ލޮކްޑައުންއާއި ގުޅިގެން މާލޭގައި ތާށިވި މީހުންގެ ތެރެއިން ރަށަށް އަނބުރާ ދިއުމަށް އެދުނު މީހުންގެ ތެރެއިން ޓްރާންސިޓް ކަރަންޓީން ގައި ތިބި 360 މީހަކު ރަށަށް އަނބުރާ ފޮނުވާފައިވާ ކަމަށް ނެޝަނަލް އެމަރޖެންސީ އޮޕަރޭޝަން ސެންޓަރ (އެންއީއޯސީ) އިން ހާމަކޮށްފި އެވެ.

އެންއީއޯސީ ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ސެންޓަރުގެ ތަރުޖަމާނު މަބްރޫކް އަޒީޒު ވިދާޅުވީ ލޮކްޑައުންއާއި ގުޅިގެން ޓްރާންސިޓް ކަރަންޓީން ގައި މަޑުކުރުމަށްފަހު ރަށަށް ފޮނުވުމަށް ކުރަމުންދާ މަސައްކަތުގެ ތެރެއިން މިހާތަނަށް 2711 މީހެއް ވަނީ ފެސިލިޓީސްތަކަށް ގެންދެވިފައިވާ ކަމަށެވެ.

މީގެ އިތުރުން، އިތުރު 94 މީހަކު އާދީއްތަ ދުވަހު ގެންދެވިފައިވާ ކަމަށާއި، ޓްރާންސިޓް ކަރަންޓީން ގައި 14 ދުވަސް ހަމަކުރުމަށްފަހު 360 މީހަކު އަނބުރާ ރަށަށް ގެންގޮސްފައިވާ ކަމަށް މަބްރޫކް ވިދާޅުވި އެވެ.

މީގެ އިތުރުން މާލެ ކައިރީގައި ހުރި ކަރަންޓީން ފެސިލިޓީތަކުން 69 މީހަކު ކަރަންޓީނުން ދޫކޮށްލާފައިވާ ކަމަށެވެ. ކަރަންޓީން ފެސިލިޓީތަކުގައި މިވަގުތު 1403 މީހަކު ތިބި އިރު، އައިސޮލޭޝަން ފެސިލިޓީތަކުގައި 1258 މީހަކު އެބަތިއްބެވެ.

ޓްރާންސިޓް ކަރަންޓީނު ފެސިލިޓީތައް ގާއިމްކުރެވިގެން ދިޔައީ މާލެ ފުރަބަންދު ކުރުމާއި ގުޅިގެން، އަނބުރާ ރަށަށް ނުދެވި ތާށިވީ ފަރާތްތަކަށް ރަށަށް ދެވޭނެ އިންތިޒާމްތައް ހަމަޖެއްސުމުގެ ގޮތުންނެވެ. ކަރަންޓީނު މުއްދަތު ފުރިހަމަ ކުރުމަށް ފަހު މި ފަރާތްތަކަށް ރަށަށް ދެވޭ ގޮތަށް ހަމެޖެއްސީ، އަތޮޅު ތެރެއަށް ބަލި ފެތުރުނަ ނުދީ ކޮންޓްރޯލް ކުރުމުގެ ގޮތުންނެވެ.

ޓްރާންސިޓް ކަރަންޓީން ފެސިލިޓީތަކުގައި ތިބި މީހުން ވެސް ދޫކޮށްލަނީ ކަރަންޓީނު ކުރާ އެހެން މީހުންނާއި މެދު އަމަލުކުރާހެން، މުއްދަތު ހަމަވުމަށް ފަހު ސާމްޕަލްތައް ނެގުމަށް ފަހު ނެގެޓިވް ކަމުގައިވާ ނަމަ އެވެ.