ކޮވިޑް-19ގައި ރާއްޖެއިން 103 ވަނަ މީހަކު މަރުވެއްޖެއެވެ.

އެޗްޕީއޭއިން ބުނީ ރޭ 11:14 ހާއިރު، އުމުރުން 79 އަހަރުގެ ދިވެހި އަންހެނަކު މި ބަލީގައި ނިޔާވެފައިވާ ކަމަށެވެ. އެމީހާއަށް ފަރުވާދެމުން ދިިޔައީ ހުޅުމާލެ މެޑިކަލް ފެސިލިޓީގައެވެ. މި މީހާ އަކީ އިއްޔެ ކޮވިޑް-19ގައި ނިޔާވި ހަތަރު ވަނަ މީހާއެވެ. ކޮވިޑް-19ގައި ރާއްޖެއިން މަރުވި މީހުންގެ އަދަދު 100ށް ވެސް އަރާފައި ވަނީ އިއްޔެއެވެ.

މި ބަލީގައި ރާއްޖެއިން މަރުވާ މީހުންގެ އަދަދު ދުވަހެއް ދުވަހަކަށް އިތުރުވަމުން އަންނައިރު މިދިޔަ ތިން ދުވަސް ތެރޭގައި އެކަނި ވެސް މި ބަލީގައި 9 މަރު ރިޕޯޓުކޮށްފައިވެއެވެ. ރާއްޖޭގައި ކޮވިޑް-19 ޖެހި ފަރުވާދެމުންދާ އެކްޓިވް ކޭސްތަކުގެ އަދަދު 16،000ން މައްޗަށް ގޮސްފައިވާއިރު، އޭގެ ތެރެއިން 268 މީހުންނަށް ފަރުވާދެމުން އަންނަނީ އެޑްމިޓްކޮށްގެންނެވެ.

ޕޮޒިޓިވްވާ މީހުންގެ އަދަދުވެސް އިތުރުވަމުން އަންނައިރު، ކޮންމެ ދުވަހަކު ވެސް ރިޕޯޓުކުރާ ކޭސްތަކުގެ އަދަދު ވަނީ 1000ން މައްޗަށް އަރާފައެވެ.