ރާއްޖެ ސަރަހައްދުގައި އުޅޭ ތޫފާނާއި، ކޮޅިގަނޑުގެ ނުރައްކާ ކުޑަވެ ދެކުނުގެ ސަރަހައްދުތަކުގައި ދަތުރުކުރުން ރައްކާތެރިކަމަށް މޫސުމާ ބެހޭ ގައުމީ އިދާރާއިން ބުނެފިއެވެ.
ރާއްޖެއަށް ކުރަމުންދާ ވިއްސާރައިގެ އެންމެ ފަހުގެ މައުލޫމާތު ރާއްޖެ އެމްވީއާއި ހިއްސާ ކުރައްވަމުން މޫސުމާބެހޭ ގައުމީ އިދާރާގެ އެސިސްޓެންޓް މީޓިރޮލޮޖިސްޓް ހުސައިން ވަހީދު ވިދާޅުވީ ހުޅަނގު މޫސުމުގެ ވިއްސާރައިގެ ސަބަބުން ރާއްޖޭގެ ދެކުނުން އައްޑޫ ސިޓީއާ 530 ކިލޯމީޓަރު ދުރުގައި އުފެދިފައިވާ ކޮޅިގަނޑު ރާއްޖެއާއި ދުރަށް ދަތުރު ކުރަމުންދާކަމަށެވެ. މި ކޮޅިގަނޑުން ކުރާ ސީދާ އަސަރު ކުޑަވެ ދެކުނުގެ އަތޮޅުތަކަށް މޫސުން ރަނގަޅުވަމުންދާ ކަމަށް ވިދާޅުވިއެވެ. މިކަމުގެ ސަބަބުން އެސަރަހައްދުގައި ވައިޖެހޭ ބާރުމިން އާދައިގެ ވަރަކަށް ބަދަލުވެފައިވާއިރު، ކަނޑުތައްވެސް ދަތުރުކުރުމަށް އަމާންވެފައިވާކަމަށް ހުސައިން ވަހީދު ވިދާޅުވިއެވެ.
ދެކުނުގެ ކަނޑުތައް އަމާންވި ނަމަވެސް ރާއްޖޭގެ އުތުރުން ތޫފާން "ޓައުޓޭ"ގެ ބާރު ގަދަވުމުގެ ސަބަބުން އުތުރުގެ ސަރަހައްދުތަކުގައި ކަނޑު އާންމުގޮތެއްގައި ގަދަވެ ވިލާގަނޑުގައި އިތުރަށް ގަދަވާނެކަމަށް ވަނީ ލަފާކޮށްފައެވެ. މި ސަބަބަށްޓަކައި ދަތުރުކުރުމުގައި ސަމާލުވެ ދޯނިތަކަށް ބަރުކޮށްގެން ދަތުރު ނުކުރުމަށް ހުސައިން ވަހީދު އިލްތިމާސް ކުރެއްވިއެވެ. ރާއްޖޭގެ މޫސުން މުޅިން ރަނގަޅުވުމަށް އަދި ހަފުތާއެއް ނަގާނެކަމަށް ވަނީ ލަފާކޮށްފައެވެ.
ކުރީގައި އަންދާޒާކުރިގޮތާއި ތަފާތުކޮށް ދެކުނުގެ ވިއްސާރަ އަލިވާނެ އަވަހަށް އިނގޭތޯ. އައްޑޫ ސިޓީއާ 530 ކިލޯމީޓަރު ދުރުން އުފެދިފައިވާ ކޮޅިގަނޑު ރާއްޖެއާއި ދުރަށް ދަތުރުކުރާއެކު އެ ސަރަހައްދުގެ ވައިމަޑުވެ ކަނޑުތައް އަމާންވާނެ. އެއާ ޚިލާފަށް އުތުރުގެ ސަރަހައްދަށް އަދިވެސް ތޫފާނުގެ ނުސީދާ އަސަރާއިހުރެ ކަނޑުތައް ގަދަވާނެ. އިލްތިމާސަކީ މޫސުމަށް ބަލައިގެން ދޯނިތައް ބަރުނުކޮށް ދަތުރު ކުރުން. ދިޔަވަރު ބޮޑު ގަޑިތަކުގައި އުތުރަށް އުދަވެސް އަރާފާނެ އިނގޭތޯއެސިސްޓެންޓް މީޓިރޮލޮޖިސްޓް ހުސައިން ވަހީދު
ތޫފާން "ޓައުޓޭ" އަކީ މި ސަރަހައްދުގައި މިއަހަރު އުފެދުނު ފުރަތަމަ ތޫފާނެވެ. މި ތޫފާނުގެ އަސަރު އެންމެ ބޮޑަށް ކުރާނެކަމަށް ބެލެވެނީ އިންޑިޔާގެ ހުޅަނގު ބިތުގެ ސަރަހައްދަށާއި ޕާކިސްތާނަށް ކަމަށް ބައިނަލްއަގްވާމީ މީޓިއޮރޮލޮޖިސްޓުން ވަނީ ލަފާ ކޮށްފައެވެ.
