އިސްރާއީލާއި ޣައްޒާގެ ޖަމާއަތްތަކާ ދެމެދު ހަނގުރާމަ ހުއްޓާލުމަށް އެއްބަސްވެފައިވީނަމަވެސް އިރުމަތީ ގުދުސްގައި އަންނަނީ ނުތަނަވަސްކަން އިތުރުވަމުންނެވެ.
ހުކުރު ނަމާދު އަޤްޞާ މިސްކިތުގައި ގިނަ އަދަދެއްގެ މުސްލިމުން ކޮށްފައިވާއިރު އޭގެފަހުން އިސްރާއީލުގެ ފައުޖުތައް ވަނީ އަޤްޞާ މިސްކިތުގެ ހަރިންމަތެރިއަށް ވަދެގަނެ އެތާނގައި އަޅުކަންކުރަން ތިބި މީހުންނަށް އަމާޒުކޮށް ކަރުނަގޭސް ޖަހާފައެވެ.
މަންޒަރުދުން މީހުންނާއި ހަވާލާދީ އަލްޖަޒީރާއިން ރިޕޯޓްކޮށްފައިވާ ގޮތުގައި ހުކުރު ނަމާދުކޮށް ނިމިގެން އެސަރަހައްދުގައި ނަމާދަށް އައިސްތިބި މީހުން މަޑުކޮށްގެން ތިބީ އުފާފާޅުކުރުމުގެ ގޮތުންނެވެ. އެއީހަމަލާ ބަދަލުކުރުން ހުއްޓާލަން އެއްބަސްވުމުންނެވެ.
އެމީހުން އުފާފާޅުކުރަމުންދަނިކޮށް އިސްރާއީލުގެ ސިފައިން މިސްކިތުގެ ހަރިންމަތެރެއަށް ވަދެގަނެ އެސަރަހައްދުގައި ތިބި މީހުންނާ ދިމާލަށް ސްޓަން ގްރޭނޭޑާއި ކަރުނަގޭސް އަދި ބޮމް އުކަން ފެށިކަމަށް އަލްޖަޒީރާއިން ވަނީ ރިޕޯޓްކޮށްފައެވެ. އަދި އެސަރަހައްދުގައި އެއްވެ ތިބި މީހުން ފޮނުވާލުމަށް މަސައްކަތްކުރިއެވެ.
މިސްރުން އިސްވެއޮވެ ހަމަލާތައް ބަދަލުކުރުމަށް ދެފަރާތުން ވީއެއްބަސްވުމާއެކު 11 ދުވަސްވަންދެން އިސްރާއީލާއި ޣައްޒާގެ ހަނގުރާމަވެރި ޖަމާއަތްތަކާދެމެދު ކުރަމުންދިޔަ ހަނގުރާމަ ހުއްޓާލާފައިވަނީ ހުކުރު ދުވަހުއެވެ. ހަމަލާ ބަދަލުކުރުން ހުއްޓާލުމާއެކު އެތައް ހާސް ފަލަސްތީނުގެ ރައްޔިތުންނެއް ވަނީ ޣައްޒާ އާއި ހުޅަނގު އައްސޭރީގެ މަގުތަކަށް ނިކުމެ އުފާފާޅުކޮށްފައެވެ.
އިސްރާއީލުން ޣައްޒާއަށް ދިން ބޮމުގެ ހަމަލާތަކުގައި ފަލަސްތީނުގެ 243 މީހުން ޝަހީދުވިއިރު އޭގެތެރޭގައި 66 ކުޑަކުދިންވެސް ހިމެނެއެވެ. އަދި އިސްރާއީލްގެ 12 މީހުން މަރުވެފައިވާއިރު އޭގެތެރޭގައި 2 ކުޑަކުދިން ހިމެނެއެވެ.
އިސްރާއީލުން ޣައްޒާއަށް ދިން ހަމަލާތަކުގައި ވެއްޓިފައިވާ އިމާރާތްތަކުން މީހުން ސަލާމަތްކުރުމުގެ މަސައްކަތް ހުކުރު ދުވަހުވެސް ވަނީ ކޮށްފައެވެ. އެގޮތުން އިމާރާތްތަކުގެ ދަށުން ފަލަސްތީނުގެ 9 މީހެއްގެ ހަށިގަނޑު ވަނީ ނަގާފައެވެ. އޭގެތެރޭގައި ކުޑަކުއްޖަކުވެސް ހިމެނޭކަމަށް އަލްޖަޒީރާއިން ބުނެއެވެ.
އަނެއްކޮޅުން ހަމަލާބަދަލުކުރުން ހުއްޓާލާފައި އޮތްނަމަވެސް ހަމާސްއިން ރޮކެޓް ހަމަލާއެއް ފޮނުވާލައިފިނަމަ ހަމަލާދޭން އަލުން ފަށާނެކަމަށް ވިދާޅުވެ އިސްރާއީލުގެ ބޮޑުވަޒީރު ނަތަންޔާހޫ ވަނީ އިންޒާރުދެއްވާފައެވެ.
