ޗެލްސީ ބަލިކޮށް އަންހެނުންގެ ޗެމްޕިއަންސް ލީގު ބާސެލޯނާއިން ކާމިޔާބުކޮށްފިއެވެ.

އާދީއްތަ ދުވަހުގެރޭ ސްވިޑެންގައި ކުޅުނު ފައިނަލް މެޗުން ބާސާ މޮޅުވީ ފަސޭހަކަމާއެކު 4-0 ގެ ނަތީޖާއަކުންނެވެ. މިއީ ސްޕެއިން ޓީމަކުން އަންހެނުންގެ ޗެމްޕިއަންސް ލީގު ކާމިޔާބުކުރި ފުރަތަމަ ފަހަރެވެ.

އާދީއްތަ ދުވަހުގެރޭ ކުޅުނު ފައިނަލް މެޗުގައި ބާސާއިން މޮޅު ކުޅުމެއް ދެއްކިއިރު، އެ ޓީމުން ހަތަރު ލަނޑުވެސް ކާމިޔާބުކޮށްފައިވަނީ ފުރަތަމަ ހާފުގައެވެ. އެގޮތުން މެޗު ފަށައިގެން 35 ވަނަ ސިކުންތުގައި ބާސާއިން ލީޑު ނެގިއިރު، މިއީ ޗެލްސީގެ މެލަނީ ލެއުޕޮލްޒް އަތުން ބައިކޮޅަށް ވަން ލަނޑެކެވެ. އަދި މެޗުގެ 14 ވަނަ މިނެޓުގައި ލިބުނު ޕެނަލްޓީއަކުން އަލެކްސިއާ ޕުޓެއްޔަސް ވަނީ ބާސާއަށް ލީޑު ފުޅާކޮށްދީފައެވެ.

އޭގެ ފަހުންވެސް މި ހާފުގައި ބާސާއިން ގިނަ ހަމަލާތަކެއް އުފެއްދިއިރު، މެޗުގެ 21 ވަނަ މިނެޓުގައި އައިޓާނާ ބޮންމާޓީ ވަނީ ބާސާގެ ތިންވަނަ ލަނޑު ޖަހައިދީފައެވެ. އަދި އެ ޓީމުގެ ހަތަރުވަނަ ލަނޑު މެޗުގެ 36 ވަނަ މިނެޓުގައި ކާމިޔާބުކޮށްދިނީ ކެރޮލައިން ގްރޭމް ހެންސެންއެވެ.

މި މޮޅާއެކު އަންހެނުންގެ ޗެމްޕިއަންސް ލީގު ބާސާއިން ކާމިޔާބުކުރިއިރު، ބާސާ ވެފައިވަނީ އަންހެނުންގެ ޗެމްޕިއަންސް ލީގާއި ފިރިހެނުންގެ ޗެމްޕިއަންސް ލީގު ކާމިޔާބުކުރި ހަމައެކަނި ޓީމަށެވެ.

މި ސީޒަނުގެ ޗެމްޕިއަންސް ލީގު ބާސާގެ އަންހެން ޓީމުން ކާމިޔާބުކުރިއިރު، އެ ޓީމުން އަންނަނީ މި ސީޒަނުގައި ތަފާތު މޮޅު ކުޅުމެއް ދައްކަމުންނެވެ. އެގޮތުން މި ސީޒަނުގައި ހުރިހާ މުބާރާތެއްގައި މިހާތަނަށް ކުޅުނު 37 މެޗުން އެ ޓީމު ބަލިވެފައިވަނީ އެންމެ ދެ މެޗުންނެވެ. އަދި ބާސާގެ އަންހެން ޓީމުން ވަނީ މި ސީޒަނުގެ އަންހެނުންގެ ސްޕެނިޝް ލީގުވެސް ކާމިޔާބުކޮށްފައެވެ.