިނަ މީހުން މަގުމައްޗާއި އާންމުތަންތާންގައި އެއްވެ އުޅުން ހުއްޓާލުން

- ސެލޫންތަކާއި ޖިމްތަކާއި ބޯކޮށާ ތަންތަން ބަންދުކުރުން

- ހުރިހާ ކުޅިވަރު ހަރަކާތްތަކާއި ކަސްރަތުގެ ހަރަކާތްތައް ހުއްޓާލުން

- ފިހާރަތަކުން ޚިދުމަތްދޭއިރު ހެލްތް ޕްރޮޓެކްޝަން އެޖެންސީން އާންމުކޮށްފައިވާ ގައިޑްލައިނާ އެއްގޮތަށް ޚިދުމަތް ދިނުން

- ޔުނިވަރސިޓީތަކާއި ކޮލެޖްތަކަށް ދަރިވަރުން ހާޒިރުވެގެން ކުލާސްތައް ކު ރިޔަށް ގެންދިޔުން ހުއްޓައިލުން

- ހޮޓާތަކާއި، ކެފޭތަކާއި ރެސްޓޯރެންޓްތަކާއި ކާބޯތަކެތީގެ ޚިދުމަތް ދޭ އެހެނިހެން ތަންތަނުން ދެމުންގެންދާ ޚިދުމަތްތައް ހުއްޓައިލުން، މީގެތެރޭގައި ޓޭކްއަވޭ އާއި ޑެލިވަރީ ހުއްޓާލުން

ރާއްޖޭގައި ކޮވިޑްގެ ހާލަތު އިންތިހާއަށް ގޯސްވެފައިވާއިރު މާލެ ސަރަހައްދުގައި ކޮވިޑް ފެތުރުން ހުއްޓުވުމަށް ވަނީ ފިޔަވަޅުތައް ވަރުގަދަކޮށްފައެވެ. އެންމެ ގިނަ އަދަދެއްގެ މީހުން ކޮވިޑަށް ޕޮޒިޓިވްވެގެން ރިޕޯޓްކުރަމުން އަންނަނީ މާލެ ސަރަހައްދުން ކަމަށްވިޔަސް އަތޮޅުތަކުގެ ވެސް ގިނަ ރަށްރަށަކުން އަންނަނީ މީހުން ކޮވިޑަށް ޕޮޒިޓިވްވަމުންނެވެ. އެގޮތުން 24 މެއި ވީ ހޯމަ ދުވަހާ ހަމައަށް 74 ރަށެއް ވަނީ މޮނިޓަރިންގ ގެ ހާލަތުގައެވެ.