އެސްއެމްއީ ފައިނޭންސް ޑިވެލޮޕްމަންޓް ކޯޕަރޭޝަން (އެސްޑީއެފްސީ) މެދުވެރިކޮށް އަމިއްލަ ފަރާތްތަކަށް ދޫކުރަމުން އައި ލޯނުގެ އަދަދު 18،000ރ. އިން 30،000ރ. އަށް އިތުރުކުރަން ނިންމައިފި އެވެ.

ލޯނު އެހީގެ ގޮތުގައި އެންމެ ކުދި ވިޔަފާރިތަކަށް (އަމިއްލަ ފަރުދުންގެ ވިޔަފާރިތަކަށް) ދޫކުރާ ލޯނުގެ އަދަދު އިތުރުކުރަން ސަރުކާރުން ނިންމާފައިވާކަން އިއުލާނުކުރެއްވީ މާލީ ވަޒީރު އިބްރާހިމް އަމީރެވެ. އެހީގެ އަދަދު އިތުރުކުރަން ނިންމި ސަބަބު ހާމަކުރައްވަމުން އަމީރު ވިދާޅުވީ، މީގެ ސަބަބުން އެ ވިޔަފާރިތަކަށް ފަހި ފުރުސަތުތަކެއް ލިބޭނެ ކަމަށް ގަބޫލުކުރައްވާ ކަމަށެވެ.

ކުދި ވިޔަފާރިތަކުގެ ތެރެއިން 18،000ރ. ދިނުމަށް ކަނޑައަޅާފައިވާ ގިންތިއަކީ، އަމިއްލަ މަސައްކަތް ކުރާ (ފްރީލާންސް) މީހުންނެވެ. މީގެ ތެރޭގައި ވިޔަފާރިއެއްގެ ގޮތުގައި ރަޖިސްޓްރީ ނުކޮށް ހިންގާ ވިޔަފާރިތައް ވެސް ހިމެނެ އެވެ. މި ލޯނު ފައިސާ ދޫކުރަނީ، ތިން އަހަރު ދުވަހުގެ ތެރޭގައި އަނބުރާ ދައްކާގޮތަށް 6 ޕަސެންޓު އިންޓްރެސްޓް ރޭޓުގަ އެވެ. މި ލޯނު ހޯދަން އެއްވެސް ރަހުނެއް ބަހައްޓާކަށް ނުޖެހެ އެވެ.